Ol Paeonia long Evri Ples
Michael I Lukaot Longtaem
Michael i stap tingting se wij wan Jos i tru.
Michael i sakem basket blong hem ova long solda blong hem. I fas dei blong hem long skul, mo !hem i no save wet! Hem mo famli blong hem oli stap laef long India. Plante pikinini long siti blong hem oli no bin save go long skul. Michael i talem tangkyu se hem i gat janis blong lanem samting.
Hem i laekem blong lanem samting—speseli long saed blong matematik. Hem i lavem tu blong ridim ol magasin. Hem i tanem ol kalakala pej. Hem i rid abaot ol defren animol mo ol ples raon long wol.
Wan dei Michael i ridim wan defren kaen magasin. Hem i blong Jos Ia blong Jisas Kraes blong Ol Lata-dei Sent. Michael i lavem blong ridim magasin ia. Hem i bin wantem blong save moa.
Michael i bin go long ol narafala jos bifo. Hem i laekem blong lanem abaot Jisas Kraes. Be samtaem hem i filim se hem i konfius. ?Wij jos nao i tru jos?
Samtaem afta, hem i ridim wan buklet abaot profet Josef Smit. Hem i filim wan samting i spesel taem hem i stap ridim. Josef Smit i go long ol defren jos tu blong lukaotem trutok. Maet mi mi olsem Josef, Michael i stap tingting.
Michael i wantem blong go long niufala jos ia blong luk se i olsem wanem. Be i nogat wan jos blong ol Lata-dei Sent long India. Michael i harem nogud. Hem i gohed blong lanem evri samting we hem i save lanem. Hem i ridim Buk blong Momon mo prea. !Hem i save se i tru! Hem i wantem blong kasem baptaes. Be bae hem i mas wet.
Ol yia i pas. Taem Michael i gat 21 yia, wan senia misinari kapol i kam long India. !Longtaem afta, Michael i kasem baptaes! I no longtaem, hem i bin save go long wan misin blong hemwan long Yuta, YSA.
Plante moa yia i pas. Wan dei wan fren i singaotem hem. Jos i stap lukaotem ol pipol blong help blong transletem jeneral konfrens blong ol pipol long India. Michael i fraet long fas taem. Be hem i glad blong help.
Long wan Oktoba aftenun, Michael i stap transletem wan toktok we i kam long Presiden Nelson long jeneral konfrens. !Hem i harem profet i anaonsem se bae oli bildim wan tempol long India! Michael i wantem blong singsingaot from we i glad tumas. Hem i stap krae from i glad.
Michael i glad tumas from evri samting we hem i lanem long skul. Be moa long hemia, hem i glad se hem i bin lanem abaot gospel blong Jisas Kraes. !Hem i glad se moa pipol long kantri blong hem i save lanem abaot Hem tu!
!I no longtaem bae i gat wan tempol long India!
India i gat ova long 20 ofisol lanwis.
I gat tu misin long India tedei.
Fevret kakae blong Michael i biryani (Raes mo mit we oli kukum wetem ol spaes).
Fevret skripja stori blong hem i stori blong Josef long OlTesteman.
Tedei, Michael i stap help blong transletem jeneral konfrens blong ol pipol long India.
Ol pikja droing oli kam long Oriol Vidal