’A ’imi na ’o vai tei here ia ’oe, e Banks vahine !
’Ua ha’amata nā roto i te hō’ē tiare …
E mea au nā Roxy ’ia hi’o i te mau fare ato’a nā tōna vāhi fa’aeara’a ’a ho’i ai ’oia i te fare nā te ha’api’ira’a mai. E ’ūrī tō te hō’ē fare e ’aoa ra ’e te ’ōu’au’a ra na te ha’amāramarama. Tē vai ra te tahi atu fare e mau manu tō roto e hiohio ra i ni’a i te tumu rā’au.
’E, tē vai ra te fare o Banks vahine. ’Ua riro nā Banks vahine ’ei ’orometua ha’api’i nāna nō te toru o te matahiti, ’e ’o ’ōna te ’orometua au roa a’e a Roxy. E tāraperape Roxy ia Banks vahine i te mau taime ato’a, e ’ite atu ’oia iāna tē pārahi ra i mua i tōna taupe’e. E mea pae ta’ata roa o Banks vahine ’e te ’oa’oa ato’a i te mau taime ato’a.
I teie rā mahana, ’aita e ta’ata e pārahi ra i mua i te taupe’e. E au ’aita e ta’ata i te fare. ’Aita ato’a te mīmī a Banks vahine, ’o Chester.
’Ua ha’amana’o Roxy i tōna māmā i te paraura’a ē, ’ua ma’ihia Banks vahine. E haere ’oia i te fare ma’i i te mau mahana ato’a nō te mau rapa’aura’a. ’Ua ’oto Roxy. ’Ua hina’aro ’oia e rave i te hō’ē ’ohipa maita’i nō Banks vahine. E aha pai ?
’Ua hi’o haere Roxy i te mau manu meli i te rerera’a nā te tahi tiare i te tahi tiare. I muri iho, ’ua tupu mai te hō’ē mana’o i roto iāna.
’Ua horo Roxy i te fare ’e ’ua rave mai i te hō’ē roti i roto i tōna ’āua. ’Ua haere atu ra i te fare o Banks vahine ’e ’ua tu’u i te reira i mua i te taupe’e.
I te mahana i muri iho, ’ua tu’u Roxy i te hō’ē puamahana i ni’a i te pārahira’a o Banks vahine. ’E te mahana i muri iho, ’ua tu’u ’oia i te hō’ē mātirita i mua i tōna ’ōpani fare. I te mau mahana ato’a, i te roara’a e piti hepetoma, ’ua vaiiho Roxy i te hō’ē tiare nā Banks vahine. ’Ua ha’apa’o maita’i ’oia ’eiaha ’oia ’ia ’ite-mata-hia mai.
I te hō’ē mahana i tē ho’i ra Roxy i te fare, ’ua ’ite atu ’oia ia Banks vahine e pārahi noa ra i mua i te taupe’e. Tē tape’a noa ra ’oia i te tahi mau tiare i roto i tōna rima.
Parau atu ra Banks vahine, « e Roxy, ’a hi’o na tā’u mau tiare nehenehe roa. E ta’ata tei vaiiho mai i te reira nā’u. I te mau mahana ato’a, e tīa’i mai hō’ē tiare āpī iā’u ’ia ho’i mai au nā te fare ma’i ».
’Ua ’ata’ata Roxy. « ’Ua ’ite ānei ’oe nā vai ? »
’Ua ’ata’ata ato’a mai Banks vahine. « Noa atu ’o vai te ta’ata, tē hina’aro nei au e ha’amāuruuru ia rātou ».
Parau atu ra Roxy, « E’ita e ’ore e ta’ata here ia ’oe ! »
Nā ’ō mai nei Banks vahine, « e pa’i, e ’oa’oa iti rahi tō’u ’ia ’ite mai i te hō’ē tiare ’āpī i te mahana tāta’itahi. ’Ua vaihohia te tiare mātāmua i ni’a i tō’u taupee ».
« ’Ia mana’o ’oe, nā tā ’oe mīmī i vaiiho te reira ? » Ui atu ra Roxy.
« E mea au nā Chester e vaiiho i te mau mea māere, ’aitā roa rā ’oia e vaiiho mai i te tiare ». ’Ua ata Banks vahine ma te parau ē : « E te tiare i ni’a i tō’u pārahira’a ? »
« Nā te ’ūrī i ni’a i te purūmu ? » ’Ua paho te ’ata a Roxy.
« E terā i mua i tō’u ’ūputa ? »
« Nā te tūrio ? »
« ’Auē ho’i ē », ’ua parau Banks vahine ma te ’ata. « ’Aita vau i mana’o ē, e rave rahi hāmanira’a tei here iā’u ! Te mau tiare rā, ’ua tauturu pāpū ïa iā’u ’ia ’ite ē, e ta’ata fa’ahiahia vau ».
E au ē, e ’oa’oa iti rahi tō Roxy. ’Ua ’oa’oa ’oia i te tauturura’a ia Banks vahine ’ia ’ata’ata fa’ahou.
Fa’ahōho’ara’a nā Adobe Stock