Mga Pioneer sa Matag Yuta

Natultolan ni Felipe ang Dalan

Ni Megan Roxas

(Gibase sa usa ka tinuod nga istorya)

“Palihog tabangi kami nga makatultol sa among dalan,” nag-ampo si Felipe.

Nakahibalo si Felipe nga nag-anam na og kangitngit. Ang mga langgam mihunong na sa paghuni, ug ang mga gangis kusog na kaayo og tingog. Siya ug ang iyang mama naglakaw sa lasang sulod sa sobra duha na ka oras. Apan ang matag dalan nga ilang gisubay morag parehas ra sa kataposan nilang gisubay. Hingpit na gayod sila nga nasaag.

Nahadlok na gayod si Felipe. Unsa kadugay kaha sila nga mabuhi niini nga kalasangan? Siya 10 anyos, pa lamang. Dili pa kana igo nga pangedaron aron makabatok sa usa ka bitin o ihalas nga baboy! Ug unsa pa kaha nga makahahadlok nga mga nilalang ang moatake human molubog ang adlaw? Ang hunahuna nakapakurog sa iyang dugokan.

Pagmaisogon, giingnan niya ang iyang kaugalingon. Nasayod siya nga kinahanglan gayod niyang himoon.

Si Felipe nangandoy nga naa unta ang iyang papa. Apan namatay siya unom ka bulan na ang milabay. Kay wala siya, ang mga butang lisod alang ni Felipe ug sa iyang mama. Nahutdan na sila og kwarta ug pagkaon.

Si Felipe naglaom nga makaabot na sila sa balay sa iyang igsoong babaye sa pikas nga bahin sa bungtod sa dili madugay. Siya makahatag nila og pipila ka kwarta aron ipalit og bugas.

Nag-ampo siya sa iyang kasingkasing. “Amahan sa Langit, palihog tabangi kami nga matultolan ang dalan. Palihog.”

Dayon usa ka hunahuna ang miabot kaniya: Pangitaa ang mga punoan sa lubi. Mihangad si Felipe. Didto, naa sa distansiya, mao ang pundok sa mga punoan sa lubi. Makita niya kini sa taas ibabaw sa kalasangan. Ang palwa sa mga dahon niini mikaway-kaway sa hangin. Sa unang higayon sulod sa pipila ka oras, si Felipe mibati og paglaom.

“Tan-awa!” Siya mitudlo ngadto sa mga kahoy.

Ang iyang mama nakasabot. Ang mga punoan sa lubi nagpasabot nga adunay baryo sa duol. Ang Dios mitubag sa pag-ampo ni Felipe. Gikuptan ni Felipe ang kamot sa iyang mama. Nagkuyog silang nanglakaw padulong sa kahilwasan samtang ang adlaw mitago na ubos sa mga kahoy.

Nahinumdoman kanunay ni Felipe kon giunsa sa Dios pagtubag ang iyang pag-ampo. Usahay nangandoy siya nga siya mas makadungog pa sa tingog sa Dios sama sa nahitabo niya niana nga gabii sa lasang.

Dayon usa ka adlaw, human sa walo ka tuig, nahimamat ni Felipe ang pipila ka misyonaryo. Sila gikan sa Ang Simbahan ni Jesukristo sa mga Santos sa Ulahing mga Adlaw. Sila mitudlo kaniya kabahin sa buhi nga mga propeta, nga nagsulti sa mga pulong sa Dios. Mao gayod kini ang gipangandoy ni Felipe!

Si Felipe mahinamon nga magpasakop sa Simbahan. Nahimo siya nga usa sa mga unang misyonaryo gikan sa Pilipinas nga magpaambit sa ebanghelyo didto. Usab, ang Dios mipakita ni Felipe kon asa moadto—ug nakahibalo si Felipe nga ang Dios kanunay nga mohimo niini.

Ang Pilipinas adunay kapin sa 7,600 ka isla!

Ang nasod pinuy-anan sa 70% sa espisye [species] sa mga tanom ug mga hayop sa kalibotan.

Sa dili madugay ang Pilipinas makabaton og walo ka templo.

Si Felipe ug ang iyang asawa nagtigom og kwarta sulod sa usa ka tuig aron makabiyahe sila ngadto sa templo aron mabugkos.

Si Felipe ganahan nga mangisda.

Si Felipe ug ang iyang asawa, si Cora, adunay 4 ka anak ug 10 ka apo.

Mga paghulagway pinaagi ni Jomike Teijido