Fevret Singsing blong Fatima
Fatima i jiamjiam folem rod. Hem i aot long skul i stap wokbaot i gobak long haos wetem Mama. Hem i stap singsing smolsmol taem hem i stap jiamjiam.
“Mis Lopez i askem mifala blong lanem wan singsing,” Fatima i talem. “?Yu save tijim wan long mi?”
Mama i smael. “!O Yes!”
Taem tufala i kasem haos, Mama mo Fatima i singsing ol singsing tugeta. Tufala i singsing fulap singsing. Be tufala i no singsing fevret singsing blong hem.
“?Mi save singsing wan Praemeri singsing?” Fatima i askem.
“Yes,” Mama i talem.
Fatima i singsing: “Ol Famli Oli Save Stap Tugeta blong Oltaem.” Hem i praktisim ol toktok blong singsing wetem Mama. Afta hem i singsing hemwan nomo. Hem i singsing kasem taem hem i save gud evri toktok blong singsing.
Long skul, Fatima i glad tumas blong serem singsing blong hem wetem klas blong hem.
“?I gat wan we i wantem serem singsing blong olgeta?” Mis Lopez i talem.
Fatima i leftemap han blong hem. “!Bae mi mekem!”
Hem i stanap mo smael. “Mi gat wan famli long wol ia. Oli gud tumas long mi,” hem i singsing.
Taem hem i stap singsing, Fatima i filim glad. !Mo hem i tingbaot fulwan singsing ia! Evriwan long klas blong hem oli klapem han.
Afta long klas, Mama i kam blong pikimap Fatima. Mis Lopez i toktok wetem Mama.
“Hem i singim wan naesfala singsing. Mo hem i no bin fraet nating.”
Fatima i smael. Mama tu i smael.
“!Mifala i singim ol naesfala singsing evri wik long Jos!” Fatima i talem.
“Yu save kam wetem mifala eni taem,” Mama i talem.
Mis Lopez i smael. “Tangkyu”.
Fatima i singsing taem hem i stap wokbaot i gobak long haos wetem Mama. Hem i bin laekem blong serem wan singsing wetem klas blong hem. Blong stap singsing i mekem hem i glad.
Ol pikja droing oli kam long Alessia Girasole