Te mau hoa nō te pūhapara’a
I te ha’amatara’a, ’ua mana’o Edison e ’ere ’oia nō roto ia rātou.
’Ua tu’e Edison i te repo. Pauroa te tahi atu mau tamāroa, tē paraparau ra ’e tē ha’amau ra i te mau ti’ahapa. ’Aita rā ’oia i mātau i te hō’ē noa a’e.
’Ua fa’aea te ’utuāfare o Edison i te haere i te purera’a, tau taime iti noa i muri a’e i tō rātou revara’a i te fenua Paniora. I muri iho rā, haere mai nei te mau tamāroa o te pāroita, ’e ’ua ani iāna ’ia haere mai i te tere pūhapara’a. E au ra e mea ’ārearea te pūhapara’a, i teienei rā ’aita Edison i pāpū ē, e hina’aro ānei ’oia e haere mai i’ō nei. ’Ua mana’o ’oia e ’ere ’oia nō rātou.
’Ua ha’afātata atu e piti tamāroa, ’o Diego ’e ’o Juan, ia Edison. « Hina’aro ānei ’oe e haere mai i roto i tō māua fare ’ie ? », ’ua ani Diego.
’Ua mapu a’era Edison i te aho ma te mata ’ata’ata. « Nā reira ».
« ’Aita atu ai ! parau a’era Juan « ’E i muri iho, e nehenehe tātou e haere e ’au ».
Ha’amau a’era te mau tamāroa i tō rātou ti’ahapa ’e horo atu ra i te ’ānāvai. E mea to’eto’e ho’i te pape, nō te ’ārearea ’aita Edison i tau’a maita’i i te reira. I muri a’e i te tāmā’ara’a avatea, ’ua haere te mau tamāroa ’e te feiā fa’atere e pa’i’uma nā te mou’a. ’Ua ho’i mai rātou i te taime ’a ha’amata ai te mahana i te topa, i reira ’ua tauturu rātou i te fa’a’amara’a i te auahi nō te pūhapara’a.
« Mai te aha tō ’oe ’utuāfare ? ’ua ui atu Juan.
Taora atu ra Edison i te hō’ē ha’apu’e ’āma’a rā’au iti i roto i te auahi. « E mea maita’i roa tō’u nā metua. ’E tō’u tuahine ’o tō’u ïa hoa rahi roa a’e. ’Ua haere mai mātou i’ō nei mai te fenua Ētuatōria mai.
’Ua hi’o Diego ’e ’o Juan i te tahi ’e te tahi ma te mata ’ata’ata.
« Nō te fenua Ētuatōria ato’a mātou ! » ’Ua parau Juan
Tātara a’era Diego i tōna hutira’a pereue nō te fa’a’ite i tōna piriaro. Tē vai ra te tāpa’o nō te pupu tu’e pōpō nō te fenua Ētuatōria i ni’a !
« ’Auē te au ē ! Nā ’ō a’era Edison, E aha te mea tā ’ōrua e mihi rahi nei i te fenua Ētuatōria ? »
’Ua Diego ’e ’o Juan. « Te mā’a ! », to’opiti ato’a rāua i te tuōra’a.
’Ua tāmau noa te mau tamāroa i te paraparau nō ni’a i te mea tā rātou e mihi nei i fenua Ētuatōria, ’e te mea tā rātou e au nei i te fenua Pāniora. ’Ua au roa Edison i te huru ’ōhie ’ia paraparau ia Diego ’e ia Juan.
I muri iho, ti’a mai ra te hō’ē ta’ata fa’atere, te taea’e Cisneros. « ’Ia ora na, tātou pā’āto’a ! Tē hina’aro nei mātou e ’ōpani i teie ’āru’i, nā roto i te hō’ē rurura’a fa’a’itera’a i te ’itera’a pāpū ».
Hō’ē i muri mai i te hō’ē, ’ua ti’a mai te mau tamāroa ’e te feiā fa’atere ’e ’ua fa’a’ite mai i tō rātou ’itera’a pāpū. E au ra tā rātou mau parau i roto i te ’ā’au o Edison mai te pu’ohura’ahia i te hō’ē paraitete māhanahana.
Tiʼa mai ra Diego, « ’Ua ’ite au e parau mau te ’Ēkālesia. ’Ua ’ite au ’o te Atua tō’u Metua e ’o Iesu Mesia tō’u Fa’aora ».
’Ua pūai atu ā te huru māhanahana. Tē hina’aro nei au ’ia ’ite ato’a i te reira, ’ua feruri Edison.
I te ho’ira’a Edison i te fare i muri a’e i te tere, ’ua vai noa te mau parau a Diego i roto i tōna ferurira’a. ’Ua hina’aro ’oia e haere i te purera’a ’e e ha’api’i mai nō ni’a ia Iesu, nā muri iho ia Diego ’e ia Juan.
I taua pō ra i te taime tāmā’ara’a, ’ua ui atu pāpā, « e aha te huru te tere pūhapara’a ? »
« E mea faʼahiahia roa ! » ’Ua parau Edison. ’Ua ’au mātou ’e ’ua pa’i’uma nā ni’a te mou’a ’e ’ua fa’a’ama i te hō’ē auahi. ’Ua fa’ahoa ato’a mai au e piti hoa nō te fenua Ētuatōria ato’a ! »
« ’Aita atu ai ! E ani manihini ana’e ia rāua ’ia haere mai », ’ua parau māmā.
’Ua fa’aea ri’i Edison. « E nehenehe ānei tātou e ha’amata i te ho’i fa’ahou i te purera’a ? »
’Aita māmā ’e ’o pāpā i parau noa a’e tau taime ri’i. I muri iho, ’ua hotahota ri’i mai ’o māmā, e parau a’era. « Mai te mea e hina’aro ’oe e haere, ’aita e fifi. ’O māua rā pāpā, e’ita ïa māua e haere ».
Fa’atoiaha atu ra Edison iāna i roto i tōna pārahira’a. ’Aita ’oia i hina’aro e haere i te purera’a ’ōna ana’e. E fa’aea paha ïa ’oia i te fare ’e tōna ’utuāfare.
I muri iho, ha’amana’o a’era Edison i te mana’o māhanahana i tupu i ni’a iāna i roto i te rurura’a fa’a’itera’a ’itera’a pāpū. Noa atu ē, ’aita tōna ’utuāfare e hina’aro e haere i te purera’a, ’ua hina’aro Edison e haere.
Hau atu i te reira, e’ita atu ra ’oia e vai fa’ahou ’ōna ana’e. E mata ’ata’ata tō Edison i te taime tāmā’ara’a o te ahiahi. I muri iho, rave mai ra i te niuniu. ’Ua mātau ’oia i te tahi nā hoa nō te haere i te purera’a nā muri ia rāua !
Fa’ahōho’ara’a nā Hollie Hibbert