“Nakomai, Iriirai Waaki ni Kakukurei,” Rao, Maati 2023, 6–7.
Nakomai, Iriirai Waaki ni Kakukurei
Ibukin bootakin te utu n te tairiki, kamatebwai ni booki aika tabu, ke tii ibukin te kaungaunga!
Te Angibuaka
Kamataata n te tamnei iroun Katy Dockrill
Ibukin Mataio 8; Mareko 2–4; Ruka 7
Karaki: Wareka karakinan Iesu Kristo ngke e katoka te angibuaka n te iteraniba 46 ke ni Mareko 4:36–41. Marooro iaon kawai ae Iesu e uota nakoim te rau.
Anene: “I Namakina Ana Tangira au Tia Kamaiu” (Aia Boki n Anene Ataei, 74–75)
Waaki ni Kakukurei: Teei ni kamronron ao taua mangeen te burangketi. Katuka te boro iaon te burangketi ao karaurau kakibakibaa, n aron te kaibuke ae waerake ao n ruo iaon te nao. Ikaruoruo n tuangiia kaain te kurubu bwa a na kabaiti, karaurau, ke “n raoi.”
Te Kakai n te Takakaro ni Keeti
Ibukin Mataio 9–10; Mareko 5; Ruka 9
Karaki: Iesu Kristo e karaoi kakai aika a mwaiti. E kamaiua te mwaane ae e aki kona n nakonako. E kauta te ataeinaine man te mate. E kamaiuia mwaane aika a mataki. (Taraa Mataio 9.) Tera riki kakai ae e karaoi Iesu?
Anene: “Reiai Karakinan Iesu” (Aia Boki n Anene Ataei,, 57)
Waaki ni Kakukurei: Korei tabeua ana kakai Iesu iaon mwakoro ni beeba ao neia inanon te boora. Anaa te beeba, wareka te kakai are iaona, ao korea tamneina. Ataei ake tabeman a kona ni ketinna bwa te kakai raa!
Ikotaki ni Mwakuri
Ibukin Mataio 11–12; Ruka 11
Karaki: E taku Iesu Kristo, “E aoraoi amou, ao e bebete uotau” (Mataio 11:30). Te amo e buokiia maan aika uoman n uaia ni katika te bwai teuana. Ngkana ti rineia ni iriira Iesu, E kona ni buokiira n tain katakira.
Anene: “If the Savior Stood Beside Me” (ChurchofJesusChrist.org)
Waaki ni Kakukurei: Tuanga temanna bwa e na kamwainga te bwai ae e tinebu man iteran te ru nakon iterana. Ngkanne kariaia bwa a na kamwainga te bwai anne ma aia ibuobuoki tabeman. Marooro iaona bwa a kanga uotara aika a tinebu ni bebete ngkana ti rairaki nakon te Tia Kamaiu ibukin Ana ibuobuoki.
Korea Oin Am Kaikonaki!
Karaki: Iesu e reirei taekan te euangkerio ni kabonganai karaki aika aranaki bwa “kaikonaki.” Teuana te karaki ae E taekina bon iaon ae e kangaa uaan te makeke n rikirake nakon te aroka ae e bubura (taraa Mataio 13:31–32). Tera ae E reiakinna? Tera riki kaikonaki ae e reirei iaona Iesu?
Anene: “If I Listen with My Heart” (ChurchofJesusChrist.org)
Waaki ni Kakukurei: Kaikonaki a kona ni buokiira ni mataata n te euangkerio n ae tamaroa riki. Rairia nakon iteraniba 8 ni korea oin am kaikonaki. Tibwa am kaikonaki ma kaain am utu ke raoraom.
E a Riaon te Mwaiti
Ibukin Mataio 14; Mareko 6; Ioane 5–6
Karaki: Te taina Iesu Kristo e kabwanina te bong ni kabongnga n reireiniia aomata. A bane ni baki aomata. Ma ti iai irouia nimaua mwakoro ni kariki ao uoman te ika. Iesu e kakabwaiaa te kariki ao te ika, ao ana reirei a tibwaia ma aomata. E bon tau mwaitin te amwarake ibukiia ae raka iaon 5,000 te aomata! (Taraa Mataio 14:15–21).
Anene: “I’m Trying to Be like Jesus” (Children’s Songbook, 78–79)
Waaki ni Kakukurei: Karaoa am kariki ae mamaten nanom, ke kata teuana are iaon iteraniba 8. Ko noria bwa e kanga te iiti ae a uarereke ni karika te kariki ae e bubura. E kanga Iesu ni karika am mwakuri ae uarereke bwa e na bubura?