Faeawud Resis
Profet i talem se yumi mas neva stop blong stap rere.
Leg blong Luk i purumbut strong long graon. Hem i lukluk ova long solda blong hem. !Brata blong Hem, Robert, i stap kam kolosap long hem!
“Tag! !Yu lelu!” Robert i talem.
Luke i laflaf. Hem i ronem bigfala sista blong hem, Mili.
Afta long gem, evriwan oli sidaon blong res.
“?Wanem nao bae yumi plei naoia?” Mili i askem.
Luke i glad se hem i gat ol brata mo sista we i save plei wetem olgeta. Be KOVID-19 i jenisim fulap samting. Olgeta i no save go long ol ples we i gat fulap man long hem. Mo samtaem oli no gat raet tu blong stap aotsaed.
Luke i traem blong tingting long wan gem we oli save pleiplei long hem. Afta, hem i tingbaot wan samting we hem i bin harem long Praemeri.
“Mi ting se yumi sapos blong mekem wan samting blong stap rere,” Luke i talem.
“?Yu stap minim wanem?” Mili i askem.
Luke i lukluk ol gwava tri raon long haos blong olgeta. “Profet i talem se yumi mas neva stop blong stap rere. Ating yumi save hipimap faeawud tedei. !Yumi save mekem i wan gem blong luk se huia nao i karem fulap moa!”
Luke mo ol brata mo sista blong hem oli resis i go long ol tri kolosap long haos blong olgeta. Luke i hipimap ol stik long ol han blong hem mo ron i gobak blong stakemap ol wud blong hem long selta haos. Taem ol brata mo sista blong hem oli kasem ples ia, hem i helpem olgeta blong stakemap ol wud blong olgeta tu. Oli ron i gobak mo kambak kasem we oli pikimap wan bigfala hip blong faea wod.
“!Hem ia i inaf blong save kuk wetem blong wan ful wik!” Mili i talem.
“Hem ia i naes,” Robert i talem. “!Mi laekem blong stap rere!”
“Mi tu,” Luke i talem. Hem i wantem blong mekem wan narafala samting bakegen blong stap rere.
Nekis samting, hem mo ol brata mo sista blong hem oli planem bele (wan grin vejetebol) long garen blong olgeta. Luke i katem ol stamba aot long ol olfala plant mekem se oli save planem blong i gro moa.
Taem oli stap wok, ol bubu man mo woman, mo ol papa mo mama blong olgeta oli kam aotsaed.
“?Yufala i planem bele yufala wan nomo?” Bubu man i askem.
“Yes,” Luke i talem. “!Mo mifala i karem faeawud tu!”
“Tangkyu,” Papa i talem. “Mi bin bisi gud tedei. Bae mi no bin save mekem.”
Long aftenun ia, Luke i sidaon insaed wetem famli blong hem. Oli harem oli anaonsem long redio se evriwan i mas stap insaed long haos blong fo dei blong stopem KOVID-19 blong i no go raon. Ol man oli no gat raet blong lego hom blong olgeta.
“Hem i gud se yumi kolektem faeawud tedei. Bae yumi nomo save mekem ia naoia,” Mili i talem.
Luk i smael. Hem i hapi from oli folem invitesen blong profet blong stap rere.
Ol pikja droing i kam long Shawna J. C. Tenney