“Ana Akoi Carousel ,” Rao, Maati 2023, 28–29.
Ana Akoi Carousel
E iango Damien bwa e riai n aki takutaku nakon mwanena.
Ngke e nakonako Damien inanon te tabo n takakaro, e ongo te katangitangi ae kakukurei. Tibuna teunaine e kairia ngaia ma mwanena, Adele, bwa a na toka iaon kaintekatekan te aoti are e minomino ae mamaten nanona. Iai iaona bwaai n takakaro aika a kaunga ma taian biti aika mronron. E ingainga nanon Damien n tuanga Adele aron te takakaro iai.
N te tai ae aki maan ao a tei n te rain. Kaintekatekan te aoti are e minomino e rangi ni bubura ao n rawata karana, ma taian aoti aika a uarereke aika a kaaraki iaona. Ataei aika a wingare a tekateka iaon aoti aika a uarereke ao ni katiotioi baia ngkai a buti ni kakatobibi.
“Ngkana ko rinea te aoti ae uarereke are e rengerenge mai itinaniku ko kona n takakaro ma biiti ake a mronron!” Damien e tuanga Adele. “Ko nora te kai are a taua ataei? Ao ko nora te mwaane ma biiti ake a mronron?”
Damien e kotea te tia mwakuri. E tei irarikin kaintekatekan te aoti are e minomino n anga biiti ake a mronron. Ngke a buti iaon aoti ake a minomino, a kataia ataei ni karinii aia kai inanon biiti ake a mronron bwa a onga n reke irouia. Ni katoatai are e reke irouia te biti are e mronron, e a manga katea riki ae boou teuana te tia mwakuri.
E uboi baina Adele. “I tangiria n rawei ni kabane biiti ake a mronron!” e taku.
N tokina ao a roko i moan te rain. Ma ai bon ti teuana te aoti ae mwawa iaon te aoti are e minomino.
“Damien,” e taku Tibuia te unaine, “e aera ti aki angan Adele n toka iaon are te kabanea aei ngkai e bon tuai man totoka iaona mai imwaina? Ko kona n toka iaon are imwiina.”
“O ngaia,” e karaurau n taetae Damien. E mataku iroun te tia mwakuri ni buoka Adele n toka iaon te aoti ae uarereke ae burauun n raneanea. Imwiina te tia mwakuri e angan Adele te kai are e na rawei iai biiti aika mronron.
E tang te katangitang, ao e a moana butina te aoti are e minomino. E tei Damien ni matakuakina Adele ni iterana are teuana ma tibuia te unaine. Ma Adele e taua te kai ni kareea! Irarikin are e na taua te kai man bwain tauana are e bubura, e taua man are abakina, n tabona ae kairariki are e kabonganaaki n rawea iai te biti are e mronron.
“Adele, bita am kai nako moana” e takarua. Ma e tara n aki ongo Adele ibuakon te kaberoro. Ngke e a roko irarikin te biti are e mronron, e boo ana kai ma ngaia. Ma e bon rangi ni bubura bwain tauana ao n aki kona n tau inanon te biti are e mronron.
“Adele, am kai!” E kataia riki Damien. “Ko aki kona n rawei biiti ake a mronron ngkana ko taua n aekan anne!”
Ma e aki ongo Adele. E bon ti moangare ao ni ngarengare ngke e buti ni mino te aoti are e minomino. Ana kai e ti bo ma te biti are e mronron ni katoatai. Bon akea teuana ae e reke irouna.
E ngurengure Damien. E kabane buakaa ana tai Adele! Ngke bon ngaia ae e toka iaon te aoti are e minomino, e na bon rawei ni kabane taian biti ake a mronron.
Ngke e a toki taain te buti, e biri nakon Adele.
“I tuangko aron tauakin te kai!” e takarua. “E aera ko aki ongo irou? E bure aron are ko karaoia!”
E aki takarua Adele nakon Damien. E aki tang. E tii tei n aki kakamwakuri ao n taraa n uarereke, n uarereke, n uarereke.
E bukibuki manawan Damien, ao ubuna e rikirake n kabuebue. E maraki nanona n nora Adele ngkai aki reke biiti ake a mronron! Ma are ai bon tibwa a na moan tai. Irarikina, e tara n ae e rangi ni kukurei. Ni karokoa ngkai.
E namakina te aki rau Damien. E iango bwa e riai n aki takutaku nakon Adele.
“Kabwara au bure,” e taetae n rangi ni karaurau. “E bon aki raoiroi ae I karaoia.”
E tararake Adele.
“E uara ngkana I anganiko tabeua ibuobuoki n aron karekean biiti ake a mronron?” E taku Damien. “N na tekateka irarikim n aoti ake a minomino ao ni buokiko.”
E katoutoua atuuna Adele.
Ngkanne Damien e kaitaraa tibuna te unaine. “E kona n reke uoua ara tiketi bwa e aonga Adele ni kataia riki?”
E wingare tibuia te unaine. “Eng.”
E riki te karaki aei i Buranti.
Kamataata n te tamnei iroun Violet Lemay