“Te Kangaanga n te Tibwatibwa,” Rao, Maati 2023, 36–37.
Te Kangaanga n te Tibwatibwa
“Te tibwatibwa bon te kawai ni kaotia nakon temanna ae ko tabe ibukiia.”
Mwakeru, mwakeru, mwakeru Andrew e kabauta ana popcorn ao ni manga abutia ni kaona baina.
Tarina ae e ikawai, Caleb, e kiba nako aon te kaintekateka ae maraurau. “Ei, anganai tabeua?”
E aki tanako Andrew man te TV. “Ko aki.”
“O, anne ngkoe. Ko kona n tibwaia.”
E kanakoa baina Caleb nakon te boora, ma e katikia nako Andrew.
“Akea! I a tia n tuangko mai mwaaina. Tai manga tuangai!”
“E tamaroa.” E teirake Caleb ao ni kitana te ru.
N te bong are imwiina, e nakon te umwa ni kuka Andrew. Caleb e karaoai tabeua sushi ma te raiti, te tiwiita, ao te iriko man te tiin.
E moana ni ngenge Andrew. “I kona ni kanii tabeua?”
“Ko aki,” e taku Caleb.
Anne e karika unin Andrew ae korakora. E biri rikaaki n nako n tuanga Dad.
“Bukin tera e rangi n tinanikubeka Caleb?” e titiraki.
E matanun Dad. “I noria ngkoananoa ae ko rawa n tibwaa am popcorn. Bukin tera e riai Caleb ni ibuobuoki ma ngkoe imwiin are ko rawa ni ibuobuoki ma ngaia?”
“Ibukina bwa bon tariu!” E taku Andrew.
“Ngkanne e aera ko aki ibuobuoki ma ngaia?”
“Bwa e bon tuai man ibuobuoki ma ngai naba! Irarikina, I bon karaoia bon ti ibukiu, tiaki ibukina,” e taku Andrew. Ma e namakina teutana ae e aki kukurei. Tao e bon aki raoiroi irouna ngke e aki ibuobuoki.
“Ko ataia ae i Korea, e rangi ni kakabwaki te tibwatibwa?” E titiraki Tamana. Ana utu Andrew bon kaain Korea. “Te tibwatibwa bon te kawai ni kaotia nakon temanna ae ko tabe ibukiia. Ngaia are ngkana ko rawa n tibwatibwa, titebo ma ko taekinna bwa ko aki tabe ibukiia.”
“Ma I bon tabe ibukin Caleb.”
E iango Andrew bwa tera ae e na karaoia Iesu. E urinngnga bwa e kanga Iesu n tangiriia aomata ni kabane—nakoia naba naake aki akoi Nakoina.
“I iangoia bwa N ang ibuobuoki ma Caleb ningabong ao n noria bwa tera ae e na riki.” e tuanga Dad.
E wingare Dad. “I taku bwa anne te iango ae raoiroi.”
Ngke e a wene n te tairiki anne Andrew, e iangoi bwaai aika a tamaroa ae e na kona ni karaoi nakon Caleb. E rangi ni kukurei ngkai E nang moana ana tibwatibwa!
N te ingabong are imwiina, e uti Andrew ma te kubanako. E a tia ni karaoa te kaingabong Caleb bon ibukina!
“E marooro Dad ma ngai iaon te tibwatibwa,” e taku Caleb. “I tangiria ni karaoa ae e tamaroa. Ngaia are I a karaoa aio ibukim.”
“Ko rabwa!” E taku Andrew. “I tangiria ni karaoa ae tamaroa naba.”
Imwiina riki n te bong anne, Andrew ao Caleb a mataku n te tamnei. Andrew e kariaia Caleb bwa e na rinea aia tamnei. Ngkanne e a karaoa te popcorn tii ibukin Caleb! E taraa nanon te boora. Titebo ma e kangai te popcorn, “KANAI!” Ma e aki anaa teutana naba Andrew. E angan Caleb te boora ao n taku, “Aio bon tii ibukim. I kabwara au bure ngke I aki tibwaia mai imwaina.”
Andrew e ibuobuoki ma Caleb inanon nako te wiiki anne. E kariaia Caleb bwa e na warekii ana boki. E kariaia Caleb bwa e na kabonganai ana been are e bubura tanena. E kariaia Caleb bwa e na takakaro n ana bwai n tatakaro ae e mamate nanona iai. E angan naba Caleb ana tai ae bati ngke a uaia n takakro iaon te kaombiuta.
Mwaitin te tai are e tibwatibwa iai Adrew ma Caleb, bon mwaitin naba are e tibwaia Caleb ma ngaia! N te tai ae e aki maan a uaia ni karaoi bwaai aika a raraoi imarenaia ni katoa tai. E ataia Andrew bwa Tamara are i Karawa e buokia n tibwa are irouna ma tarina. E aki kororaoi Andrew n aron Iesu, ma e kekeiaki n riki n ai Arona ni katoa bong.
E riki te karaki aei i Amerika.
Kamatataaki n te Tamnei iroun Adam Howling