Mea ta’a ’ē e ’ere rā ’ōna ana’e
I te tahi taime, e mea mo’emo’e ’ia riro ’o ’oe ana’e te melo nō te ’Ēkālesia.
Brrrrring ! ’Ua ta’i te oe nō te ha’api’ira’a hōpe’a o te reira mahana. I teienei tei te ha’api’ira’a tuarua Megan, e haere ’oia i terā ’e terā piha ha’api’ira’a i te roara’a o te mahana. ’E e rave rahi mea e ha’api’i mai. ’Ua ’oa’oa Megan i tāna ha’api’ira’a hope’a, e taime ïa nō te tuatāpapara’a. Te aura’a ra, e ha’amata ’oia i tāna ’ohipa ha’api’ira’a nō te fare.
’Ua pārahi Megan i te hō’ē ’aira’amā’a ’aita e ta’ata. Haere mai ra te tamaiti ’o Bennett te i’oa iāna ra.
« Hei, e Megan, e Momoni ’oe, e ’ere ānei ? »
Parau atu ra Megan, « e melo vau nō Te ’Ēkālesia a Iesu Mesia i te Feiā Mo’a i te mau Mahana Hope’a nei ».
« Tē mana’o ra ānei ’oe ē, ’ua pāpa’i Iosepha Semita i te Buka a Moromona ’aore ra, te tahi mea mai terā, e ’ere ānei ? » Ui atu ra Bennett.
Pure ’oi’oi ma te māmū a’e ra Megan nō te ’ite e nāhea ’ia pāhono. Pāhono atu ra, « ’ua ’īriti ’oia i te Buka a Moromona ». « ’Ua pi’i te Atua iāna ’ei peropheta nō te tauturu i te fa’aho’i-fa’ahou-ra’a mai i te ’Ēkālesia a te Mesia ».
Ra’ura’u a’e ra Bennett i tōna ihu. « E aha ïa huru » ’ua parau ’oia. ’Ata a’e ra ’oia ’e haere ’ē atu ra.
’Ua ahu roa te hōho’a mata o Megan. Hi’o noa atu ra ’oia i tāna buka.
« Hei, Megan ».
E aha atu ā ? Hi’o atu ra Megan i ni’a. « E ! ’Ia ora na, Taj ».
« ’Eiaha e ’ino’ino nō Bennett » ’ua parau Taj. Pārahi a’era ’oia i mua noa mai iāna. « E au ē, e mea faufa’a nō ’oe te mau parau tā ’oe i parau a’e nei ».
« Māuruuru » ’ua parau Megan. « E parau mau ».
« Tē mana’o nei au, ’ua ’ite au i te mea e tupu nei i roto ia ’oe » ’ua parau Taj. « ’O vau ana’e te hindu i te fare ha’api’ira’a. E mea fifi roa ’ia ’ore ana’e te ta’ata e tāmata i te māramarama i tō ’oe mau ti’aturira’a.
I te tahi taime, e mo’emo’e ri’i Megan i te mea ē, ’o ’ōna ana’e te melo o Te ’Ēkālesia a Iesu Mesia i te Feiā Mo’a i te mau Mahana Hope’a nei i tā rātou fare ha’api’ira’a. ’Aita rā ’oia i mana’o na ē, e riro te tahi atu mau tamari’i i te mana’o ato’a mai te reira te huru.
’Ua parau Megan ē, « tē parau nei tō’u nā metua ē, ’ia ’ino ana’e te hō’ē ta’ata, nō te mea ïa ’aita ’oia e ’oa’oa ra i roto iāna ». ’A fa’ateretere ai ’oia i te hō’ē pēnitara nā ni’a i tōna nau manimani rima. « Tē uiui nei au, tē ’oto ra ānei Bennett. ’Aore rā tē mo’emo’e ra ānei ’oia ».
’Ua pi’o a’era taj i tōna upo’o i raro. « Pāpū iā’u, ’ua tano ’oe. Penei a’e e hina’aro ’ōna i te hō’ē hoa ».
’Ua ’ata’ata Megan. « E hina’aro paha ’oia e piti ! »
I te mahana i muri iho i te taime tuatāpapara’a, ’ua ’ite Megan ’e ’o Taj ia Bennett i te pārahira’a ’ōna ana’e i te hō’ē ’aira’amā’a.
Parau atu ra Taj, « ’ia ora na, Bennett »,
’Ua māere roa Bennett. « ’Ia ora na !»
Ui atu ra Megan ma te tūru’i i roto i te pārahira’a, « E aha tā ’oe e tuatapapa ra ? »
« Pāpa’aparau ».
« Nō te uiuira’a ananahi ? » Pārahi ato’a mai ra Taj.
« ’Ē », parau mai nei Bennett.
« E mea rahi te mau mea e ha’amana’o » parau mai ra Taj. Tā’iri’iri a’era Bennett i tōna upo’o.
« Penei a’e e nehenehe tā tātou e uiui i te tahi ’e te tahi ». ’Īriti mai ra Megan i tāna buka pāpa’aparau. ’Ua uiui rātou te tahi i muri mai i te tahi ’e ’ua pāhono i te mau uira’a, ē tae roa i te taime ’a ta’i mai ai te oe.
« Hei e Megan, fa’a’ore mai tā’u hape i nanahi ra » parau mai ra Bennett ’a ti’a ai rātou nō te haere « ’Ua fa’aro’oro’o vau i te tahi mau mea nō ni’a i tā ’oe ’ēkālesia ’e ’ua vau e ’ite mau ». ’Ua tāuiui noa ’oia i te tūru’i i ni’a i tōna ’āvae. « Tē ti’aturi nei au i te mau mea ta’a ’ē atu, ’āhani ato’a vau e ta’ata huru maita’i a’e ».
’Ua ’ata Megan. « Māuruuru. E mea faufa’a tā’u ’ēkālesia nō’u, terā rā, ’aita e fifi ’ia ti’aturi tātou i te mau mea ta’a ’ē ».
Parau mai nei Taj, « tē mana’o nei au, e pupu tuatāpapa maita’i roa tā tātou, noa atu te ta’a-’ē-ra’a o tō tātou mau ti’aturira’a ».
’Ata’ata a’era Bennett. « Vau ato’a. ’E tē mana’o nei au e mānuia maita’i tātou i roto i taua uiuira’a ra ».
Fa’ahōho’ara’a nā Mark Robison