Te mau ’aihere ’e te mau parau ’ino
« E nehenehe ānei ïa tātou e rave i te hō’ē parau fafau nō te ’utuāfare ? ’Ua ui māmā.
« E nehenehe ānei tāua e paraparau ri’i ? » Parau mai ra Jonas ia māmā. Pārahi a’era ’oia i ni’a i te matie i te vāhi e vaerehia ra e māmā nō te pa’i tiare.
« Nā reira. E aha te ’ohipa e tupu ra ? » Ui atu ra māmā. ’A tātara ai ’oia i tōna rimarima repo.
Parau mai ra Jonas, « i teie mahana, i te fare ha’api’ira’a, ’ua fa’ahiti te mau tamari’i i te hō’ē ta’o ’aita vau i ’ite na. ’Ua ’ata rātou i te paraura’a rātou i te reira parau ». « I tō’u mana’o, e parau ’ino te reira ».
Ani atu ra māmā, « e aha tō ’oe mana’o i te fa’aro’ora’a ’oe i terā parau ? »
« ’Aita vau i au ».
Muhumuhu atu ra Jonas i te ta’o ia māmā. Fa’a’ite atu ra māmā iāna i te aura’a o te reira. ’Ua tano roa Jonas. E ’ere i te parau maita’i.
« Nō te aha e mea ’ino ? », ui atu ra Jonas.
« E mea ’ino nō te mea e ’ere i te mea maita’i ’e e ’ere i te mea fa’atura. ’Ia fa’a’ohipa ana’e tātou i te mau parau mai te reira te huru, e mea fifi nō te Vārua Maita’i ia pārahi mai i roto ia tātou. Tē parau nei te Vārua Maita’i ia ’oe e mea ’ino. Nō reira ’oe i huru ē ai i roto ia ’oe ».
Tu’atu’a a’era te mata o Jonas. « E au rā ē, ’ua ’ārearea roa te tahi atu mau tamari’i. Nō te aha ’o vau ana’e tei ’ore i au i te reira ? »
« Nāhea ’oe i ’ite ai ē, ’aita te tahi atu mau tamari’i i fāri’i i te hō’ē ā huru mana’o ? » ’Ua ui māmā.
« Nō te mea ’ua ’ata ’e e hōho’a mata ’ata’ata tō rātou pā’āto’a, ’a parau ai te tahi i te reira parau ». ’Ua fē’a’a piti te mana’o o Jonas.
« I te tahi taime e ’ata ’aore rā e mata ’ata tō te ta’ata, ’ia huru ’ē ana’e rātou », ’ua parau māmā. « ’E i te tahi taime ’ia fa’aro’o ana’e ’aore rā ’ia parau ana’e rātou e rave rahi parau ’ino, e’ita te reira e ha’ape’ape’a fa’ahou ia rātou. Terā rā, e ’ere noa i te mea ti’a ’ia parau i taua mau parau ra. E au ri’i te reira mai teie mau ’aihere. Tē hutihuti nei au i te reira ’ia mā noa te ’āua ’e ’ia vaiiho i te mau rā’au tanu maita’i ’ia tupu ».
Parau mai ra Jonas, « tē ’oa’oa nei au i te mea ē, ’aita vau i parau i te reira ta’o ».
« ’O vau ato’a » nā māmā ē. « Ha’apeu roa nei au ia ’oe. ’E e mana’o tō’u. E nehenehe ānei ia tātou e rave i te hō’ē parau fafau nō te ’utuāfare ? »
« Mai te aha te huru ? » ui mai ra Jonas.
« E fafau ana’e e fa’a’ohipa i te mau parau maita’i ’eiaha rā i te mau parau ’ino. E nehenehe te reira e riro ’ei parau fa’aau nā te ’utuāfare ».
’Ua au roa Jonas i taua mana’o ra. Aroha rima iho ra rāua māmā. ’Ua tupu te mana’o maita’i i roto ia Jonas nō te parau fafau tāna i rave ’e o māmā.
« E teienei, e aha te mana’o ’ia fafau ato’a mai ’oe e tauturu mai iā’u ’ia vaere i te ’aihere ? », ani a’era māmā. « ’Ei reira vau e fafau atu ai e ’āfa’i ia ’oe i te vāhi ha’utira’a ».
’Ata mai ra Jonas ’e rave atu ra i te hō’ē ope. « Nā reira ïa ».
’A tauturu ai ’oia ia māmā, ’ua maita’i roa Jonas. ’Ua ’ite ’oia ē, te fafaura’a ’eiaha e fa’a’ohipa i te mau parau ’ino, ’ua riro ’ei mā’itira’a maita’i nō tō rātou ’utuāfare.
Fa’ahōho’ara’a nā Dan Widdowson