Levu sara na rorogo!
Sa kosakosa na ka kecega! Evei na vanua me kunea kina o Luke na vakacegu?
E vosakudrukudru o Luke. Sa kosakosa na ka kecega! Erau veiba tale tiko na tacina, o Tadd kei John. Mai na loma sara mada ga ni olo, a rawa ni rogoca na nodrau kaila ena katuba ni nodratou rumu. Kei na ganena, o Lizzie, sa tekivu me rogolevu tale na nona ivakatagi. Thump. Thump. Thump. E dau rogoca toka ga o koya na vadugu ni ivakatagi rogobi.
A tovolea o Luke me kerei rau na tacina me sa rauta mada. “Lako tani,” a kaya vua o Tadd. A qai kerei Lizzie o Luke me vakalailaitaka na nona sere. A vukica ga o koya na ivakatagi me rorogo levu cake.
A vinakata o Luke me gole i tuba me rawa ni vakasama. Ia a tau tu na uca.
Ia, e dua na vanua vakanomodi e rawa ni lako kina o Luke. E nanoa erau a solia vua na nona itubutubu e dua na nona rumu—ena sega ni dodonu me wasea vata kei Tadd kei Joni. Oya ena itabavale e ra. Sa rauta ga me dua na idavodavo kei na dua na teveli. Ia ena nona rumu e rawa ni sogota na katuba o Luke ka dro tani mai na rorogo.
A lako sobu o Luke ki na nona rumu vou. A rai wavoki ena kateni a kauta sobu mai eliu. A raica o koya e dua na iyaloyalo kei Jisu ni basika tu mai na dua na kateni. A taura o Luke na iyaloyalo oya ena siga a papitaiso kina. Ni dau raica e veigauna e dau kauta mai vua na vakacegu.
A taura mai o Luke na iyaloyalo mai na kateni A biuta toka ena teveli. A qai tekiduru o koya me masu. “Tamaqu Vakalomalagi,” e kaya o Luke, “eso na gauna e dau kosakosa sara eke. Yalovinaka ni vukei au meu kunea eso na vakacegu.”
A davo sobu ena nona idavodavo o Luke. A vakasamataki Jisu. E vulica ena Lalai ni rawa ni dau voleka tu ga vua o Jisu. Ka na rawa vua na Yalo Tabu me kauta mai na vakacegu.
Sega ni dede rau sa na tiko e vale o Na kei Ta mai na cakacaka. Erau na vosa vei Tadd kei Joni. Ena mudu na veivala. Me dua na gauna. Erau na vosa vei Lizzie. Ena vakalailaitaka sobu o Lizzie na nona sere. Me dua na gauna. Me yacova ni rau sa yali tale o Na kei Ta.
Ia oqo, a davo toka ena idavodavo o Luke. A raica na iyaloyalo kei Jisu. “Yalovinaka, Tamaqu Vakalomalagi,” a vakasolokakana o Luke. “Yalovinaka ni vukei au meu vakila na vakacegu se cava ga e yaco tiko ena vo ni loma ni vale.”
E muri, a dua na tukituki ena nona katuba ni rumu ni moce. “E rawa beka niu curu yanii?” A kerea mai o Na. “O sa vakaivei tiko?”
“Rau baci vala tale o Tadd kei John,” a kaya o Luke. “Ka sa dua na ka na rogolevu ni nona ivakatagi o Lizzie.”
“Au kila! Sa dredre dina, se vakacava?” A kaya o Na. “Ena gauna sara ga qo sa vosa tiko o Ta vei rau na tacimu. Kau na vosa vei Lizzie ena bogi nikua. Ia taumada, au vinakata meu kila se o sa vakaivei tiko.”
“Au sa vinaka tiko. Au marau ni tiko na noqu rumu oqo,” a kaya o Luke.
“O au talega,” a kaya o Na. “Au raica ni o biuta e dua na iyaloyalo kei Jisu ena teveli.”
A matadredredre o Luke. “Io au a biuta. Ka na vukei au o Koya meu cakava na noqu rumu me vanua ni vakacegu.”
iVakaraitaki mai vei Bryan Beach