Olsem Wanem Siedah i gat Strong Paoa long Tingting
Seideh i bin fraet tumas blong toktok wetem ol fren blong hem long klas.
Siedeh i pulum gud win mo afta wokbaot i go insaed long niufala klasrum blong hem. Hem i fes dei blong hem long klas fo.
Las yia, Siedah i bin stap long klas tu. Hem i bin mekem i gud tumas mekem se skul blong hem i letem hem blong pasem klas tri i go long klas fo. Siedeh i bin glad tumas blong laenem ol had matematik problem mo ridim moa buk long klas fo. Be hem i no bin hapi se bae hem i lego ol olfala fren blong hem.
Taem hem i lukluk raon long rum, Siedeh i filim smol. Evri niu fren blong hem long klas oli bigwan mo tolwan bitim hem. ?Be olsem wanem sapos hem i no pat blong olgeta?
Hem i faenem wan tebol mo sidaon. Wan tolfala gel i sidaon klosap long hem. “Halo,” Siedeh talem.
“Yu stap mekem wanem long ples ia?” gel ia i askem. “Mi ting se yu sud stap long klas tri.”
“Skul i muvum mi, mi pasem wan klas i kam long klas ia,” Siedeh i talem wetem fraet.
Gel ia i mekem fes blong hem i nogud long hem. “Yes, be mi no kea se yu save samting bitim mi. Yu yu wan bebe nomo yet.”
Seideh i harem nogud tumas insaed long hem. Blong ful wik ia, hem i fraet tumas blong toktok long eni fren blong hem long klas. Evri taem taem hem i harem wan i stap laf o stap toktok smolsmol, hem i mekem fes blong hem i nogud. Ating oli stap talem ol nogud samting abaot hem.
Afta we hem i ting se evri samting i gud nao, Siedeh i kasem bak risal blong matematik tes blong hem. Hem i krae taem hem i luk mak blong hem. Matematik hem i fevret sabjek blong hem. Hem i neva karem wan mak we i daon tumas olsem bifo.
Taem hem i kasem haos, Siedeh i nomo save holem taet krae blong hem. “Mi nogat wan fren,” hem i talem long papa mo mama blong hem. “Mi no pat blong klas fo ia. Mi mi no smat inaf.”
“Mi sore we hem i had tumas,” mama blong Siedeh i talem. “Be yu yu smat. Mo yu stap lan yet ia.”
Siedeh i waepem ol ae blong hem. “Mi wantem go bak daon long klas 3.”
Papa blong hem i stap kwaet blong smol taem. “Yu wantem wan prishud blesing?” hem i askem.
Siedeh i agri. Ating wan blesing long Papa blong hem bae helpem hem blong filim gud.
Siedeh i sidaon long wan jea, mo Papa i putum ol han blong hem antap long hed blong hem.
“Mi blesem yu se bae yu no fraet,” Papa i talem. “Mo mi blesem yu blong lavem ol niufala fren blong yu long klas. Taem bae oli stat blong save yu, bae oli lavem yu tu.”
Wan filing blong pis i fulumap Siedeh. Hem i filim se ol toktok blong papa blong hem hem i wanem we Papa we i stap long Heven i wantem hem blong harem.
Afta long blesing, Mama i helpem Siedeh blong wok long ol matematik problem blong hem. Afta Siedeh i filim gud.
Long nekis dei long skul, Siedeh i tingbaot blesing blong hem mo traem blong gat strong paoa long tingting. Hem i smael long ol fren blong hem long klas. !Taem hem i soem lav, hem i filim se hem i nomo fraet long olgeta! Sam long olgeta oli gud tumas long hem. Hem i bin wok had blong lan, mo afta ol mak blong hem oli jenis oli kam moa gud.
Long en blong yia, Siedeh i gat plante fren. Hem i glad we Papa we i stap long Heven i bin helpem hem blong gat strong paoa long tingting. Mo hem i glad we oltaem hem i gat blesing blong prishud paoa blong helpem hem.
Ol pikja droing oli kam long Susan Keeter