“Tawōr in Tōmak,” Jera, Juļae 2023, 10–11.
Tawōr in Tōmak
Dashanel ekar kōņaan bwe tōmak eo an ilo Kraist en aitok im kajoor.
Bwebwenato in ekar bōk jikin ilo Jamaica.
Dashanel ekar jipan̄ ļeo jein bōk pilawe nut eo jān um̧ eo. Ekar kanooj enno bwin!
Innām liin ekar ron̄ juon kōļaļļaļ ilo kōjām eo. “Mijenede ro rā!” lio jein ekar ikkūr.
Dashanel ekar ettōrļo̧k n̄an kōjām eo. Liin ekar iakwe n̄e mijenede ro raar etal. Liin ekar aolep iien ewōr juon an en̄jake em̧m̧an n̄e rej loļo̧k. Jet iien rej bōktok ikkure ko n̄an e im ro jein n̄an ikkure.
“Tyrell ekar bar kōm̧m̧an pilawe nut!” Dashanel ekar ba. Ļeo jein em̧m̧an ippān kar kōm̧m̧an m̧ōn̄ā ippān n̄an mijenede ro.
“Ijjab maron̄ kōttar n̄an kajjieon̄ jidik,” Elder Colas ekar ba. E im Elder Yusaki raar deļo̧n̄ļo̧k im jijet ioon būļoor eo. Dashanel, ļeo jein im lio jein, im Jineer raar jijet turejetier.
“Ta eo jej tōn kōm̧m̧an n̄an katak eo rainin?” Dashanel ekar kajjitōk.
Elder Yusaki ekar kwaļo̧ktok juon ejouj in kab ko. “Jej tōn naaj kalōk juon tawōr in tōmak. Kajjojo kab kein rej jutak kōn juon men jemaron̄ kōm̧m̧ane n̄an kalōk tōmak eo ad ilo Jisōs Kraist.”
Elder Yusaki ekar jino ejaki kab ko n̄an juon tawōr. Dashanel ekar lo bwe kab ko ewōr naan ko ie āinwōt “jar,” “ekkatak jeje ko rekwojarjar” im “m̧ōn jar” kar jeje ioer.
“Men kein rej aolep men ko kwar kajjitōk ippam̧ n̄an kōm̧m̧ani āinwōt juon baam̧le,” liin ekar ba.
“Ejim̧we,” Elder Colas ekar ba. “N̄e kwoj kōm̧m̧ane men kein, kwoj kalōk tōmak eo am̧ ilo Jisōs Kraist.”
Dashanel im ro jein ekar aer iien n̄an kalōk tawōr ko aer make kōn kab ko ke raar ron̄jake katak eo.
Ālkin an mijenede ro em̧m̧akūt, Dashanel ekar ļōmņak kōn ta eo raar katakin. Liin ekar kōņaan bwe tōmak eo an ilo Kraist en erom aitok im kajoor, ejja āinwōt tawōr eo ekar kalōke.
Ke ekar eļļāļo̧k allōn̄ ko, Dashanel ekar ekkatak eļapļo̧k im ļapļo̧k kōn gospel eo jān mijenede ro. Liin ekar jino etal n̄an m̧ōn jar eo ippān baam̧le eo an. Liin ekar pijaik an tawōr in tōmak eo an aitokļo̧k im kajoorļo̧k.
Juon raan ālkin an mijenede ro em̧m̧akūt, Dashanel ekar kōnono ippān Jinen. “Imaron̄ ke peptaij?” liin ekar kajjitōk.
“Kwoj m̧ool kwopojak?” Jinen ekar kajjitōk.
“Aaet,” Dashnel ekar ba. “Ikōņaan ļoor Jisōs.”
“Em̧m̧an,” Jinen eaar ba. “Eļan̄n̄e kwoj kōņaan, kwomaron̄ peptaij.”
Ļaddik eo im leddik eo jein Dashnael raar kāālet n̄an peptaij barāinwōt. M̧am̧a ekar ba āinwōt ejjan̄in de pojak n̄an an peptaij.
Ilo raan in peptaij eo aer, Dashanel im ro jein raar kōņak nuknuk mouj ko. Er kajjojo raar kijenmej ilo kōttar n̄an kar peptaij.
Ke ekar iien peptaij eo an Dashanel, Elder Yusaki ekar jipan̄ e n̄an lowaan dān eo. Innām ekar ba naan ko an jar in peptaij eo im door laļļo̧k e n̄an ium̧win dān eo. Ke Dashanel ekar wallōn̄tak, liin ekar jab bōjrak an mejen ettōn̄dikdik! Liin ekar en̄jake m̧ōņōņō im erreo. Liin ekar jab kōņaan meļo̧kļo̧k en̄jake in.
Dashanel ekar kōm̧m̧ani wōt men ko n̄an kalōk tōmak eo an ilo Jisōs Kraist. Liin ej riiti jeje ko rekwojarjar ippān baam̧le eo an. Liin ekar jar n̄an Jemedwōj Ilan̄. Liin ekar kōm̧m̧ani men ko rejouj n̄an ro jet. Im liin ekar keememej ekōjkan an kar en̄jake ke ekar peptaij. Liin ekar kōņaan bwe Jinen en bōk en̄jake jab in wōt.
“M̧am̧a, etke kwojjab peptaij?” Dashanel ekar kajjitōk juon raan.
M̧am̧a ekar ikōn̄ ium̧win juon minit. “Kwar kōm̧m̧ane juon waanjon̄ak em̧m̧an n̄an n̄a. Im kiiō ij aikuj in kōm̧m̧ane juon waanjon̄ak em̧m̧an n̄an kwe,” liin ekar ba. “Ij kōņaan peptaij barāinwōt.”
Ilo raan in peptaij eo an Jinen, Dashanel ekar kanooj in m̧ōņōņō. Ke M̧am̧a ekar waļo̧ktok jān dān eo, aolep raar ettōn̄ dikdik. Kiiō aolepān baam̧le eo an Dashanel remaron̄ kalōk tawōr in tōmak ko aer ippān doon.
Kōmeļeļe ko jān Alyssa Tallent