Imong Sinulat

Ginagmayng mga Butang Makahimo og Kalainan!

Jed L., edad 9, Ilocos Norte, Philippines

Ako ang kinagamyan sa eskwelahan. Usahay mangandoy ko nga taas ko sama sa akong mga kauban sa klase. Apan ang akong mama nagsulti nako nga ang akong mga maayong pamatasan mas labaw pa kaimportante kay sa akong gitas-on, ug ako makahimo og daghang butang bisan og ako mas gamay kay sa akong mga kauban sa klase.

Kon adunay butang nga mawala nako o kon ako mahadlok, akong hunongon unsay akong gibuhat ug mag-ampo. Ang Langitnong Amahan motubag sa akong mga pag-ampo.

Ako motabang sa akong mga ig-agaw ug sa uban nga mga bata sa pagtuon sa math, English, ug sa pagsulat. Ako motabang sa mga buluhaton sa panimalay. Ako moatiman sa akong binuhing mga hayop. Magdrowing ko og buhat sa art ug mosulat alang sa mga misyonaryo. Kon ako mopalit o makabaton og butang nga bag-o, ako kining ipakigbahin sa uban. Kon akong makita ang mga tawo nga nanginahanglan diha sa kadalanan, ako mohatag unsay akong mahatag, ug ako nag-ampo alang kanila sa matag adlaw.

Sa bata pa ako, gisugdan na ko pagbasa ni Mama og basahon. Gibasa namo ang mga istorya sa Basahon ni Mormon, mga istorya diha sa Biblia, ug ang Higala nga magasin. Karon, bisan og ako nuybe anyos na, iya gihapon ko nga basahan og basahon. Dili ko makatulog gawas kon basahan ko ni mama. Apan karon pipila ka mga gabii akong basahan si Mama hangtod siya makatulog.

Akong buhaton kining yano nga mga butang bisan gamay pa ko. Ako nasayod nga gimahal sa Langitnong Amahan ug ni Jesukristo ang gagmayng mga bata. Nasayod ko nga Sila nagmahal kanako. Gimahal ko usab Sila. Ang akong pangandoy mao ang mahimong usa ka misyonaryo aron ako makahimo og mas daghang ginagmayng butang nga makahimo og dakong kalainan.

Mga paghulagway pinaagi ni Adam Koford