!Tumas Noes!
Evri samting oli mekem tumas noes. ?Wea ples nao bae Luk i save faenem pis?
Luk i harem nogud. Evri samting oli mekem tumas noes. Ol brata blong hem, Tadd mo John, tufala i stap raorao bakegen. Iven taem hem i stap aotsaed long haos, hem i save harem laod voes blong olgeta we i kamaot long doa blong rum blong olgeta. Mo sista blong hem, Lizzie, i tanem miusik blong hem i go laod bakegen. Tamp. Tamp. Tamp. Hem i harem oltaem bit blong not ia we i no laod tumas.
Luk i traem blong askem ol brata blong hem blong oli stop. “Go long we,” Tadd i talem long hem. Afta Luk i askem Lizzie blong tanem miusik blong hem i go daon. Hem i jes tanem miusik i go antap mo i moa laod.
Luk i wantem blong go aotsaed blong hem i save tingting. Be i stap ren.
I gat wan kwaet ples we Luk i save go long hem. Yestedei papa mo mama blong hem oli givim wan rum we i blong hemwan—wan we hem i no serem wetem Tadd mo John. Rum ia i stap long graon floa daon. I naf nomo long wan bed mo wan tebol. Be long rum blong hem, Luk i save jusum blong sarem doa mo ronwe long ol noes.
Luk i godaon long graon floa long niufala rum blong hem. Hem i lukluk raon long ol bokis we hem i karem i kam daon faswan. Hem i luk wan pikja blong Jisas we i kamaot smol long wan bokis. Luk i bin karem pikja ia long dei we i bin kasem baptaes. Oltaem taem hem i luk long pikja ia, i mekem hem i filim pis.
Luk i karemaot pikja ia aot long bokis. I putum long tebol. Afta hem i nildaon blong prea. “Papa long Heven,” Luk i talem, “samtaem i gat tumas noes long ples ia. Plis helpem mi blong faenem sam pis.”
Luk i ledaon long bed blong hem. Hem i tingbaot Jisas. Hem i bin lanem long praemeri se Jisas I save stap kolosap long hem. Mo we Tabu Spirit i oltaem givim pis.
Bae i no longtaem papa mo mama tufala i kambak long wok. Bae oli toktok long Tadd mo John. Faet bae i stop. Blong wan smol taem. Bae oli toktok long Lizzie. Lizzie bae i tanem miusik blong hem i go daon. Blong wan smol taem. Kasem taem we mama mo papa tufala i go bakegen
Be blong taem naoia, Luk i ledaon long bed. Hem i lukluk long pikja blong Jisas. “Plis, Papa long Heven,” Luk i talem long sopsop voes nomo. “Plis helpem mi blong filim pis no mata wanem i stap hapen long nara pat blong haos ia.”
I no longtaem i pas, i gat wan i noknok long doa blong bed rum blong hem. “?Mi save kam insaed?” Mama i askem. “?Olsem wanem, yu oraet?”
“Tadd mo John tufala i faet bakegen,” Luk i talem. “Mo Lizzie i plei long miusik blong hem i laod tumas.”
“!Mi save! ?I had tumas long yu?” Mama i talem. “Papa i stap toktok long ol brata blong yu naoia. Mo mi bae mi toktok long Lizzie tedei long naet. Be bifo hemia, mi wantem blong save se yu harem olsem wanem.”
“Mi ORAET. Mi glad mi gat rum ia,” Luk i talem.
“Mi tu,” Mama i talem. “Mi luk yu putum wan pikja blong Jisas long tebol.”
Luk i smael. “Mi bin mekem. Mo Hem bae i helpem mi mekem rum blong mi i kam wan ples blong pis.”
Ol pikja droing oli kam long Bryan Beach