Pag-andam alang sa Templo!
Among gipangutana ang mga bata kon giunsa nila pagpangandam aron makaadto sa templo ug unsa ang dapat laoman. Ania ang unsay ilang ikasulti!
“Akong gitun-an ang mga pangutana sa pag-interbyo sa templo aron maandam sa pag-adto sa templo. Gusto ko og lig-on nga pagpamatuod.”
Alivia W., edad 9, Utah, USA
“Mahinamon ko nga moadto sa templo sa umaabot aron mohimo og mga pagbunyag. Nakat-on ko og daghan kabahin sa templo pinaagi sa pagtuon sa mga kasulatan. Mahinamon ko tungod kay bisan og naa ko sa mga palibot sa templo, kusog kaayo nako nga mabati ang Espiritu. Sigurado ko nga mas kusog pa gayod ang Espiritu sa sulod.”
Luke F., edad 10, Idaho, USA
Makapangandam ka para sa templo og ginagmay matag adlaw. Akong gituman ang mga sugo. Akong gibasa ang mga kasulatan kauban sa akong igsoong lalaki ug inahan matag buntag sa dili pa moeskwela. Naningkamot ko nga mahimong ehemplo ngadto sa mga higala. Naningkamot ko nga mopili sa matarong sama sa giingon sa himno nga ‘Buhata Gayod ang Matarong’ (Mga Himno, nu. 79). Amo kanang gikanta sa buntag aron mahatag ang insakto nga kahimtang!”
Mark Y., edad 10, Poltava, Ukraine
“Mag-ampo ko matag adlaw ug mangutana sa akong mga ginikanan kabahin sa mga ordinansa sa templo. Nag-andam usab ako alang sa akong interbiyo uban sa bishop. “Naghinam-hinam ako nga makaadto sa templo.”
Daniel D., edad 11, Kyiv, Ukraine
“Ganahan ko sa akong unang higayon sa pag-adto sa templo. Sa wala pa ang akong turno alang sa bunyag, nagsilbi ko isip usa ka saksi. Akong gibantayan ang laing tawo nga mabunyagan ug gisiguro nga sila nalubog gayod sa ilalom sa tubig. Sa dihang turno na nako nga bunyagan, ang tubig init-init. Gibati nako ang kalinaw ug kalipay. Ganahan ko sa templo ug ganahan nga motabang niining dako nga buhat.”
Antonella A., edad 12, British Columbia, Canada