Usa ka Chat uban ni Xiomara kabahin sa Pagkahimong Bag-o diha sa Young Women

Si Xiomara (litokon nga she-o-MA-ra) gikan sa Chiapas, usa ka estado sa habagatang Mexico. Siya bag-o lang nga mibalhin ngadto sa Young Women.

Una, gusto namo nga mas makaila nimo.

Unsay imong buhaton para malingaw?

Mosakay sa akong bisikleta, magdula og soccer, ug magluto. Ang akong paborito nga lutoon mao ang quesadillas!

Unsa ang imong paborito nga kolor?

Dalag [Yellow].

Unsa ang imong labing gikahinaman kabahin sa pagbalhin gikan sa Primary ngadto sa Young Women?

Mahinamon gayod ko nga moadto sa templo ug maghimo og mga pagbunyag.

Unsa ang imong gibati kabahin sa pag-adto sa Young Women sa una nga higayon?

Sa sinugdanan lisod kini. Nabalaka ko kon unsay mahunahuna sa mas magulang nga mga babaye kabahin kanako. Gikuyawan ko og gamay hangtod nga kaming tanan nagkuyog nga nangadto sa templo. Diha na kami nahimong maayo nga managhigala.

Susama sa unsa ang pag-adto sa templo sa unang higayon?

Kadto espesyal kaayo. Ang pagsulod sa templo sa Ginoo usa ka espiritwal nga kasinatian. Ganahan gayod ako sukad nga moadto sa templo. Sa Primary kita manganta, “Ganahan kong makita ang templo. Moadto ko didto sa umaabot nga adlaw.” Karon ako makaingon, “Ganahan kong moadto sa templo.”

Niana nga unang higayon sa templo, mihimo ko og mga pagbunyag alang sa pipila sa akong iyaan, pipila ka paryente sa akong lola (mama sa akong mama), ug ubang tawo nga wala ko makaila. Ang templo ug family history kabahin sa akong pagpamatuod.

Unsa ang pipila ka makalingaw nga mga kalihokan nga imong nahimo kauban sa imong grupo sa Young Women?

Maghimo og mga biskwit! Nakahimo mi og 150 ka biskwit. Dayon amo kining gipakigbahin sa ubang tawo. Makalingaw ang mga kalihokan sa Young Women. Puno kini sa nindot nga mga leksiyon, pagdasig, ug giya aron matabangan kita nga mahimong mga misyonaryo sa umaabot.

Aduna bay lain pa nga mga babaye nga kaedad nimo sa inyong ward?

Ako lang. Ako lang usab ang nag-inusara nga miyembro sa Simbahan diha sa akong klase sa eskwelahan.

Lisod ba nga mahimong nag-inusara nga miyembro diha sa eskwelahan?

Dili. Ang akong mga higala nakahibalo nga ako nagsunod og lahi nga relihiyon kaysa nila, apan wala nila ako gitratar nga lahi.

Unsay labing ganahan nimo kabahin sa pagkaanaa diha sa Young Women?

Ganahan ko nga magkat-on pa og dugang kabahin sa Manluluwas ug sa plano sa kaluwasan. Dako nga panalangin ang makahimo og buluhaton sa family history. Ganahan ko nga mohimo og mga pagbunyag sa templo aron mahatagan og paglaom ang atong mga paryente nga mibiya na niining kalibotan.

Ganahan ko nga maanaa sa programa sa Young Women!

Mga paghulagway pinaagi ni Alyssa Tallent