Ripresentem Jisas
Deved i bin fraet tumas blong pasem sakramen blong fas taem blong hem.
Deved i bin sidaon long fas laen blong ol jea blong jos mo stap muvum leg blong hem. Hem i bin fraet tumas. Hem i jes livim Praemeri mo kam olsem wan dikon. Ol bigfala boe oli stap soem long Deved mo ol narafala boe we oli gat 11 yia long olsem blong pasem sakramen.
Sik blong Deved long saed blong tingting i bin mekem se samtaem i had long hem blong stap lanem niufala samting. Blong muvaot long Praemeri i bin had tumas long hem. Mo naoia blong stap pasem sakramen hem i kam wan samting we i mekem hem i stap fraet. ?Wanem nao bae i hapen sapos hem i mekem wan mistek mo evriwan oli laf long hem?
Jekob, wan long ol bigfala boe ia, i bin sidaon narasaed long Deved. Jekob i talem, “Mifala i glad tumas blong gat yu long tim blong mifala,”. Hem i bin hae faef wetem Deved. “Bae yu save mekem gud.”
Deved i smael. Toktok ia i mekem hem i harem gud smol.
Ol narafala yangfala man oli bin soem long olgeta we oli gat 11 yia, wanem blong mekem. Oli soem long olgeta wea blong go long hem mo wanem laen blong jea blong oli pasem i go long olgeta. Oli praktis blong wokbaot i go daon mo bitwin long ol jea blong japel. Oli soem long ol boe ia olsem wanem blong holem wan sakramen trei.
“!Mama, luk!” Deved i talem taem hem i bin kasem haos. Hem i leftemap han blong hem. “Hemia hem i olsem wanem blong holem wan trei. Yu mas mekem gud olsem. From mi ripresentem Jisas, mo mi wantem soem respek blong mi .”
Ol yang man oli bin stap praktis wetem Deved mo ol narafala boe afta long jos long evri Sandei, mo long ol aktiviti long naet blong evri wik. Oli stap wokbaot gotru long ples we oli mas go long hem. Deved i bin praktisim long olsem wanem blong holem wan trei.
I no longtaem, dei ia i kam we bae hem i save pasem sakramen long fas taem blong hem.
“?Yu filim olsem wanem abaot hemia?” Papa i askem.
“Mi fraet yet,” Deved i talem.
“Yumi save toktokraon long wanem yu bin mekem blong stap rere,” Papa i talem.
“Okei, yumi bin ridim skripja abaot prishud olsem wan famli, “Deved i talem. “Blong stap holem prishud i minim se, mi ripresentem Jisas. Mi katemaot ol fingganel blong mi mekem se ol han blong mi oli luk naes. !Mo mi bin praktis fulap taem!”
“Mi luk olsem se yu bin rere gud wantaem ia,” Papa i talem.
Taem hem i kasem jos, Deved i sidaon long fored blong ol laen blong jea wetem ol narafala dikon. Jekob i sidaon narasaed long hem. Deved i tingbaot olsem wanem bae hem i ripresentem Jisas taem hem i pasem sakramen. ?Wanem bae i hapen sapos hem i stap mesmestem yet?” Hariap nomo, hem i lukluk long Jekob mo Jekob i smaellong hem. Deved i smael i gobak long hem mo hem i pulum longfala win.
Taem hem i taem blong pasem sakramen, Jekob i helpem Deved blong pasem trei i go daon long ol fas laen blong ol jea. Deved hem i bin glad tumas blong save gat wan we i stap wetem hem.
Deved i lukluk i go long ol pipol taem hem i bin stap pasem sakramen. Plante long olgeta oli bin putum ol hed blong olgeta i stap daon long fasin blong soem respek. Sam oli stap tingting hevi. Deved i bin filim plante pis. Hem i bin ripresentem Jisas. Hem i talem tangkyu from se hem i save helpem ol narawan blong tingbaot Jisas Kraes.
Ol pikja oli kam long Donald Wu