Cina, Itaba, Veiqaravi!
Na tiko mai vale e sega ni tarovi ira mai na nodra veiqaravi.
Erau dau taleitaka o Antonella kei Mariana na lako i lotu ena veimacawa. Ia oqo erau sa sega ni rawa ni laki lotu ena vuku ni matedewa totolo na COVID-19. E tiko ena initaneti na kalasi ni Lalai, ia a sega ga ni vaka e liu.
Erau calata na lako ki na Lalai o Antonella kei Mariana. Ena dua na yabaki sa oti, a toki na nodratou matavuvale mai Chile ki Kenada. Na matedewa oqo e vakadredretaka me rawa ni ra vakaitokani vou. Era calata na nodra rawa ni vulica na italanoa ni ivolanikalou vata kei ira na vo ni gone. Ka ra sa calata na lesoni ena vosa vaka-Sipeni me vaka era a cakava mai Chile.
Dua na siga, ni oti na lotu e vale, erau a vakaraica ena initaneti o Antonella kei Mariana e dua na ka me vukei rau me rau vulica na Lako Mai, Mo Muri Au.
“Au diva me keimami kunea eso tale na vidio ena vosa vaka-Sipeni,” e kaya o Antonella. A vakasama vakalailai. Sa qai yaco mai vua e dua na vakasama cecere. “E rawa ni da cakava ga na noda vidio me baleta na Lako Mai, Mo Muri Au ena veimacawa.”
“Io, ka rawa ni da cakava ena vosa vaka-Sipeni!” a kaya o Mariana. “Sa rawa talega meda wasea vei ira eso tale na gone.”
Erau kaya o Mamá kei Papá ni rawa ni rau veivuke. Eratou marau na matavuvale taucoko!
Taumada eratou wilika na matavuvale na ivolanikalou me baleta na lesoni ni macawa. Era tuva na goneyalewa na veika me ra na veivosakitaka. Era sa qai tekivu cakava na vidio. Erau veivukevuke o Antonella kei Mariana me rau katona nodrau dui vosa ni rau veitalanoataka tiko na italanoa ena iVola i Momani. Ena mua ni vidio yadua, a wasea e dua vei rau e dua na ka sa vulica mai na lesoni. A qai vukei rau o Mamá kei Papá me ratou cakava na vidio me vakau ena initaneti.
Taumada, erau a sega ni kila na ka me rau tukuna. Ia na wiliki ni ivolanikalou kei na vulici ni veika tale eso me baleta na lesoni e vukei rau.
Ena dua na Sigatabu, erau a dabe o Antonella kei Mariana ena mata ni kompiuta me baleta nodratou kalasi ni Lalai. Na lesoni ni macawa oqo e baleti ira na cauravou yaloqaqa ena iVola i Momani. “Na cava era a vala kina na cauravou yaloqaqa?” a taroga na nodra qasenivuli.
A dolava na nodrau gusunivosa o Mariana. “Au sa kila,” e kaya o koya. O koya kei Antonella erau a cakava e dua na vidio me baleta na italanoa oya ena macawa sa oti. “Era yalataka vua na Kalou na nodra qase ni ra na sega ni vala, era sa mani gole kina na luvedra tagane.”
A deguvacu o Antonella. “Ka ra sa vakavulici ira na tinadra ni kevaka e tu vei ira na vakabauta, ena taqomaki ira na Kalou.” A matadredredre mai o koya. E ka marautaki na vulica vata na ivolanikalou.
Ena gauna ni vakayakavi oya, a taroga o Mamá, “A vakaivei na Lalai?”
“Vinaka!” E kaya o Antonella. “Na caka ni vidio e sa vukei au meu vulica vakalevu cake na ivolanikalou.“
“O au talega,” a kaya o Mariana. “Au rawa ni sauma e levu na taro ena Lalai. Ka da sa kila vinaka cake na italanoa mai na ivolanikalou.“
“Au marau ni sa vukei iko na vidio,” e kaya o Papá. “Au vakabauta ni ra sa vukea talega e levu tale na tamata!”
“Donu qori”a kaya o Mamá. “Nomu wasea na veika o sa vulica kei na nomu nanuma me baleta na kosipeli sa dua na sala cecere ni veiqaravi!”
A matadredredre o Mariana. “Au taleitaka ni rawa ni da veiqaravi vakaoqo,“ e kaya o koya. Sa qai vuki o koya vei Antonella. “Meda sa tekivu tuvanaka na vidio ni macawa mai oqo!”
Droini mai vei Kristin Sorra