Vakanananu tiko vata kei Bubu
Cava na vuna a sega ni dau vosoti Bubu vakalevu cake kina o Mari?
A matacudrucudru o Mari. A talanoataka tiko o Bubu na italanoa vata ga. Vakaduatale
A laki vakaitikotiko kei iratou na matavuvale nei Mari ena vica na vula sa oti o Bubu. E lomani koya o Mari, ia ena so na gauna sa dau vakatubu oca na tiko vata kei Mari. E dau talanoataka vakavica e dua ga na italanoa. Ena so na gauna ena tekivu tale ni se bera mada ga ni vakaotia na italanoa.
A marau o Mari. “Bubu,” a kaya mai, “o sa tukuna oti vei au na italanoa qori.”
A rai sobu o Bubu. “E?”
“Io” a kaya o Mari. “O se qai tukuna ga vei au ena vica na miniti sa oti.”
“Au sega ni kila,” a kaya o Bubu. E rairai rarawa ka veilecayaki. A tucake o koya ka lesu tale ki na nona rumu.
Sa rarawa o Mari ni sa vakararawataki Bubu. Vakatekivu mai na gauna a mate kina o Tukaqu, sa guiguileca vakalevu cake tikoga o Buqu. Ena dua na gauna a sega ni bokoca na sitovu, ka tekivu kina e dua na kama e valenikuro. Oqori na gauna rau a kauti Bu mai kina o Na kei Ta me mai tiko vata kei rau.
A kunei Ta e valenikuro o Mari. “Au lomani Bu vakaidina, ia au sa oca ni rogoca tiko e dua ga na italanoa. Cava na vuna e sega ni nanuma kina ni sa talanoataka oti vaka 50 na milioni vei au na italanoa oya?”
A matadredredre o Ta. “Au kila ni sega ni limasagavulu na milioni na gauna. Ia au kila ni dredre. E tauvimate tiko na nona mona o Bumu ka vakavuna me guilecava na veika eso. Na nona italanoa e sala me tovolea kina me nanuma o cei o koya.”
A cuva na ului Mari. Cava na vuna a sega ni vosoti Bubu vakalevu cake kina? E dau raici koya tu ga ena loloma o Bubu. A vakatokai koya me “noqu Mari.” A vakasamataka o Mari na gauna e dau vukei Bubu kina me tei senikau ka wereca na iteitei.
A tukituki ena katuba nei Bubu o Mari.
“Curu mai,” a kaya o Bubu.
A dolava sara na katuba o Mari. A dabe toka o Bubu ena dua na idabedabe ka dola toka na ivolanikalou e sagana.
”Bubu, yalovinaka ni tukuna mada vei au na sala drau a lewena kina na Lotu kei Tutu?” A taroga o Mari.
Rai cake o Bubu. “O via rogoca na ka e baleti Tutu kei au?” a taroga ena domo vakanuinui.
A dabe tikivi Bubu o Mari. “Io. Au vinakata meu rogoca na ka kecega.” A taura o Mari na ligai buna. “O sa rui ka taleitaki vei au, Bubu. Ena vaka tu ga kina.”
A matadredredre o bubu, dabe lesu ena nona idabedabe, ka tekivu talanoataka na italanoa.
Sa rogoca vakavuqa o Mari na italanoa, ia ena gauna oqo, a sega ni cudru se yaloca mai. Ia, a vakila na loloma kei na kurabui. E kila o koya ni rau sa solibula vakalevu o Bubu kei Tutu ni rau sa lewena na Lotu mai Jamani. Erau sa toki vakayawa sara mai nodrau vale na tubuna me rawa ni rau laki tiko volekati ira na lewe ni Lotu tale eso.
A vakacavara o Bubu na italanoa ka matadredredre. “O iko e dua na goneyalewa vinaka, noqu Mari.”
A mokoti buna o Mari. “Vinaka vakalevu, Bubu. Au lomani iko.”
Droini mai vei Melissa Manwill