O Paionia i Atunuu Uma
Sailiga Umi a Mikaele
Sa mafaufau Mikaele po o le fea o lotu e moni.
Sa ato e Mikaele lana atofaafafa i luga o lona tauau. O le aso muamua lea o le aoga, ma sa le mafai ona faatali o ia! Sa nonofo o ia ma lona aiga i Initia. E toatele tamaiti i lona nuu sa le mafai ona o i le aoga. Sa faafetai Mikaele ona sa ia maua le avanoa e aoao ai.
Sa fiafia o ia e aoao—aemaise lava le matematika. Sa fiafia foi o ia e faitau mekasini. Sa ia susueina itulau felanulanuai. Sa ia faitau e uiga i manu ma nofoaga eseese i le salafa o le lalolagi.
I se tasi aso na faitau ai e Mikaele se ituaiga o mekasini e ese. Sa mai Le Ekalesia a Iesu Keriso o le Au Paia o Aso e Gata Ai. Sa fiafia Mikaele e faitau i ai. Sa ia manao e iloa atili.
Sa alu muamua Mikaele i isi lotu. Sa fiafia o ia e aoao e uiga ia Iesu. Ae o nisi taimi sa ia lagona le le mautonu. O le fea lotu o le lotu moni?
Mulimuli ane, sa ia faitauina se tamaitusi e uiga i le perofeta o Iosefa Samita. Sa ia lagonaina se mea faapitoa a o ia faitauina. Sa alu foi Iosefa Samita i lotu eseese e saili mo le upumoni. Atonu ou te pei o Iosefa, sa mafaufau ai Mikaele.
Sa manao Mikaele e alu i lenei lotu fou e vaai pe faapeī. Ae sa leai ni lotu a le Au Paia o Aso e Gata Ai i Initia. Sa le fiafia Mikaele. Sa ia aoaoina pea mea uma na ia mafaia. Sa ia faitau i le Tusi a Mamona ma tatalo. Na ia iloaina e moni. Sa manao o ia e papatiso. Ae e tatau ona ia faatali.
Na mavae tausaga. Ina ua 21 tausaga o Mikaele, sa o mai se ulugalii faifeautalai matutua i Initia. Mulimuli ane, sa papatisoina Mikaele! E lei umi ae mafai ona ia auauna atu i sana lava misiona i Iuta, ISA.
Na mavae nisi tausaga. I se tasi aso na valaau atu ai se uo ia te ia. Sa sailia e le Ekalesia tagata e fesoasoani e faaliliu le konafesi aoao mo tagata i Initia. Sa popole Mikaele i le taimi muamua. Ae sa fiafia o ia e fesoasoani.
I se tasi aoauli o Oketopa, sa faaliliu ai e Mikaele se saunoaga a Peresitene Nelson i le konafesi aoao. Sa ia faalogo i le perofeta o faasilasila mai o le a fausia se malumalu i Initia! Sa manao Mikaele e alaga i le olioli. Sa maligi ona loimata o le fiafia.
Sa faafetai Mikaele mo mea uma sa ia aoaoina i le aoga. Ae o le mea sili lava, sa ia faafetai sa ia aoao e uiga i le talalelei a Iesu Keriso. Sa fiafia o ia i le toatele o tagata i lona atunuu e mafai foi ona aoao e uiga ia te Ia!
E le o toe mamao ona i ai lea o se malumalu i Initia!
O Initia e silia ma le 20 gagana aloaia.
E lua misiona i Initia i aso nei.
O le meaai e fiafia i ai Mikaele o le biryani (araisa ma aano o manu e kuka i mea manogi).
O lana tala mai le tusi paia e sili ona fiafia i ai e faatatau ia Iosefa i le Feagaiga Tuai.
O le asō, ua fesoasoani Mikaele e faaliliu le konafesi aoao mo tagata i Initia.
Ata na tusia e Oriol Vidal