Dali, Sunod Kanako nga mga Kalihokan
Alang sa home evening [gabii sa pamilya], pagtuon sa kasulatan, o kalingawan lamang!
Mabination nga mga Kasingkasing
Alang sa Mga Panultihon 1–4; 15–16; 22; 31; Ecclesiastes 1–3; 11–12
Istorya: Ang Mga Panultihon usa ka basahon sa maalamon nga mga panultihon. Usa ka panultihon nagsulti nga “salig sa Ginoo sa bug-os mong kasingkasing” (Mga Panultihon 3:5). Laing panultihon nagsulti nga “ang malumong tubag mohupay sa kasuko” (Mga Panultihon 15:1).
Awit: “Pagkamabination Magsugod Kanako” (Songbook sa mga Bata, 83)
Kalihokan: Sa pahina 40 basaha ang mahitungod sa paggamit og mabination nga mga pulong. Dayon paggunting og pipila ka papel nga mga kasingkasing ug sulati kini og mubo nga mabinationg mga sulat o makatabang nga mga panultihon aron ihatag ngadto sa uban. Mahimo gani ninyong tagoan ang mga kasingkasing aron pangitaon sa uban!
Bukid sa Ginoo
Alang sa Isaias 1–12
Istorya: Si Isaias usa ka propeta. Gitawag niya ang templo nga “bukid sa Ginoo” (Isaias 2:3). Miingon siya nga kita makakat-on mahitungod ni Jesukristo diha sa templo.
Awit: “Gusto Ko nga Makita ang Templo” (Songbook sa mga Bata, 99)
Kalihokan: Makatag-an ba kamo kon pila ka templo ang anaa sa kalibotan? Adto sa temples.ChurchofJesusChrist.org aron pangitaon ang tubag. Kang kinsa nga tag-an ang kinaduolan? Pagdrowing o pagpinta og hulagway sa usa sa mga templo.
Mga Panalangin gikan ni Jesus
Alang sa Isaias 13–14; 24–30; 35
Istorya: Si Isaias mitudlo nga si Jesukristo mopanalangin niadtong kinsa mosunod Kaniya. Makabasa kamo og dugang pa bahin sa unsay gitudlo ni Isaias diha sa pahina 8.
Awit: “Mokuyog Ko ni Jesus” (Peb. 2020 Higala ug Liahona)
Kalihokan: Pagpuli-puli sa pagpangita sa mga kasulatan aron sa pagdula sa pares-pares nga dula diha sa pahina 12. Sa unsang paagi si Jesus nakatabang kanimo?
Mga Balod sa Dagat
Alang sa Isaias 40–49
Istorya: Si Isaias nagtudlo nga kon kita motuman sa mga sugo, kita makabaton og kalinaw sama sa usa ka suba ug “pagkamatarong sama sa mga balod sa dagat” (Isaias 48:18).
Awit: “Sunda ang Kasugoan” (Songbook sa mga Bata, 68–69)
Kalihokan: Paghimo og inyong kaugalingon nga “mga balod sa dagat”! Pun-a ang basiyo nga botelya o garapon og katunga sa tubig ug himoa kining asul gamit ang pangkolor sa pagkaon. Pun-a ang nahibilin og mantika. Hugta pagsirado ang taklob. Dayon hinay-hinaya sa pagtakilid-takilid ang botelya aron tan-awon ang mga balod! Sa unsang paagi ang pagsunod sa kasugoan motabang kaninyo nga mobati og kalinaw?
Tago-Tagoan
Alang sa Isaias 50–57
Istorya: Si Isaias mitudlo, “Dangop sa Ginoo” (Isaias 55:6). Kana nagpasabot nga kita kinahanglang mag-ampo, mosunod sa kasugoan, ug magkat-on mahitungod sa ebanghelyo. Kini makatabang kanato nga mobati nga mas duol kang Jesukristo.
Awit: “Sayo kong Mangita sa Ginoo” (Songbook sa mga Bata, 67)
Kalihokan: Pagpili og usa ka tawo nga mahimong tigpangita. Samtang nagpiyong siya, tagoi ang usa ka hulagway ni Jesus. Hinay nga kantaha ang usa ka awit sa Primary samtang ang tigpangita mangita sa hulagway. Kon magkaduol na siya, anam-anama og kakusog ang pagkanta hangtod nga makit-an niya kini. Pagpuli-puli nga mahimong tigpangita. Sa unsang paagi nga inyong mapangita si Jesukristo?
Mga paghulagway pinaagi ni Katy Dockrill