Վառելափայտ հավաքելու մրցույթ
Մարգարեն ասել է, որ մենք երբեք չպետք է դադարենք նախապատրաստվել:
Լյուկը ամբողջ ուժով վազում էր։ Նա հետ նայեց։ Նրա եղբայրը՝ Ռոբերտը, հասնում էր իրեն:
«Բռնվեցի՛ր: Հիմա դու ես բռնողը»,- ասաց Ռոբերտը:
Լյուկը ծիծաղեց: Նա վազեց ավագ քրոջ՝ Միլիի հետևից, որ բռնի նրան։
Խաղից հետո բոլորը նստեցին հանգստանալու։
«Ի՞նչ խաղ կարող ենք խաղալ հիմա»,- hարցրեց Միլին:
Լյուկը ուրախ էր, որ քույրեր ու եղբայրներ ունի, որոնց հետ կարող է խաղալ: Բայց COVID-19-ը շատ բան փոխեց: Նրանք չէին կարող գնալ մարդաշատ վայրեր: Երբեմն նրանց նույնիսկ թույլ չէին տալիս դրսում գտնվել:
Լյուկը փորձեց մի խաղ մտածել, որը նրանք կարող էին խաղալ: Հետո նա մտածեց մի բանի մասին, որը լսել էր Երեխաների միությունում:
«Կարծում եմ, որ մենք պետք է ինչ-որ բան անենք, որպեսզի նախապատրաստվենք»,- ասաց Լյուկը:
«Ի՞նչ նկատի ունես»,- hարցրեց Միլին:
Լյուկը նայեց իրենց տան շուրջը գտնվող գուավայի ծառերին։ «Մարգարեն ասել է, որ մենք երբեք չպետք է դադարենք նախապատրաստվել: Գուցե այսօր վառելափայտ հավաքենք։ Մենք կարող ենք դա խաղ դարձնել. տեսնենք, թե ով ամենաշատ վառելափայտը կհավաքի»:
Լյուկը, իր քույրերն ու եղբայրները վազեցին դեպի իրենց տան մոտ գտնվող ծառերը: Լյուկը փայտեր դիզեց իր գրկում և հետ վազեց՝ փայտը ցախանոցում շարելու համար։ Երբ նրա քույրերն ու եղբայրները հասան ցախանոց, նա նրանց նույնպես օգնեց շարել իրենց բերած փայտը: Նրանք վազում էին հետ ու առաջ, մինչև հավաքեցին վառելափայտի մի հսկայական կույտ:
«Սա բավական է մի ամբողջ շաբաթ կերակուր պատրաստելու համար»,- ասաց Միլին:
«Փայտ հավաքելը զվարճալի էր»,- ասաց Ռոբերտը: «Ինձ դուր է գալիս, երբ նախապատրաստված եմ»:
«Ինձ նույնպես», - ասաց Լյուկը Նա ուզում էր էլի ինչ-որ բան անել նախապատրաստվելու համար:
Այնուհետև Լյուկը և իր քույրերն ու եղբայրները իրենց այգում տնկեցին բելե (կանաչ բանջարեղեն): Լյուկը ցողուններ կտրեց հին բույսերից, որպեսզի տնկեն դրանք և նոր բույսեր աճեցնեն:
Մինչ նրանք աշխատում էին, տատիկը, պապիկը և ծնողները դուրս եկան։
«Դուք ինքնուրո՞ւյն եք բելե տնկել»,- հարցրեց պապիկը:
«Այո»,- ասաց Լյուկը: «Մենք նաև վառելափայտ ենք հավաքել»:
«Շնորհակալ եմ»,- ասաց հայրիկը: «Այսօր ես իսկապես զբաղված էի: Ես չէի կարողանա դա անել»:
Կեսօրին Լյուկը նստած էր տանը՝ իր ընտանիքի հետ: Նրանք ռադիոյով հայտարարություն լսեցին, որ բոլորը պետք է չորս օր մնան տանը՝ COVID-19-ի տարածումը դադարեցնելու համար։ Ոչ ոքի թույլ չէր տրվում դուրս գալ տնից։
«Լավ է, որ այսօր վառելափայտ հավաքեցինք: Հիմա մենք չէինք կարողանա դա անել»,- ասաց Միլին:
Լյուկը ժպտաց: Նա ուրախ էր, որ իրենք հետևել էին մարգարեի՝ նախապատրաստվելու առաջարկին:
Նկարները՝ Շոնա Ջ. Ք. Թեննեյի