“Cavuta e dua na Masu, Ilamani”
Oqo na imatai ni siga ni vuli nei Ilamani. A daramaka na nona sote taleitaki, ka dua na nona penikau vou. A laivi koya na nona qasenivuli vou me dabe ena dua na teveli vata kei ira na nona itokani o Sylvester, Jorge, kei Miguel. E a dua na siga vinaka.
“Maroroya nomu iyaya,” e kaya o Señora Martínez. “Sa gauna ni vakasigalevu.”
Eratou dau masu vata na matavuvale nei Ilamani ni bera ni ratou kana. A laveta cake na ligana. “Señora Martínez, eda na masu beka ni bera ni da kana?”
A matadredredre o Señora Martínez vei Ilamani. “E rawa ni o masulaka na kemu kakana kevaka o vinakata.”
Eratou dolava na kedratou ivakasigalevu o Ilamani kei iratou na nona itokani.
“Na cava na masu?” a taroga o Sylvester.
“Na noda vosa vei Tamada Vakalomalagi,” e kaya o Ilamani. “Sai koya na sala eda vakavinavinakataki Koya kina ena keda kakana.”
“E rawa beka ni o cavuta e dua na masu me baleti keda kece?” a kerea o Miguel.
Sa roqota na ligana o Ilamani. Eratou roqota talega na ligadratou na nona itokani lewe tolu. A bobo na matai Ilamani ka cuva sobu na uluna. Era a vakayacora talega o iratou na nona itokani.
Qai cavuta o Ilamani e dua na masu, me vaka ga e dau vakayacora na nona matavuvale. A vakavinavinakataka na Tamada Vakalomalagi ena siga vinaka oya kei na kedratou ivakasigalevu. A kerea e dua na veivakalougatataki ena kedratou kakana. A tinia ena yaca i Jisu Karisito ka kaya, “Emeni.”
Eratou rai cake o Sylvester, Jorge, kei Miguel.
“E rawa talega ni dou kaya emeni ,” e kaya o Helamán.
Era a kurabui na nona itokani ka kaya, “Emeni.”
Ena siga ka tarava ena gauna ni vakasigalevu, a kaya o Sylvester, “Cavuta e dua na masu, Ilamani.”
“Io, cabora e dua na masu, Ilamani,” a kaya o Miguel. A deguvacu o Jorge.
Sa mani masu tale o Ilamani. Ena gauna oqo e kaya o koya ni vakavinavinaka vakalevu cake ni a cakava vua o tinana e dua na seniwiji ham kei na jisi, na kena kakana taleitaki. A kerea na Tamada Vakalomalagi me vukei ira mera vuli ena kalasi ena siga o ya.
Ena veisiga yadua ni vakasigalevu, eratou kaya vua na nona itokani, “Cabora e dua na masu, Ilamani.” Ena veisiga yadua, dau cabora e dua na masu o Ilamani. E dau masu vata kei ira na nona itokani e veisiga me dua na macawa.
Ena Moniti ka tarava ena gauna ni vakasigalevu, a kaya o Miguel, “Nikua au na masu.”
A kurabui kina o Ilamani. A roqoliga, bobo na matana, cuva sobu, ka vakarorogo ni masu tiko o Miguel.
A tekivuna o Miguel ena nona kaya, “Tamai Keimami Mai Lomalagi.” A vakavinavinakataki Koya ena kedratou kakana ka kerei Koya me vakalougatataka. A tinia ena yaca i Jisu Karisito ka kaya, “Emeni.”
“Emeni!” erau kaya o Ilamani kei Jorge.
“Emeni,” a kaya o Sylvester. “Au sega ni kila ni rawa ni o masu.”
“Au vulica ena noqu dau vakarorogo vei Ilamani,” a kaya o Miguel. “Au a kerea vei rau na noqu itubutubu ke rawa niu cabora e dua na masu ena neitou kana e vale. Erau a kaya io, au masu me vakataki Ilamani ga.”
“E dina,” e kaya o Sylvester. “Au vakabauta niu na kerei rau na noqu itubutubu kevaka au rawa ni cabora e dua na masu ena neitou gauna ni kana.”
“O au talega,” a kaya o Jorge.
A matadredredre o Ilamani. A marau ni a rawa me vukei ira na nona itokani me ra vulica me ra veivosaki kei na Tamada Vakalomalagi. E kila ni lomani koya na Tamada Vakalomalagi, ka lomani ira talega na nona itokani na Tamada Vakalomalagi.
Droini mai vei Josh Talbot