“Magpunting sa Templo,” Higala, Nobyembre 2022, 2–3.
Usa ka Mensahe sa Komperensiya gikan sa Propeta
Magpunting sa Templo
Gikuha gikan sa “Magpunting sa Templo,” Liahona, Nob. 2022.
Paghulagway sa templo pinaagi ni Bailey Rees; koloranan nga pahina pinaagi ni Bryan Beach
Karong bag-o, si Sister Nelson ug ako nagtan-aw sa bag-ong mga video sa Basahon ni Mormon. Usa niini nagpasundayag sa pagpakita sa Manluluwas ngadto sa mga Nephite. Siya miingon, “Tan-awa, Ako si Jesukristo.… Ako ang kahayag ug ang kinabuhi sa kalibotan” (3 Nephi 11:10–11).
Importante nga ang Manluluwas nagpakita ngadto sa katawhan diha sa templo. Kini Iyang balay. Kini puno sa Iyang gahom.
Ang Ginoo mipadali sa pagtukod sa mga templo. Gihimo kini aron mas daghang tawo ang makaadto didto. Ako mosaad nga ang pag-adto sa templo kanunay mopanalangin sa mga tawo nga walay laing makahimo.
Sa komperensiya, ako mipahibalo sa 18 ka dugang nga templo. Sa ubang dagkong mga siyudad, dugay alang sa mga tawo ang pagbiyahe ngadto sa templo diha sa ilang siyudad. Mao nga kita motukod og pipila ka templo sa pipila niining dagko nga mga siyudad. Upat sa bag-ong mga templo pagatukoron duol sa Siyudad sa Mexico.
Akong minahal nga mga kaigsoonan, hinaot nga kamo magpunting sa templo sa mga paagi nga wala pa ninyo mabuhat sukad. Ako mopanalangin kaninyo nga mas mapaduol ngadto sa Dios ug kang Jesukristo matag adlaw. Gimahal ko kamo. Hinaot nga ang Dios magauban kaninyo hangtod sa sunod natong panagkita.
Jesus Mibisita sa mga Nephite
Ang Manluluwas nagpakita ngadto sa mga Nephite diha sa templo tungod kay kini Iyang balay. Ang Dios mipanalangin kanato og dugang nga mga templo sa pagpalig-on ug pagpanalipod kanato.