Mga Sagbot ug mga Dautan nga mga Pulong
“Hain may maayo kon kita maghimo og usa ka saad sa pamilya?” Nangutana si Mama.
“Mahimo ba nga mag-istorya ta?” Nangutana si Jonas ni Mama. Siya milingkod sa sagbot tupad kon diin si Mama nangibot og sagbot sa mga bulak.
“Sige. Unsa may nahitabo?” Nangutana si Mama. Iyang gitangtang ang iyang hugaw nga gwantes pangharden.
“Karong adlawa ba sa eskwelahan ang uban nga mga bata nagsulti og mga pulong nga wala ko kahibalo. Mangatawa sila kon ila kining isulti,” miingon si Jonas. “Nagtuo ko nga dautan kadto nga pulong.”
“Unsa man imong gibati sa dihang nakadungog ka sa pulong?” nangutana si Mama.
“Dili maayo ang akong gibati niini.”
Si Jonas mihunghong sa pulong ngadto ni Mama. Gisultihan siya ni mama unsa ang gipasabot niini. Husto si Jonas. Dili kadto nindot nga pulong.
“Apan nganong dautan man kini?” nangutana siya.
“Dautan kini tungod kay kini dili mabination ug walay pagtahod. Kon kita mogamit og mga pulong sama niana, makapahimo niining lisod alang sa Espiritu Santo sa pag-uban kanato. Ang Espiritu Santo nagsulti nimo nga dautan kadto. Mao kana nganong dili maayo ang imong gibati.”
Mimug-ot si Jonas. “Apan ang uban nga mga bata ingon og nalingaw. Nganong ako lang usa ang mibati nga dili komportable?”
“Giunsa man nimo pagkahibalo nga ang uban nga mga bata wala mobati sa samang paagi?” Nangutana si Mama.
“Tungod kay silang tanan nangatawa ug mipahiyom kon adunay usa ka tawo nga mosulti sa pulong.” Mibati si Jonas og kalibog.
“Usahay ang mga tawo mokatawa o mopahiyom kon sila dili komportable,” miingon si Mama. “Ug usahay kon sila makadungog o mosulti og dautan nga pulong sa makadaghan, dili na sila manumbaling niini. Apan dili lang kini gihapon husto nga isulti. Mura kini og sama niining mga sagbot. Ako kining gipang-ibot aron magpabilin nga limpyo ang harden ug ang maayo nga mga tanom motubo.”
“Nalipay ko nga wala nako gisulti ang maong pulong,” miingon si Jonas.
“Ako pud,” miingon si Mama. “Ako mapasigarbo hon kanimo. Ug ako adunay ideya. Hain may maayo kon kita maghimo og usa ka saad sa pamilya?”
“Unsa nga matang?” Nangutana si Jonas.
“Mosaad ta sa paggamit lang sa mga maayo nga mga pulong ug dili ang dautan nga mga pulong. Kini mahimong usa ka panaad sa pamilya.”
Ganahan si Jonas niana nga ideya. Siya ug si Mama naglamanohay. Nindot ang pamati ni Jonas kabahin sa saad nga iyang gihimo ngadto ni Mama.
“Karon, hain may maayo kon mosaad ka sa pagtabang nako sa paghuman niining pagpangibot og sagbot?” Nangutana si Mama. “Dayon mosaad ko nimo nga dalhon ka nako ngadto sa parke.”
Mingisi si Jonas ug mipunit sa palita. “Usa kini ka kasabotan.”
Samtang siya mitabang ni Mama, si Jonas mibati og mas arang-arang. Siya nasayod nga ang pagsaad nga dili mogamit og dautan nga mga pulong mao ang usa ka maayong pagpili alang sa ilang pamilya.
Paghulagway pinaagi ni Dan Widdowson