Tag-ana Kinsay Nahigugma Kanimo, Mrs. Banks!
Nagsugod kining tanan sa usa ka bulak …
Ganahan magtan-aw si Roxy sa tanang balay diha sa iyang kasilinganan samtang maglakaw siya pauli gikan sa eskwelahan. Ang usa ka balay adunay iro nga mamaghot ug mag-ambak-ambak diha sa bentana. Ang laing balay adunay mga langgam nga nagtuwit-tuwit diha sa mga kahoy.
Ug dayon mao ang balay ni Mrs. Banks. Si Mrs. Banks mao ang iyang magtutudlo sa grade three, ug siya mao ang paborito ni Roxy. Kanunayng mokaway si Roxy kang Mrs. Banks kon makita niya siya nga maglingkod sa lingkoranan diha sa iyang atubangan nga balkon. Kanunayng mahigalaon ug malipayon si Mrs. Banks.
Apan karon walay naglingkod sa lingkoran diha sa balkon. Ingon og hilom ang balay. Bisan ang iring ni Mrs. Banks, si Chester, wala pod.
Nakahinumdom si Roxy sa gisulti sa iyang mama nga nasakit si Mrs. Banks. Nag-adtoan siya [Mrs. Banks] sa ospital kada adlaw alang sa mga pagpatambal. Naguol si Roxy. Gusto siya nga mobuhat og nindot nga butang alang kang Mrs. Banks. Apan unsa man?
Mitan-aw sa palibot si Roxy diha sa mga buyog nga nanglupad gikan sa usa ka bulak ngadto sa laing bulak. Dayon nakaideya siya!
Midagan pauli si Roxy ug mikuha og usa ka rosas gikan sa iyang hardin. Mibalik siya ngadto sa balay ni Mrs. Banks ug gibutang kini diha sa atubangan nga balkon.
Pagkasunod adlaw si Roxy mibutang og mirasol [sunflower] diha sa lingkoranan ni Mrs. Banks. Ug sa adlaw pagkahuman niana, mibutang siya og daisy diha sa iyang atubangan nga pultahan. Matag adlaw sulod sa duha ka semana, mibilin si Roxy og bulak para kang Mrs. Banks. Nagmainampingon siya nga dili makit-an.
Usa ka adlaw sa iyang pagpauli, nakit-an ni Roxy si Mrs. Banks nga naglingkod diha sa atubangan nga balkon. Naggunit siya og pipila ka bulak diha sa iyang kamot.
“Roxy,” miingon si Mrs. Banks, “tan-awa ang akong matahom nga mga bulak. Adunay tawo nga nagbilin niini alang kanako. Matag adlaw usa ka bag-o nga bulak ang naghulat kanako sa akong pagpauli gikan sa ospital.”
Mipahiyom si Roxy. “Nakaila ka ba kon si kinsa kadto?”
Mipahiyom og balik si Mrs. Banks. “Bisan si kinsa pa kadto, ganahan kong magpasalamat kanila.”
“Tingali usa kadto ka tawo nga nahigugma kanimo!” Miingon si Roxy.
“Kon mao, nagpaabot ko nga makakita og bag-o nga bulak matag adlaw,” miingon si Mrs. Banks. “Ang unang bulak anaa sa akong balkon.”
“Sa imo bang hunahuna ang imong iring ang nagbilin niini?” Nangutana si Roxy.
“Si Chester ganahan nga mobilin og mga sopresa para nako, apan wala pa gayod siya mibilin og mga bulak.” Mikatawa si Mrs. Banks. “Unsa man sab tong bulak sa akong lingkoranan?”
“Ang iro didto sa dalan?” Mas midako ang pahiyom ni Roxy.
“Didto sa akong atubangan nga pultahan?”
“Usa ka squirrel?”
“Hala no,” miingon si Mrs. Banks, nga nagkatawa. “Wala ko nakaamgo nga dunay daghan kaayong mga binuhat nga nahigugma kanako! Apan ang mga bulak mitabang gayod nako nga mobati nga espesyal.”
Malipayon gayod kaayo si Roxy. Nalipay siya nga nakatabang siya nga mipahiyom pag-usab si Mrs. Banks.
Paghulagway pinaagi sa Adobe Stock