“Bwebwenato ko kōn Peptaij,” Jera, Juļae 2023, 30–31.
Bwebwenato ko kōn Peptaij
“Juon bainiier ej juon eo m̧oktata ej kōm̧m̧ane juon men,” M̧am̧a ekar ba.
Bwebwenato in ekar bōk jikin ilo USA.
Mary ej ero̧o̧lol im nōbar nuknuk mouj eo an ilo kūlaaj eo. Ekar ejja nuknuk eo wōt jinen ekar kōņake ilo peptaij eo an. Jibū-Jibūn Marluce ekar kōm̧m̧ane bwe en dettan wōt Mary. Kiiō Mary emaron̄ kōņake ilo peptaij eo an make.
“Kwolukkuun aibojoj!” Jinen ekar bōk pein Mary im bar kōro̧o̧lole.
Mary ekar ettōn̄ dikdik. “Imaron̄ ke kōņake wōt aolepān rainin?”
“Jen kakoņe n̄an am̧ kōņake n̄an peptaij eo am̧ bwe en em̧m̧an im erreo wōt, OK?” Jinen eaar ba.
“Em̧m̧an.” Mary ekar peptaij ke ekar tōpar ruwalitōk an iiō, im liin ekar bwe an pojak kiiō. Liin ekar etal n̄an Būraimere, riiti jeje ko rekwojarjar, im em̧ool etal n̄an peptaij ko an ro m̧ōttan. Bōtaab raan in ļotak eo an ekar āinwōt ettoļo̧k wōt!
Mary ekar kōkān̄itn̄itļo̧k ippān jinen ioon sofa eo. “M̧am̧a, ewi rūttoam̧ ke kwar peptaij?”
Ikar 16.”
“Wow! Etke ekar to am̧ kōttar?”
Jinen ekar kanooj keeņtok im atbakwoj Mary. “Kōnke ikar jab jeļā kōn Kabun̄ eo kar kōjepļaaktok an Jisōs Kraist m̧ae iien eo. Bōtaab ikar jino etal n̄an m̧akūtkūt ko an Kabun̄ in ippān jet m̧ōtta. Im ke ekar ļapļo̧k aō ekkatak, ekar ļapļok aō kōņaan peptaij!”
“Etke?” Mary eaar kajjitōk.
“Kōnke ikar kōņaan bwe en wōr juon aō baam̧le indeeo.” M̧am̧a ekar jitōn̄ļo̧k pija eo an tampeļ ej etoto itulōn̄ier. “Ikar ekkatak bwe juon raan imaron̄ in liāp n̄an baam̧le eo aō ilo juon tampeļ indeeo. Wōr juon baam̧le indeeo ekar ikdeelel eo aō eļap tata. Im peptaij ekar bun̄tōn eo jinoin tata! Kiiō ettōņak eo aō ej tōn kūrm̧ool.”
Mary ekar mejen ettōn̄dikdik. “Epād ippam̧ jemam̧, Mallory,im nin̄nin̄ Maeva! Im n̄a barāinwōt, ejim̧we.”
“Aaet, ejim̧we. Im Būbū Angela.”
“Būbū ekar ke peptaij ippam̧?”
“Ekar kōttar jejjo iiō ko. Bōtaab jabdewōt iien kōm ekar etal turin tampeļ ko, kōm kar kōņaan bōjrak im lale ļo̧k er.”
Mary ekar ļōmņak kōn an jinen im jibūn lale ļo̧k tampeļ ko ippān doon. “Im ak baba? Ewi rūtoon ke ekar peptaij?”
“Ekar 11.”
“Im ekar jokwe ilo Brazil?”
“Ejim̧we,” M̧am̧a ekar ba. “Elōn̄ armej ro aolepān laļ in rej ekkatak kōn Jisōs im peptaij. Elōn̄ iaer rej bainiier ro.”
“Bainiier?”
“Bainiier ej juon eo me ej eo kein kajuon n̄an kōm̧m̧ane juon men,” M̧am̧a ekar kōmeļeļeik.
Mary ekar ļōmņak kake. “Ak ekōjkan am̧ armej eo m̧oktata ilo baam̧le eo am̧ kar peptaij?”
M̧am̧a ekar m̧ajidjid im ettōn̄.
Innām, Baba ekar deļo̧n̄tok n̄an ruum̧ eo im ekar koboobtok ilo sofa eo.
“Baba, kwar ke juon bainiier n̄an baam̧le eo am̧?”
“Jidik. Ālkin aō kar peptaij, ikar lo bwe Būbū Rosimere ekar juon membōr kadede an kabun̄ in ad. Bōtaab liin ekar jab etal ium̧win iiō ko.”
“‘M̧ool ke? “Ta eo ekar waļo̧k?”
“Ikar jino etal n̄an jar. Innām ļōm̧aro jeiū im jatū raar jino etal, innām Būbū Rosimere barāinwōt. Em̧ool Jibū-Jibū Marluce ekar kobatok!”
Mary ekar ļōmņak an Baba etal n̄an jar ippān make, innām bōktok elōn̄ iaan baam̧le eo an ippān.
“Wow,” Mary ekar ba. “Ij kōņaan ron̄jake bwebwenato ko am̧. Rej kōm̧m̧an bwe in aaet lo̧udin̄din̄ ļo̧k n̄an peptaij.”
“Kom̧m̧ool kōn am̧ kajjitōk ippām aolep kajjitōk kein, Mary,” Baba ekar ba. “Kiiō jemaron̄ ke kajjitōk juon ippam̧?”
Mary ekar em̧ajidjid. Ta eo renaaj kar kajjitōk?
“Etke kwoj kōņaan peptaij?”
Mary ekar ļōmņak kōn ta eo ekar ekkatak jān jeje ko rekwojarjar im ekōjkan an kar en̄jake ilo m̧ōn jar eo. “Kōnke ikōņaan ļoor Jisōs im pād ippān baam̧le eo aō n̄an indeeo.”
M̧am̧a im Baba erro jim̧or kar mejen ettōn̄dikdik, im Mary ekar kelo̧k ioon jinen im jemen im atbakwōj er. “Ijjab maron̄ kōttar!”
Kōmeļeļe ko jān Tammie Lyon