Ang mga Pioneer sa Matag Yuta
Si Moisés ug ang Pesos
“Makabayad ba usab ako sa akong ikapulo?”
Giablihan ni Moisés ang gate ug misulod ngadto sa tindahan sa mga piyesa sa sakyanan. Humana ang eskwelahan, ug panahon na aron motabang ni Papá sa trabaho. Gikuha ni Moisés ang silhig ug misugod sa pagpanilhig. Ganahan siya motabang ni Papá. Gani makakwarta pa siya.
Sa wala madugay panahon na ni Moisés aron mobiya. Nanamilit siya ngadto ni Papá ug misugod sa paglakaw paingon sa balay. Mibati siya og kaguol samtang siya milakaw. Kanunayng lain ang pamation kon mopauli nga wala si Papá. Ang mga ginikanan ni Moisés nagkabulag. Siya ug ang iyang pito ka igsoon nagpuyo uban ni Mamá. Si Papá nagpuyo sa laing dapit. Nagtrabaho si Mamá og tulo ka lain laing trabaho tungod kay sila walay daghang kwarta. Lisod kaayo kadto alang kanilang tanan.
Usa ka adlaw adunay nanuktok sa pultahan. Duha kadto ka misyonaryo. Mipaambit sila og mensahe kabahin ni Jesukristo. Nagtudlo usab sila mahitungod sa usa ka propeta nga ginganlan og Joseph Smith. Adunay gibati si Moisés nga espesyal nga butang samtang siya naminaw.
Ang mga misyonaryo nagpadayon sa pagbalik aron sa pagtudlo ni Moisés, ni Mamá, ug pipila sa iyang mga igsoon. Si Moisés ug ang iyang pamilya misugod sa pag-adto sa simbahan. Mibasa sila sa Basahon ni Mormon. Mihunong sila sa pag-inom og kape. Gani mipili pa sila nga magpabunyag!
Nakat-onan ni Moisés nga gimahal siya sa Langitnong Amahan. Ug bisan og ang mga butang lisod gihapon alang sa iyang pamilya, siya mibati og dugang nga kahupay ug kalinaw.
Usa ka gabii si Moisés nadugay pag-abot gikan sa shop ni Papá. Si mama naglingkod sa lamesa. Guol kaayo siyang tan-awon.
“OK ra ba ang tanan?” Nangutana si Moisés.
Nanghupaw si Mamá. “Oo, kitang tanan mamaayo ra.” Mihatag siya ni Moisés og hilaw nga pahiyom. “Apiki kaayo ang kwarta karong bulana. Nabalaka ko nga dili kita makabayad og ikapulo.”
Nahinumdom si Moisés sa unsay gitudlo sa mga misyonaryo kanila mahitungod sa ikapulo. Miingon sila nga ang paghatag og 10 porsyento sa imong kwarta ngadto sa Dios aron sa pagtabang nga mahimo ang Iyang buhat.
Mibutang si Mamá og pipila ka pesos sa usa ka sobre ug gisilyohan kini. “Kini sagrado nga kwarta,” miingon siya [Mama]. “Kita kinahanglang mobayad sa atong ikapulo.”
Si Moisés naghunahuna kabahin sa mga pesos nga iyang kinitaan sa shop sa sakyanan. Siya mikuot niini sa iyang bulsa. “Makabayad ba usab ako sa akong ikapulo?”
Mipahiyom si Mamá. “Siyempre makahimo ka.”
Human niana si Moisés kanunayng mobayad sa iyang ikapulo. Usahay lisod kadto. Apan si Moisés adunay hugot nga pagtuo. Siya usa ka pioneer! Nagpadayon siya sa pagbayad sa iyang ikapulo, ug ang iyang pamilya kanunayng adunay paigo. Mapasalamaton si Moisés sa mga paagi nga ang Langitnong Amahan mipanalangin kaniya alang sa iyang pagkamasulondon.
Ang Mexico adunay mas daghang makasulti og Spanish kay sa bisan asang nasod.
Ang kinagamyan nga iro sa kalibotan, ang chihuahua, orihinal nga naggikan sa Mexico.
Ang unang templo sa Mexico natukod niadtong 1983, sa dihang si Moisés usa pa ka tin-edyer.
Sa dihang bata pa siya, si Moisés ganahang magdula og volleyball.
Si Elder Villanueva ug ang iyang asawa, si Leticia, adunay tulo ka anak.
Karon, si Elder Moises Villanueva nagserbisyo isip usa ka General Authority Seventy.
Mga paghulagway pinaagi ni Kelly Smith