Te Rao nakon te Rao

Biiri nakon te Ota

Iroun Unimwaane Peter M. Johnson

Man te Itingaun

E anaaki man “Running toward the Light” (witeo), ChurchofJesusChrist.org.

Kamataata n te tamnei iroun Adam Nickel

I ikawairake n te tabo ae kakamaaku ae mwakoron te kawa ae bubura. N te bong teuana I nakonako nakon te reirei ma tabeua te mwane inanon buau. A tangitang koin inanon mwanangau.

I riai n rirarikiia ataeinimwaane aika a ikawai ake kaain te kaeng. I kataia ni karaoa ae akea au kangaanga. I kataia n aki maaku. Ma a ongo te bwai ae tangitang. A tangira te tianti ngaia are a biri ni kaeai.

I kabanea birimwaakau bwa n a raroanako. I biri nakon te kawai ae e bono aona ni kabane. I kona n nora te ota n tokin te kawai anne, ngaia are I a biri nakon te ota. N te tai ae tawe a toki ni biri rimwiiu, ao I a maiu.

Aio ae e a riki bwa ai te baeten inanon maiu. I biri nako man te bwai ae buakaka, ao I ukeuke ibukin te bwai ae tamaroa. N tabetai e roko irou te bwarannano, ma I keiaki n reitinako ni kakaea te ota.

Ngke I nakon te kaoreti, I kaina te tiim ni bwatiketiboro. Angiia kaain au tiim bon kaain Ana Ekaretia Iesu Kristo ibukiia Aika Itiaki ni Boong aika Kaitira. I reiakina taekan te euangkerio mai irouia. I reiakinna bwa Ngai bon natin Te Atua. Nanona bwa I kona n tokanikai iaon au kakaewenako ao n riki n tamaroa. I kaaina te Ekaretia. Mai imwiin te tai anne, I a tia ni kataia n tainako n riki n ai aron Tamara are i Karawa ao Natina, Iesu Kristo. Ao ko kona ni karaoa naba anne!

Ngkana ko biiri nakon te ota, bon iai te kaantaninga. Ko ataia ae ko biri nakon te korakora, te rau, ao te kukurei. Ti bane ni kainanoa ae ti na biri nakon te ota.

Te Kaunga n te Bwatiketiboro

Unimwaane Johnson e reiakina taekan te euangkerio n ana tai ni takakaro n te bwatiketiboro. Ngkai e a nakoim!

1. Koreanako te tikuea ae inano ao rukurukuma ni karao te boro.

2. Ikaruoruo ni karenako te boro nako nanon te boora.

3. Ngkana e rin te boro inanon te booa, kauka te beeba ao kaekaa te titiraki are iaona!

• Tera teuana te kawai ao ko kona iai ni iriira Tamara are i Karawa?

• Ningai ae ko a tia iai n rinea te eti?

• Ko kanga n nora otan Tamara are i Karawa inanon maium?

• Tera ae e buokiko n namakina ana tangira Tamara are i Karawa?

• Ko na kanga n tibwaua otan te Tia Kamaiu ma aomata tabeman?

• Korea oin am titiraki!