Niu Skul, Niu Fren
?Olsem wanem nao Ada i save gat ol fren taem hem i no save toktok Jaenis?
“Mi mi fraet,” Ada i talem. Hem i fas dei blong hem long skul long Taewan. Be hem i no toktok Jaenis olsem ol narafala studen. ?Olsem wanem nao hem i save gat ol fren? ?Hu nao bae i pleiplei wetem hem long brek taem?
Mama i givim wan bigfala hag long Ada. “Hem i oraet blong filim fraet.”
Ada i mekem fes blong hem i nogud. “Mi no save olsem wanem blong gat ol fren long ples ia.”
Mama i givim hem wan moa bigfala hag. “Sapos yu filim se yu fraet, maet yu save tingting long wan Praemeri singsing. ?Bae hemia i save help?”
Ada i sakem hed blong hem blong agri. Afta, hem i wokbaot wetem mama i go long klas rum blong hem. Tija blong hem i stap wet long hem. “!Ni hao!” tija i talem. Ada i traem blong smael. Hem i no save se toktok ia i minim wanem.
Ada i talem tata long mama blong hem. Afta, hem i faenem wan tebol mo sidaon.
Hem i lukluk ol narafala pikinini. Sam long olgeta oli stap toktok long wanwan long olgeta. Ol narafala pikinini oli sidaon kwaet olsem Ada. Ada i fraet. Hem i filim olsem ol bi oli stap mekem noes long bel blong hem.
Afta, Ada i luk wan gel i stap krae. Ada i wantem blong helpem hem. ?Be olsem wanem nao Ada i save help taem hem i no save toktok Jaenis? ?Olsem wanem sapos gel ia i no wantem help blong hem?
Be afta, Ada i mekem wanem mama i talem. Hem i tingbaot ol toktok blong fevret Praemeri singsing blong hem: “Lavlavem man olsem Jisas i lavem yu.” Ada i save se Tabu Spirit i stap askem hem blong help.
Ada i sidaon narasaed long gel ia. Hem i putum han blong hem raon long hem. Afta i rabem bak blong hem olsem Mama i mekem long Ada taem hem i harem nogud. !Gel ia i stop blong krae! Hem i haggem bak Ada.
Ada i poenem hemwan. “Ada.”
Gel ia i poenem hemwan. “Mei,” hem i talem.
Ada i smael. Hem i sidaon wetem Mei long ful dei ia. Nomata se tufala i no toktok semmak lanwis, tufala i gat gud taem tugeta. Tufala i kakae lanj tugeta. Tufala i pleplei tugeta long brek taem. !Mo Mei i helpem Ada blong lanem ol niu toktok long Jaenis!
Hem i no save wet blong talem long Mama abaot niu fren blong hem. Hem i save se sapos i folem Jisas, bae hem i no save fraet long eni samting.
Ol pikja droing i kam long Shawna J. C. Tenney