“Kawakina Ana Berita,” Rao, Maati 2023, 10–11.
Kawakina Ana Berita
I a tia ni kewe nakon Dad. Tera mwiina?
E riki te karaki aei i Ghana.
“Ai ti onoua te bong imwain au bwabetito!” E taku Happiness. E a moana n roko te bong anne!
“Ko a tauraoi?” e titiraki Dad.
“I taku” e kaeka Happiness.
“Ngkana ko bwabetitoaki, ko karaoa te berita ae tabu,” e taku Dad. “Ko uringnga bwa tera nanon anne?”
“Bon te berita, eti anne?”
E katoutoua atuuna Dad. “Eti! Ko berita bwa ko na iriira Iesu Kristo ao ni kawakin tua. E berita Tamara are i Karawa bwa E na kakabwaiako ao e na buokiko.”
E wingare Happiness. E ataia bwa bon te berita ae kakawaki. E kukurei ngkai E nang karaoia!
N tokina e a roko ana bong ni bwabetito. E oneia Happines nakon kunikai aika a mainaina. Uoman riki ataei aika a na bwabetitoaki naba. A bane ni mataku ngkai e a onrake n ran te tabo ni bwabetito.
Ngke e a roko ana tai, a ruo nako nanon te tabo ni bwabetito Happines ao Dad. E taekina tataron te bwabetito Dad. Imwiina e koona bwairina Happiness, ao Dad e kateboa nako naano iaan te ran.
Ngke e waerake, e namakina te kukurei inanona Happiness! E tangiria ni kawakina ana berita ni iriira Iesu. E tangiria n namakina te itiaki aei ao ni kukurei n aki toki. E aki tangiria ni manga karaoa te rinerine ae kairua riki.
Tabeua te bong imwiina, e uti Happiness ao ni kamaeua te bwai are e kabueea te ran, bwa e aonga n tebotebo. E anaa te tai ae maan bwa e na kabuebue te ran. Ngaia are e a kamaeua te TV Happiness. E tangiria ni mataku n tamnein te katuun ngkai e tataninga.
E ngarengare Happines ngkai e mataku n taiani man aika a taetae iaon te tikuriin. E rangi ni kakamanga te tamnei! Ngaia are e a maninga taekan te bwai are e kabueea te ran.
Teuana te aoa imwiina, e a roko Dad inanon te ru. “Ai maanra te tai ae e maiu iai te bwai ni kabuebuean te ran?” e titiraki.
E tararake Happiness. E a tia n rangi ni maan ni mataku n te TV nakon are e iangoia!
“E aki rangi ni maan,” e taku Happiness. “Ti inanon tabeua te miniti.” E kamatea te TV ao ni biri n nako n tebotebo.
Ma n nikiran te bong anne, e namakina te aki rau inanona Happiness. Imwiin ana bwabetito e tangiria n aki manga karaoa te rinerine ae kairua. Ma e a tibwa tia ni kewe nakon Dad!
E kanakoa angina Happiness. E ataia bwa tera ae e riai ni karaoia.
“O, Dad,” e taku Happiness. “I a tia n taekina te kewe. I katuka ni kamaeua bwain kabuebuean te ran n te tai ae maan, ma bon tiaki nanou. Kabwara au bure.”
“E Raoiroi. Ko rabwa ngkai ko kaongoai,” e taku Dad.
“I namakina ae I kairua ibukina bwa I urua au berita n te bwabetito,” e taku Happiness.
E tekateka Dad ma Happiness iaon te kaintekateka ae maraurau. “Ngke ko bwabetitoaki, ko aki berita bwa ko na kororaoi. Ko berita bwa ko na keiaki korakora ni iriira Iesu.”
E katoutoua atuuna Happines. Anne e anganna riki te namakin ae tamaroa.
“ Ao ko ataia bwa tera ae ko kona ni karaoia ngkana ko karaoa te rinerine ae kairua?” E titiraki Dad.
“Raira nanom?” e kaeka Happiness.
“Eti anne! Ngkana ti raira nanora, Tamara are i Karawa e na kabwarai ara bure. Ngkanne ti kona ni manga itiaki n aron are n te bong are ti bwabetitoaki iai. Te rairannano bon mwakoron kawakinan am berita n am bwabetito.”
E wingare Happiness. “N nang tataro ao ni butiia Tamara are i Karawa bwa E na kabwarai au bure.” E kukurei bwa e kona ni kawakin ana berita n te bwabetito.
Kamataata n te tamnei iroun Macky Pamintuan