Ataei ao Kairake

Au Kouru n Ana Boki Moomon

Iroun Vebika H., 8 ana ririki, Utah, USA

Tamnein ubun te ataeinaine ae ngare ma te buraeniman ae mainaina i atuuna

Te ataeinaine ae wareware ni booki aika tabu ma te bwai ni kakauongo i taningana

Kamataata n te tamnei iroun Rachel Hoffman-Bayles

I katea te kouru bwa n a wareka Ana Boki Moomon imwaain bwabetitoakiu, n aron mwaneu ae ikawai ao tariu. Ma ngke e roko te COVID, I aki bati n rereirei, ao te wareware e a moana ni kangaanga ibukiu. Ana Boki Moomon e rawata inanona taeka aika a kangaanga, ao I kainanoa buokau.

Ngkanne au karo ao ngai e a reke ara iango. I kabongana te Gospel Library app iaon ana tareboon tinau n ongora nakon Ana Boki Moomon. Ti kawaeremwea tangin te bwana bwa I aonga ni kona ni wareware ao ni iriria n ae bebete. I toki naba n tain te wareware ao ni mataku n taian witeo ake a toka iaon te app. Ni katoa tai ngkana I wareware, I korea mwiina iaon te tiaata. I mamarooro nakon tinau iaon te bwai are I warekia. E rangi ni kaunga!

E a moana n nakoraoi au wareware, ma I taku bwa I aki kona ni bane imwain au bwabetito. Ngaia are I taku bwa irarikin are n a bane imwain au bwabetito, N a bane imwain banen te ririki (are bon teuana te namwakaina imwiina). I reitinako ni wareware. N tabetai tinau ke tariu a wareware ma ngai.

N Ritembwa 31, e a bane irou Ana Boki Moomon! A utu ni kabae a takarua ni kukurei. Imwiina I nako n au ruu n tataro. I titiraki ngkana e koaua Ana Boki Moomon, ao I namakina te kukurei.

I ataia bwa Tamara are i Karawa e kakauongo ngkana I tataro. I a ataia bwa a tangirai au karo ake i karawa. I ataia bwa Ana Boki Moomon bon ana taeka te Atua, ao e tangiriira Iesu.