Usa ka Gamay nga Dugang nga Tabang
Ang mga bukog sa dinosaur mora og mas makalingaw pa paminawon kay sa terapiya sa pagsulti.
“Alex. oras na sa pag-adto sa terapiya sa pagsulti,” miingon si Miss Jenkins.
Gitago ni Alex ang iyang ulo. Ang terapiya sa pagsulti usa ka espesyal nga klase nga iyang adtoan. Maglisod siya sa pagsulti sa pipila ka pulong ug mga tunog. Mao nga kinahanglan siya nga magpraktis niini diha sa klase sa pagsulti pipila ka higayon sa usa ka semana. Sa matag higayon nga siya mobiya sa iyang regular nga klase, bation niya nga maulaw kaayo!
Mihangad siya ngadto sa iyang magtutudlo. “Mahimo ba nga moikyas ko niini?” siya mihunghong. “Bisan karon lang?”
Karon, si Mr. Timmons moadto sa klase ni Alex aron mag-istorya kabahin sa mga dinosaur. Si Mr. Tim-mons nagtrabaho sa usa ka museum nga adunay daghan nga mga bukog sa dinosaur. Magdala pa gani siya og bukog nga pipila ka libo ka tuig na ang pangedaron! Dili gusto si Alex nga dili makatambong.
Mipahiyom si Miss Jenkins. “Kinahanglan gihapon ka nga moadto sa imong klase sa pagsulti. Apan pwede ka nga mobalik atol sa kataposang bahin sa istorya ni Mr. Timmons.”
Gipaningkamotan ni Alex nga mobalos og pahiyom, apan dili niya mahimo. Hinay siya nga milakaw padulong sa klasrom alang sa terapiya sa pagsulti. Diha sa klase nagpraktis sila og sulti og balik-balik sa parehas ra nga tunog. Ang pagkat-on kabahin sa mga dinosaur mas makalingaw unta.
“Dili gayod ko ganahan og sulti niining binuang nga mga tunog,” giingnan niya ang iyang magtutudlo sa terapiya sa pagsulti. “Gibati nako nga mora ko og bata.”
“Dili na ka bata,” miingon siya. “Magkinahanglan kita og gamay nga dugang nga tabang usahay. Nakahibalo ba ka nga miadto ako og terapiya sa pagsulti sa sama pa ko nimo og edad?”
Medyo nakapaarang-arang kini sa gibati ni Alex. Naningkamot siya og maayo sa nahabiling oras sa klase sa pagpraktis sa iyang mga tunog.
Sa dihang si Alex mibalik sa klasrom ni Miss Jenkins, nakit-an niya ang iyang higala nga si Courtney nga migawas.
“Asa ka padulong?” nangutana siya.
Miduko si Courtney. “Naglisod ko sa pagbasa. Kinahanglan ko nga moadto sa usa ka espesyal nga klase sa pagbasa.” Mora og naulaw si Courtney.
“Oy, ok ra kana,” miingon si Alex. “Mao pa lang ang pagbalik nako gikan sa akong klase sa pagsulti. Nahurot nako ang tibuok oras sa paghimo og parehas ra nga tunog og pabalik-balik.” Iyang gingislo ang iyang ilong.
“Gihimo nimo?”
Mitando siya. “Nag-adto ko og terapiya sa pagsulti sa miaging duha na ka tuig.”
“Sa unsang rason nga wala ko makahibalo?” nangutana siya.
Gikibo ni Alex ang iyang abaga. “Wala gayod ako mosulti ni bisan kinsa. Nahadlok ko nga ila kong himoon nga kataw-anan.”
“Dili gayod ako mohimo nimo nga kataw-anan,” miingon si Courtney. “Nalipay ko nga nakaabot gayod ka sa saktong oras aron makita ang bukog sa dinosaur. Nindot gayod kaayo kini!” Mikaway-kaway siya. “Ako kinahanglan na nga molakaw. Kita lang ta unya.”
Sa wala madugay nahibaloan ni Alex nga dili lang kay siya ug si Courtney ang miadto og lain nga mga klase. Si Tommy miadto sa usa ka klase nga makatabang niya nga mas makat-on og mga sosyal nga kahanas. Ug si Bekah nakigtambayayong sa usa ka espesyal nga magtutudlo nga motabang aron mahimong mas lig-on ang iyang braso human niya kini mabikil.
Karon si Alex wala na mobati og dili maayo kabahin sa iyang klase sa pagsulti. Ganahan siya nga motabang sa ubang bata nga mas mobati usab og maayo. Nagpraktis siya og basa kauban ni Courtney ug nakig-istorya ni Tommy atol sa paniudto. Matag usa nagkinahanglan og gamay nga dugang nga tabang usahay, ug OK ra kana!
Nakakuha ko og gamay nga dugang nga tabang sa pagbasa.
Nakakuha ko og gamay nga dugang nga tabang sa sosyal nga mga kahanas.
Nakakuha ko og gamay nga dugang nga tabang sa akong braso.
Mga paghulagway pinaagi ni Mark Robison