Gol Ia We I Swit Moa long Evriwan
David i no save wet blong go long Dubae Tempol sam dei.
David i skwisim sam glu i go long wan blok blong suga. Mo i putum i go long wan ples.
“!Waw!” Mama i talem. “Suga-blok tempol blong yu i naes.”
“!Tangkyu!” David i talem. “Hemia i Dubae Tempol. Mi no save wet blong stret tempol we bae oli bildim.”
David i bin glad tumas stat long taem we Presiden Nelson i anaonsem wan niufala tempol long kantri we hem i stap laef long hem. Yunaeted Arab Emiret i gat sam longfala bilding we i longfala bitim ol narawan long wol. Be i nogat wan tempol—yet. Hemia bae i fas tempol long ful ples blong Medel Is.
David i stakem las suga blok i go long tempol blong hem. “!Hemia!” hem i talem. “Evri samting i finis.”
Mama i bendaon i go kolosap blong lukluk moa gud. “!Naes wok! ?Wea ples nao bae yumi putum long hem?
David i tingting. “?Olsem wanem long rum blong mi? Long saed blong ol tren blong mi.” David i lavem ol tren. Hem i wantem kam wan enjinia blong tren sam dei.
“Gudfala tingting,” Mama i talem.
David i karem suga blok tempol ia sloslo i go long rum blong hem. Hem i putum kolosap long ol defren kaen tren blong hem. Hem i no save wet blong soem long ol sista mo papa blong hem.
Long nekis dei, anti blong David, Ana i kam visit. Oli tokbaot ol samting we hem i stap lukluk fored long olgeta tumas. Afta, hem i tingbaot wan samting.
“?Yu wantem save wanem mi glad tumas moa from?”David i askem.
“! O yes!” Anti Ana i talem.
“!Jos we famli blong mi i stap go long hem i stap bildim wan tempol long Dubae!”
Anti Ana i smael. “Hemia i spesel tumas.”
“Yes hem i spesel!” David i talem. “Naoia, i nogat wan tempol blong Jos we i stap kolosap, mekem se mifala i go long tempol long Swiden o Jemani. Mi glad se bae gat wan we i stap kolosap long mifala. Mi putum wan gol blong rere blong go long hem.”
“!I gud tumas!” Anti Ana i talem. ?Wanem nao yu stap mekem blong rere from?
“Mi stap prea mo ridim ol skripja,” David i talem. “Mo mi traem blong folem Jisas Kraes. !Mo bae mi rere blong save go long tempol!”
“Hemia i gud tumas,” Anti Ana i talem. “Mi sua se bae yu wok had blong kasem ol gol blong yu.”
“!Bae mi wok had!” David i sakem hed blong agri wetem glad. Hem i gud blong serem wan samting we i impoten tumas long hem.
Long naet ia, David i askem sapos hem i save muvum suga blok tempol blong hem i go long kijin.
“Mi wantem blong kipim long wan ples we yumi save stap luk oltaem. Mi wantem blong stap tingbaot blong stap rere from tempol.”
“Hemia wan gudfala aedia,” Papa i talem. “Mi ting se blong stap luk tempol blong yu evri dei bae i helpem mi tu.”
Papa i helpem David i muvum suga blok tempol blong hem i go long kijin.
“I luk gud,” sista blong David, Kaitlynn i talem.
“?Taem bae Dubae Tempol i finis, mi save invaetem ol fren blong mi blong kam luk?” David i askem.
Mama i sakem hed blong hem blong agri. “!Hem ia i wan gudfala aedia!”
“?Mo Anti Ana?”
“O yes,” Papa i talem.
David i smael. !Hem i stap glad finis from Dubae Tempol!.
Pikja droing i kam long Mak Robison