“Jemen Magnolia Ekabwilōn̄lōn̄,” Jera, Juļae 2023, 40–41.
Jemen Magnolia Ekabwilōn̄lōn̄
“Jet ajri raar ba kōmij jab juon baam̧le em̧m̧an kōnke Jema ekar jab juon membōr in kabun̄ eo am.”
Bwebwenato in ekar bōk jikin ilo USA.
“Magnolia! Lily!” Baba ekar ikkūr. “Iien n̄an jeje ko rekwojarjar im jar!”
Magnolia ekar jijet ioon būļoor eo turin kidu eo nejier, Raindrop. Lilly ekar libobo ilo būļan̄kōj eo an em̧m̧an tata.
Iien riit jeje ko rekwojarjar an baam̧ļe ekar kam̧ōņōņō. Jet iien rej kōm̧m̧an kōl kōn bwebwenato ko an jeje ko rekwojarjar ippān doon. Ekar jipan̄ Magnolia pijaik bwebwenato ko. Koba, Raindrop aolep iien ekar jipan̄ ke ekar wōr menin mour ko ilo bwebwenato ko!
Baba ekar kōpeļļo̧k jeje ko rekwojarjar an im riiti juon eoon. Innām ekar jakeļo̧k n̄an Magnolia Baibōļ kileplep im eddo eo. Raar kajjojo bōk koņaan doon ilo riit.
“Im kwom̧win jouj n̄an doon,” Magnolia ekar riit.*
Ekar kōmmōn̄. Armej raar jab aolep iiien jouj n̄an e ilo m̧ōn jar eo.
“M̧am̧a, Baba, imaron̄ ke kōnono ippāmiro kōn juon men?” liin ekar kajjitōk.
“Aaet,” M̧am̧a ekar ba. “Ta ņe?”
“Ilo Būraimere inne, jet ajri raar jiron̄ eō jejab juon baam̧le em̧m̧an kōnke Baba ejjab juon membōr in kabun̄ in ad.”
Jemen Magnolia ekar uwaan juon bar kabun̄. Ekar ilo̧k n̄an kweilo̧k in kwojkwoj eo ippān baam̧le aer ilo Jabōt ko. Ekar kōnono kōn Jetōb Kwojarjar ilo peptaij ko an Lilly im Magnolia. Aolep raar ba ekar kōm̧m̧ane juon jerbal em̧m̧an. Ekar juon baba eo ekabwilōn̄lōn̄.
“Ta eo raar ba ekar kōm̧m̧an aō kōņaan jan̄.” Magnolia ekar m̧ōtat. “Etke armej ro raar lukkuun in lāj?”
M̧am̧a im Baba raar kalimjōk doon.
“Ij m̧ōņōņō bwe kwar jiron̄ kōm ta eo ekar waļo̧k,” Baba ekar ba. “M̧am̧a im n̄a kōm̧ro ej lukkuun iakwe doon. Im baam̧le eo ad ej lukkuun aorōk n̄an kōm̧ro.”
M̧am̧a ekar em̧ajidjid. “Im baam̧le ao ad ej aorōk n̄an Jemedwōj Ilan̄ barāinwōt. Ej ej iakwe aolep ajri ro Nejin.”
Raindrop ekar koboobobļo̧k ippān Magnolia. Liin ekar kirūj lo̧jilin̄in.
“Jemedwōj Ilan̄ ejeļā kajjied, im E ejeļā jej iakwe doon,” Baba ekar ba. “Ejjeļo̧k baam̧le eweppān, bōtaab jej kajjieon̄e ijo em̧m̧an tata ippād.”
“Bōtaab ej kōmettak wōt n̄e armej rej ba men ko rōlāj kōn baam̧le eo ad,” Magnolia ekar ba. “Jisōs Kraist eaar katakin kōj n̄an jouj n̄an ro aolep. Ba men ko rōlāj ejjab āinwōt ļoor Jisōs.”
“Kwōjim̧we,” Baba ekar ba. “Bōlen n̄e kwoj kōņaan ba juon men elej, kwomaron̄ keememej ekōjkan am̧ kar en̄jake n̄e ro jet raar lāj n̄an kwe. Innām kwomaron̄ ba juon men eo ejouj ijello̧kin.”
Magnolia ekar bōk kūtuwōn eļap. “Em̧m̧an.” Liin ekar m̧ōņōņō bwe emaron̄ kar kōnono n̄an jinen im jemen.
“Iien n̄an an baam̧le eo atbakwōj doon ilo juon kumi” Baba ekar kanōkļo̧k Lili im Magnolia n̄an juon atbakwōj kileplep im kar kanooj keeņ erro. M̧am̧a eo ekar atbakwōj erjel aolep. Raindrop ekar ettōr jepooļ aolep.
“Ijjab maron̄ menono!” Lily ekar kōm̧m̧an kōjak. Magnolia ekar ettōn̄.
“Kiiō ekakeememej eō—an wōn iien in n̄an riit?” Baba eo ekar kajjitōk. Ekar kōtļo̧k leddik ro im kotak jeje ko rekwojarjar an.
“Aō iien!” Lily ekar ba. “Im ej an Baba iien n̄an jar.”
Ke ekar dedeļo̧k aer riit, aolep raar bukwelōlō n̄an jar. Magnolia ekar en̄jake aenōm̧m̧an ke ekar ron̄jake an Jemen ba jar eo. Liin ekar jeļā bwe Jemedwōj Ilan̄ ekar iakwe baam̧le eo an.
Kōmeļeļe ko jān Constanza Basaluzzo