Mga Higala sa Kamping
Sa sinugdanan, si Edison mibati nga daw wala siya nahisakop.
Si Edison nagpatid-patid lang sa yuta. Ang tanang mga batang lalaki nag-istoryahanay ug nagpabarog sa mga tulda. Apan siya walay nailhan bisan usa.
Ang pamilya ni Edison taudtaud nang mihunong sa pag-adto sa simbahan human sila mibalhin ngadto sa Spain. Apan ang mga batang lalaki gikan sa ward misuroy ug midapit kaniya sa pagkuyog sa kamping trip. Ang magkamping makalingaw pamation, apan karon si Edison dili sigurado kon gusto ba gayod siya moanhi pagkahuman sa tanan. Mibati siya nga wala siya mahisakop.
Duha ka batang lalaki, si Diego ug si Juan, miduol kang Edison. “Gusto ba nimo moapil sa among tulda?” Nangutana si Diego.
Nanghupaw si Edison ug mipahiyom. “Sige.”
“Nindot!” miingon si Juan. “Ug dayon mag-swimming ta.”
Ang mga batang lalaki [Diego, Juan ug Edison] nagpabarog sa ilang tulda ug midagan ngadto sa suba. Ang tubig bugnaw, apan karon si Edison nalingaw kaayo nga wala gayod siya nakamatngon. Human sa paniudto, ang mga batang lalaki ug ang mga lider nanlakaw. Nabalik sila igo lang nga misugod na sa pagsalop ang adlaw, busa mitabang sila sa paghaling og daob alang sa kamping [campfire].
“Kumusta ang imong pamilya?” Nangutana si Juan.
Gisugnod ni Edison ang usa ka pundok nga sanga diha sa kalayo. “Ang akong mga ginikanan medyo maayo man. Ug ang akong igsoong babaye mao ang akong suod nga higala. Mibalhin kami dinhi gikan sa Ecuador.”
Si Diego ug si Juan nagtinan-away sa usag usa inubanan sa dakong pahiyom.
“Gikan man sab mi sa Ecuador!” Miingon si Juan.
Giabli ni Diego ang zipper sa iyang jacket aron ipakita ang iyang T-shirt. Aduna kini simbolo sa soccer team sa Ecuador!
“Wow!” Miingon si Edison. “Unya unsa man ang kasagaran ninyong gikamingawan sa Ecuador?”
Si Diego ug si Juan nangatawa. “Ang pagkaon!” misinggit silang duha.
Ang mga batang lalaki nagpadayon og istoryahanay kabahin sa unsay ilang gikamingawan sa Ecuador ug unsay ilang nagustohan kabahin sa pagpuyo sa Spain. Si Edison giganahan nga sayon ra kaayong ikaistorya sila si Diego ug si Juan.
Dayon usa sa mga lider, si Brother Cisneros, mibarog. “Paminaw mong tanan! Kami gustong motapos sa kagabhion sa usa ka panagtigom sa pagpamatuod.”
Tagsa tagsa, ang mga batang lalaki mibarog ug mipaambit sa ilang mga pagpamatuod. Ang ilang mga pulong nakapahimo sa kasingkasing ni Edison nga mobati og daw gibukotan sa mainit nga habol.
Mibarog si Diego. “Ako nasayod nga ang Simbahan tinuod. Ako nasayod nga ang Dios mao ang akong Amahan ug nga si Jesukristo ang akong Manluluwas.”
Ang init nga pagbati mianam og kakusog. Gusto usab ko nga masayod niana, naghunahuna si Edison.
Sa dihang nauli na si Edison gikan sa biyahe, ang mga pulong ni Diego nagpabilin sa iyang hunahuna. Nanghinaot siya nga makaadto siya sa simbahan ug magkat-on kabahin ni Jesus uban ni Diego ug ni Juan.
Nianang gabhiona sa panihapon, si Papá nangutana, “Kumusta man ang kamping trip?”
“Nindot kaayo kadto!” Miingon si Edison. “Nanlangoy mi ug nanlakaw [hike] ug nagdaob og kalayo. Nakahigala pa gani ko og duha nga gikan usab sa Ecuador!”
“Kanindot gud niana! Ato silang dapiton nga moanhi,” miingon si Mamá.
Mihunong si Edison. “Mahimo ba nga magsugod ta og adto na usab sa simbahan?”
Si Mamá ug Papá wala mosulti og bisan unsa sulod sa pila ka gutlo. Dayon si Mamá miigham. “Kon gusto ka moadto, maayo ra kana,” miingon siya. “Apan si Papá ug ako dili moadto.”
Nahugno si Edison sa iyang lingkoranan. Dili siya gusto nga moadto sa simbahan nga mag-inusara. Tingali magpabilin nalang siya sa balay uban sa iyang pamilya.
Dayon si Edison nahinumdom sa init nga pagbati gikan sa panagtigom sa pagpamatuod. Bisan kon ang iyang pamilya dili gusto nga moadto sa simbahan, si Edison gusto nga moadto.
Gawas pa, siya dili man mag-inusara. Mipahiyom si Edison samtang siya mikaon sa iyang panihapon. Dayon iyang gitubag ang phone. Nasayod siya nga pipila ka higala mahimo niyang ikauban sa simbahan!
Paghulagway pinaagi ni Hollie Hibbert