Ang Espesyal nga Libro
“Imo na nga turno sa pagbasa, Papa,” miingon si Bernice. Iyang giablihan ang mga kasulatan. Si Maman ug Papa mitupad niya diha sa sofa.
Gibasa ni Papa ang unang kasulatan. “Ako nasayod nga siya nahigugma sa iyang mga anak.”
“Ako nasayod nga siya nahigugma sa iyang mga anak,” gibalik ni Bernice.
“Bisan pa niana, ” miingon si Papa, “ako wala masayod sa kahulogan sa tanan nga mga butang.”*
Ang bisan pa niana lisod nga pulong. Si Bernice dili pa makabasa, ug wala siya kahibalo unsa ang kahulogan sa tanan nga mga pulong. Apan ganahan siya nga mobalik-balik sa mga pulong kon ang iyang pamilya magdungan og basa sa mga kasulatan.
Pagkasunod adlaw atol sa oras sa pagbasa sa kasulatan, si Papa adunay surprisa. “Ako adunay usa ka butang nga espesyal alang nimo,” miingon siya. Gihatagan niya si Bernice og libro. Aduna kini hulagway sa katawhan ug usa ka barko sa atubangan.
“Para ba ni nako?” Nangutana si Bernice. Iyang gigakos ang dako nga libro sa iyang mga bukton.
“Para nimo,” miingon si Papa. “Tan-awa ang sulod.”
Giablihan ni Bernice ang libro. Misiga ang iyang mga mata. Dihay daghan nga mabulokon nga mga hulagway.
“Unsa ang tawag niini?” Nangutana si Bernice.
Gitudlo ni Papa ang mga pulong diha sa hapin. “Mga Istorya sa Basahon ni Mormon,” siya miingon.
Gihikap ni Bernice ang mga pulong diha sa hapin. “Mga Istorya sa Basahon ni Mormon,” siya miingon.
“Kini adunay sama nga mga istorya nga atong nabasa diha sa mga kasulatan,” miingon si Maman.
Gitudlo ni Bernice ang usa sa mga hulagway. “Kinsa na siya?” nangutana siya.
“Hmm. Nakita ba nimo ang gapasan ug mga pana?” Si Maman nangutana.
Mitando si Bernice.
“Nakahinumdom ba ka nga nakabasa kabahin sa usa ka tawo nga nabalian og pana?” Nangutana si Papa.
“Si Nephi?” Miingon si Bernice.
“Oo, si Nephi,” miingon si Papa.
Mipahiyom si Bernice. “Salamat, Papa. Salamat, Maman. Ganahan ko niini nga basahon.”
Matag gabii, si Bernice mobasa sa iyang kasulatan uban ni Maman ug Papa. Iyang tudloon ang mga hulagway. Nakat-on siya sa paglitok sa pipila ka lisod nga mga pulong. Ug siya nakat-on sa pagbasa sa pipila ka sayon nga mga pulong nga siya ra!
Ang pagbasa sa mga kasulatan nakapalipay niya. Malipayon siya nga mabasa niya kini uban ni Maman ug Papa!
Paghulagway pinaagi ni Adam Record