Pāpa’ihia nā ’outou
E fa’atupu te mau mea ha’iha’i i te ta’a-’ē-ra’a !
Jed L., 9 matahiti, Ilocos Norte, Firipino
’O vau te mea poto roa a’e i roto i tā’u piha ha’api’ira’a. I te tahi taime, ’ua hina’aro vau ’ia roa vau mai tō’u mau hoa ha’api’ira’a. ’Ua parau mai rā tō’u metua vahine ē, e mea faufa’a roa atu ā tā’u mau peu maita’i i tō’u roa, ’e e nehenehe au e fa’atupu i te mau mea e rave rahi noa atu ā e mea poto a’e au i tō’u mau hoa ha’api’ira’a.
’Ia mo’e ana’e te hō’ē mea iā’u ’aore rā ’ia ri’ari’a ana’e au, e fa’aea vau i te rave i tā’u ’ohipa ’e e pure au. Tē pāhono nei tō’u Metua i te ao ra i tā’u mau pure.
Tē tauturu nei au i tō’u fēti’i taea’e ’e i te tahi atu mau tamari’i ’ia tuatāpapa i te nūmera, te reo peretāne ’e te pāpa’ira’a. Tē tauturu nei au i te mau ’ohipa i te fare. Tē ’atu’atu nei au i tā’u mau ’ānimara. Tē pāpa’i hōho’a nei au i te mau anoihi ’e tē pāpa’i nei au i te rata nā te mau misiōnare. ’Ia ho’o mai au ’aore rā ’ia fāri’i au i te hō’ē ’ohipa ’āpī, e fa’a’ite au te reira ia vetahi ’ē. ’Ia ’ite ana’e au i te ta’ata nava’i ’ore i ni’a i te purūmu, e hōro’a vau i tā’u e nehenehe, ’e e pure au nō rātou i te mau mahana ato’a.
I tō’u na’ina’ira’a, ’ua ha’amata tō’u māmā i te tai’o iā’u i te mau buka. Tē tai’o nei mātou i te mau ’ā’amu o te Buka a Moromona, te mau ’ā’amu o te Bibilia ’e te ve’a Hoa. I teienei, noa atu e iva matahiti tō’u, tē tai’o noa nei ā ’oia nō’u. E’ita vau e ta’oto maori rā ’ia tai’o mai tō’u māmā nā muri iā’u. I teienei rā, i te tahi mau pō, e tai’o vau nō māmā ē tae roa e ta’oto ’oia.
Tē rave nei au i teie mau mea ha’iha’i, noa atu tō’u poto. ’Ua ’ite au ē, tē here nei tō’u Metua i te ao ra ’e ’o Iesu Mesia i te mau tamari’i ri’i. ’Ua ’ite au ē, ’ua here rāua iā’u. Tē here ato’a nei au ia rāua. Tā’u moemoeā, ’o te rirora’a ïa ’ei misiōnare, ’ia ti’a iā’u ’ia rave i te tahi atu ā mau ’ohipa ha’iha’i nō te fa’atupu i te ta’a-’ē-ra’a rahi.
Fa’ahōho’ara’a nā Adam Koford