“Karreo Jikin Kallib Eo,” Jera, Juļae 2023, 4–5.
Karreo Jikin Kallib Eo
“Wōn eo jemaron̄ kajjitōk ippān n̄an jipan̄ ippād?”
Bwebwenato in ekar bōk jikin ilo England.
Jonah ekar kan̄ bukōn in m̧ōn̄ā eo kijen āliktata im ettōn̄ dikdik. Kōjota ekar aolep iien ļapļo̧k an kalimomo n̄e mijenede ro rej itok.
“Kōm kōņaan kwaļo̧k juon ennaan ippāmi kōn jerbal in jipan̄,” Sister Kearl ekar ba. “Etke jerbal n̄an ro jet ej aorōk?”
“Kōnke ej kōm̧m̧an bwe Jisōs en m̧ōņōņō!” Eliza ekar ba, leddik eo jatin Jonah.
“Kwojim̧we! Ej kōm̧m̧an An lukkuun m̧ōņōņō. Im n̄e jej jipan̄ ro jet, ej kōm̧m̧an ad m̧ōņōņō barāinwōt,” Sister Christensen ekar ba. “Kwojeļā juon eo ej aikuj jipan̄?”
Jonah ekar ļōmņak ium̧win juon minit. “Ijjab maron̄ ļōmņak kōn juon armej, bōtaab jikin kallib eo an jikuuļ eo am emaron̄ aikuj jipan̄”
“Ļōmņak em̧m̧an,” Jinen ekar ba.
Jikuuļ eo an Jonah ewōr juon an jikin kallib ijo rej maron̄ kōm̧m̧ani m̧akūtkūt ko inam̧ōj. Bōtaab ejjeļo̧k juon ekar kōjparok jikin kallib eo ium̧win juon tōre aitok. Mar ko raar aittok. Ekar kanooj lōn̄ ujooj ko barāinwōt.
“Kōmij kōņaan jipan̄ kom̧ kake!” Sister Kearl ekar ba. “Wōn eo jemaron̄ kajjitōk ippān n̄an jipan̄ ippād?”
“Ro rilikiid!” Jacob ekar ba, eo jein Jonah ekar ba.
“Im kūlaaj in Būraimere eo ad,” Jonah ekar ba.
Raan eo tok juon, Jinen ekar kōnono ippān juon armej ilo jikuuļ eo n̄an bōk mālim. Raar kāāet juon raan n̄an karreoik jiki kallib eo. Innām jinen ekar jipan̄ Jonah im ro jein kūrļo̧k ro rilikier im kūlaaj in Būraimere eo.
Jejjo wiik tok ālik, Jonah im baam̧le eo an kar ioon mijenede ro ilo jikuuļ eo. Ro rilikier im ro m̧ōttan ilo Būraimere raar pād bar ijo. Ekar iien n̄an jino jerbal!
Jonah ej kōļaak juon pea in kuļob roba killep in kōm̧m̧an jikin kallib. “M̧am̧a, lale. Pā kā peiū rekkilep!”
M̧am̧a ekar ettōn̄. “Kwomaron̄ kōjerbal pā ikkilep ko n̄an jipan̄ jepanļo̧ki mar kein.”
Liin ekar leļo̧k n̄an Jonah jet kein jepjep ko me raar āinwōt jijej ko rekkilep. Innām liin ekar jipan̄ e jepeļo̧k ra ko remej.
“Menin ekam̧ōņōņō,” Jonah ekar ba.
Ke Jonah ekar jepanļo̧k, Eliza ekar jipan̄ kibwij peļaakin jikin kallib eo. Jacob ekar jipan̄ Jemān kalōk juon im̧ōn bao. Ro jet raar kūntak ujooj ko im kar ain aļaļ ko. Raar likūt er ilo pāāk būļajtiik killep būļu ko. Jekdo̧o̧n ļaddik eo jatin Jonah, Ezra, kar jipan̄ kōn ebbōk dekā ko.
Ejjab to jikin kallib eo ekar erreo. Jonah ekar bwini pāāk ko raar kanni. “Ewōr 13 pāāk ko!” ekar ba. “Kōm kar karreoik eļap kopej.”
Sister Christensen ekar ettōn̄ dikdik. “Kiiō kōmij aikuj m̧ajōļ ikkilep ko an aolep n̄an jipan̄ kōm ineek men kein n̄an wa eo.”
Jonah, Jacob, im Eliza kar kajjojo bōk juon pāāk. Jonah ekar en̄jake m̧ōņōņō ke ekar kotak eo āliktata n̄an lowaan wa eo. Jipan̄ mijenede ro ekar kalimomo. Ekar kōņaan erom juon mijenede juon raan barāinwōt. M̧ae iien en, ekar kanooj lōn̄ wāween ko emaron̄ in kar jerbal. Ļein ekar jab maron̄ kōttar n̄an ļōmņak kōn būroojāāk eo an tok juon!
Kōmeļeļe jān Samara Hardy