Lahi apan Wala Mag-inusara
Usahay mingaw ang pagkahimong bugtong nga miyembro sa Simbahan.
Brrrrring! Mibagting ang kampanilya sa kataposang klase sa adlaw. Karon nga si Megan anaa sa hayskol, mitambong siya sa lainlaing klase atol sa adlaw. Ug adunay daghan kaayong kat-onan. Nalipay si Megan nga ang iyang kataposang klase mao ang oras sa pagtuon. Kana nagpasabot nga makasugod siya sa iyang homework.
Mipahiluna si Megan diha sa bakante nga lamesa. Usa ka batang lalaki nga ginganlan og Bennett ang miduol kaniya.
“Oy, Megan, Mormon ka, di ba?”
“Ako usa ka miyembro sa Ang Simbahan ni Jesukristo sa mga Santos sa Ulahing mga Adlaw,” miingon si Megan.
“Busa, nagtuo ka nga si Joseph Smith misulat sa Basahon ni Mormon o sa usa ka butang, sakto ba?” Nangutana si Bennett.
Mihimo si Megan og dali, hilom nga pag-ampo aron mahibalo kon unsaon sa pagtubag. “Gihubad niya ang Basahon ni Mormon,” miingon siya. “Gitawag siya sa Dios isip usa ka propeta aron sa pagtabang sa pagpahiuli sa Simbahan ni Kristo.”
Gikunot ni Bennett ang iyang ilong. “Binuang kana,” miingon siya. Mikatawa siya ug mipalayo.
Nanginit ang pamati sa nawong ni Megan. Mitutok siya sa iyang libro.
“Oy, Megan.”
Unsa naman pod? Mihangad si Megan. “Aw. Kumusta, Taj.”
“Pasensya kabahin kang Bennett,” miingon si Taj. Milingkod siya sa atubangan niya. “Ingon og ang unsay imong gisulti importante alang kanimo.”
“Salamat,” miingon si Megan. “Importante gayod.”
“Murag nakahibalo ko sa unsay imong gibati,” miingon si Taj. “Ako lamang ang Hindu sa eskwelahan. Lisod kon ang mga tawo dili mosulay sa pagsabot sa imong mga tinuohan.”
Usahay si Megan mibati nga nag-inusara isip ang bugtong nga miyembro sa Ang Simbahan ni Jesukristo sa mga Santos sa Ulahing mga Adlaw sa ilang eskwelahan. Apan wala gayod siya naghunahuna nga ang ubang mga bata mobati usab niana nga paagi.
“Ang akong mga ginikanan miingon nga kon dili buotan ang usa ka tawo tungod kini kay wala siya mibati nga malipayon sa iyang kaugalingon,” miingon si Megan. Gipatuyok-tuyok niya ang usa ka lapis diha sa iyang mga tudlo. “Naghunahuna ko kon masulub-on ba si Bennett. O nag-inusara.”
Gitakilid ni Taj ang iyang ulo. “Nagtuo ko nga husto ka. Tingali nagkinahanglan siya og higala.”
Mipahiyom si Megan. “Tingali nagkinahanglan siya og duha!”
Pagkasunod adlaw atol sa panahon sa pagtuon, nakit-an ni Megan ug Taj nga nag-inusarang naglingkod si Bennett diha sa usa ka lamesa.
“Kumusta, Bennett,” miingon si Taj.
Nasorpresa si Bennett. “Kumusta.”
“Unsa ang imong gibuhat?” Nangutana si Megan, nga milingkod diha sa usa ka lingkoranan.
“Kasaysayan.”
“Alang sa pasulit ugma?” Milingkod usab si Taj.
“Oo,” miingon si Bennett.
“Daghan kaayo og angayng hinumdoman,” miingon si Taj. Mitando si Bennett.
“Tingali makapangutana kita sa usag usa.” Giablihan ni Megan ang iyang libro sa kasaysayan. Nagpuli-puli sila sa pagpangutana ug pagtubag sa mga pangutana hangtod mibagting ang kampanilya.
“Oy, Megan, pasayloa ko kabahin gahapon,” miingon si Bennett samtang mibarog sila aron molakaw na. “Nakadungog ko og pipila ka butang mahitungod sa imong simbahan ug nakuryoso.” Nagtikang-tikang siya sa iyang tiil. “Nagtuo ko sa nagkalainlaing butang, apan mas nagbinuotan unta ko.”
Mipahiyom si Megan. “Salamat. Importante kanako ang akong simbahan, apan OK ra kon nagtuo kita sa nagkalainlaing butang.”
“Nagtuo ko nga mahimo kitang maayo nga grupo sa pagtuon bisan og kita adunay nagkalainlaing tinuohan,” miingon si Taj.
Mipahiyom si Bennett. “Ako sab. Ug nagtuo ko nga maayo kitang makatubag niana nga pasulit.”
Mga paghulagway pinaagi ni Mark Robison