“Talem wan Prea, Helamán”
Hem i fas dei blong Helamán long skul. Hem i werem fevret set blong hem, mo hem i gat wan niu pensel. Niufala tija blong hem i letem hem blong sidaon long wan tebol wetem ol fren blong hem Sylvester, Jorge, mo Miguel. Hem i wan gudfala dei.
“Putum aot ol samting blong yufala,” Señora Martínez i talem. “Hem i taem blong kakae lanj nao.”
Famli blong Helamán oli prea oltaem tugeta bifo oli kakae. Hem i leftemap han blong hem. “?Señora Ma rtínez, bae yumi prea bifo yumi kakae?”
Señora Martínez i smael long Helamán. “Yu save talem prea long kaekae blong yu sapos yu wantem.”
Helamán mo ol fren blong hem oli openem ol lanj blong olgeta.
“?Wanem ia prea?” Sylvester i askem.
“Hem i taem we yu stap toktok long Papa long Heven,” Helamán i talem. “Hem i wei ia we yumi talem tangkyu long Hem from kaekae blong yumi.”
Miguel i askem, “?Be yu save talem wan prea blong yumi evriwan?”.
Helamán i foldem ol han blong hem. Ol tri fren blong hem oli foldem han blong olgeta tu. Helamán i sarem ae blong hem mo benem hed blong hem i godaon. Ol fren blong hem oli mekem semmak.
Afta Helamán i talem wan prea, olsem we famli blong hem oli bin mekem. Hem i talem tangkyu long Papa we i stap long Heven from gudfala dei we oli gat mo from ol kaekae blong lanj blong olgeta. Hem i askem wan blesing long kaekae blong olgeta. Hem i endem long nem blong Jisas Kraes mo talem, “Amen.”
Sylvester, Jorge, mo Miguel oli lukluk i go antap.
“Yufala save talem amen tu,” Helamán i talem.
Ol fren blong hem oli smael mo talem, “Amen.”
Long nekis dei long lanj taem, Sylvester i se, “Talem wan prea, Helamán.”
“Yes, talem wan prea, Helamán,” Miguel i talem. Jorge i agri tu.
Mo Helamán i prea bakegen. Naoia hem i talem tangkyu we mama blong hem i bin mekem sanwij blong ham mo jis, we hem i fevret blong hem. Hem i askem Papa we i stap long Heven blong helpem olgeta blong lanem samting long klas long dei ia.
Evri lanj, ol fren blong Helamán oli talem se, “Talem wan prea, Helamán.” Mo evri dei, Helamán i talem wan prea. Hem i prea wetem ol fren blong hem evri dei blong wan wik.
Long nekis Mandei long lanj taem, Miguel i talem se, “Tedei bae mi prea.”
Helamán i sapraes. Hem i foldem ol han blong hem, i klosem ol ae blong hem, benem hed blong hem i go daon, mo lisin taem Miguel i prea.
Miguel i statem blong talem, “Dia Papa we i stap long Heven.” Hem i talem tangkyu from kaekae blong olgeta mo askem Hem blong blesem. Hem i endem long nem blong Jisas Kraes mo talem, “Amen.”
“Amen!” Helamán mo Jorge i talem.
“Amen,” Sylvester i talem. “Mi no save se yu save prea.”
“Mi lanem taem mi stap lisin long Helamán,” Miguel i talem. “Mi askem papa mo mama blong mi sapos mi i save talem wan prea blong kaekae blong mifala long hom. Olgeta oli talem yes, mo mi prea olsem we Helamán i mekem.”
“Tru ia,” Sylvester i talem. “Mi ting se bae mi askem papa mo mama blong mi sapos mi save talem wan prea long ol kaekae blong mifala tu.”
“!Mi tu!” Jorge i talem.
Helamán i smael. Hem i glad se hem i bin save helpem ol fren blong hem blong laenem blong toktok wetem Papa we i stap long Heven. Hem i save se Papa we i stap long Heven i lavem hem, mo Papa we i stap long Heven i lavem ol fren blong hem tu.
Pikja droing i kam long Josh Talbot