A Yaco me YalodoudouRawa Vakacava o Siedeh
Sa rui rere vakalevu o Siedeh me vosa vei ira na nona lewenikalasi.
A cegu levu o Siedeh ka curu yani ki na nona valenivuli vou. Oqo na imatai ni siga ena ikava ni kalasi.
Ena yabaki sa oti, a tiko ena ikarua ni kalasi o Siedah. A vinaka sara nona ka ni vuli ka vakatara kina nona koronivuli me rika sara ki na kalasi va. A marautaka o Siedeh me cakava na fika dredre ka wilika eso tale na ivola ena ikava ni kalasi. Ia a sega ni marautaka me biuti ira tu na nona itokani makawa.
Ni rai wavoki ena rumu, a vakila o Siedeh ni lailai sobu. O ira kece na nona lewe ni kalasi vou era rairai qase cake ka balavu cake mai vei koya. Vakacava ke sega ni okati e loma?
A qai kunea e dua na desi ka dabe sobu. A dabe tikivi koya e dua na goneyalewa balavu. “Bula,” a kaya o Siedeh.
“Na cava o cakava tiko eke?” a taroga o goneyalewa. “Au nanuma ni dodonu mo tiko ena ikatolu ni kalasi.”
“A tosoi au cake ena dua na kalasi na koronivuli,” a kaya ena yalorere o Siedeh.
A cakava e dua na irairai ni mata ca na goneyalewa. “Ia, au sega ni via kila nomu gone vuku. O se gone ga.”
A sega ni vinaka na lomai Siedeh. Ena vo ni macawa, sa rui rere vakalevu o koya me vosa vei ira na nona lewenikalasi. Ena veigauna kece e rogoca kina e dua ni dredre se vakasolokakana, a vakasokidi mata. Era rairai tukuna tiko eso na ka ca baleti koya.
Ena gauna sara ga e vakasamataka kina o koya ni sega ni rawa me ca vakalevu cake, a yaco mai na macala ni dua na veitarogi ni fika. A vinakata me tagi ni raica na kena maka. Na fika na nona lesoni taleitaki. A sega vakadua ni se bau lailai vaqo na kena maka.
Ni yaco yani ki vale, a sega ni tarova rawa na wainimatana o Siedeh. “E sega ni dua na noqu itokani,” a kaya vei rau na nona itubutubu. “Au sega ni okati ki na ikava ni kalasi. Au sega soti ni vuku sara.”
“Vosota ni sa rui dredre,” a kaya o tinai Siedeh. “Ia o iko na gone vuku. Ka o se vuli tikoga.”
A qusia na matana o Siedeh. “Au diva meu gole ga ki na ikatolu ni kalasi.”
A vagagalu mada vakalailai o Ta. “O vinakata beka e dua na veivakalougatataki ni matabete?” a taroga.
A deguvacu o Siedeh. E dua beka na veivakalougatataki nei Tamana ena vukei koya me vinaka cake.
A dabe toka ena dua na idabedabe o Siedeh, ka tabaka na buradelana o Ta.
“Au sa vakalougatataki iko mo kakua ni rere,” a kaya o Ta. “Kau vakalougatataki iko mo lomani ira na nomu lewe ni kalasi vou. Ni ra sa kilai iko, era na lomani iko talega.”
A curumi Siedeh e dua na yalo malua. A vakila o koya ni vosa nei tamana sai koya na ka e vinakata na Tamada Vakalomalagi me rogoca.
Ni oti na veivakalougatataki, a vukei Siedeh o Na me vuli mai na nona leqa ena math. Sega ni dede sa yalovakacegu o Siedeh.
Ena siga ka tarava e koronivuli, a nanuma o Siedeh na nona veivakalougatataki ka tovolea me yalodoudou. A matadredredre vei ira na nona lewe ni kalasi. Ni vakaraitaka na loloma, e vakila ni sega ni rerevaki ira vakalevu! Eso vei ira era daumaka sara. A cakacaka vakaukauwa me vuli, ka sega ni dede sa vinaka cake talega na nona maka.
Ni cava na yabaki vakavuli, a levu sara na nona itokani o Siedeh. A marau ni a vukei koya na Tamada Vakalomalagi me yalodoudou. Ka sa vakavinavinaka ni rawa ni dau ciqoma e veigauna na veivakalougatataki ni kaukauwa ni matabete me vukei koya.
Droini mai vei Susan Keeter