“Kofta n̄an Kōraelep,” Jera, Juļae 2023, 12–13.
Kofta n̄an Kōraelep
“Ta eo kwoj m̧ōn̄ā ekōjak?”
Bwebwenato in ekar bōk jikin ilo USA.
Roy ekar jijet laļļo̧k ilo tebōļ eo im kōpeļļo̧k pāāk in kōraelep eo an. Baam̧le eo an rej kab em̧m̧akūtļo̧k, im menin ekar raan eo an kein kajuon ilo jikuuļ kāāl eo an. Jinen ekar kōm̧m̧ane m̧ōn̄ā in Armenia eo enno tata ippān, kofta. Ekar lo̧udin̄din̄ n̄an e n̄an kan̄e!
Roy ekar mejaļļo̧k peba wax eo ekar kitimi kofta eo. Ekar āinwōt juon meatball eo aitok, ewaidikdik. E ekar iakwe bwin kein kāre ko kar kōmatte n̄an lowaan jālele eo. Im ron̄ eo ioļap kar kōm̧m̧an an āinwōt juon wejeļ edik. Ekar likūiti ilo tien im uki. Innām ekar bōke im kiji. Enno!
“A,” juon ļaddik ekar jijet iturejet in tebōļ eo ekar ba. “Ta ņe ekōjak kwoj kan̄e?”
Roy ekar m̧ōkaj an kūl būrōrō turin mejān. “Kōraelep eo aō.”
“Ekwe, ejjab lukkuun em̧m̧an.” Ļaddik eo ekar ettōn̄.
Roy ekar jab jeļā ta eo en ba. Ekar jab jeļā bwe ejjeļo̧k bar juon ijin ekar m̧ōn̄ā kofta. Ekar jab kōņaan bwe ren ļōmņak ekar wudiāākāk! Kōn menin ekar doorļo̧k kōraelep eo an im ettōr nam̧ōjļo̧k n̄an iien kakkije eo.
Ālkin jikuuļ, Roy ekar lo an jinen kadiwōj kobban bo̧o̧k ko.
“Ijjab bar kōņaan ebbōk kofta n̄an jikuuļ,” Roy ekar ba.
“Etke?” Jinen eaar kajjitōk. “Men eo enno tata ippam̧.”
Roy ekar jiron̄ liin ta eo ekar waļo̧k ilo jikuuļ. “Ekar kanooj in kajookok!”
“Joļo̧k aō bōd bwe ekar waļo̧k,” Jinen ekar ba. “Elōn̄ wōt armej ijin rejjan̄in kar m̧ōn̄ā kofta. Ta eo n̄e jaar leļo̧k n̄an ajri ro jet juon iien n̄an kajjieon̄e jet?”
“Etke?” Roy ekar kajjitōk. “Reban kan̄e.”
“Ekwe, kwojjab maron̄ jeļā ijello̧kin kwoj kajjitōk! Ijeļā epen n̄an kōm̧m̧an m̧ōttam̧ ro rekāāļ. Bōtaab jej aolep ajri ro nejin Anij. Jet iien jej aikuj baj jeļā eļapļo̧k kajjien doon.”
Roy ekar ļōmņak kake. Ekar jab kōņaaan bwe ren ettōn̄ kake. Bōtaab ekar jab kōņaan leļo̧k n̄an ajri ro ilo iien kōraelep juon iien em̧m̧an n̄an meļeļe. Im ilo m̧ool kofta eo ekar kaijooļoļ.
Ekar em̧ajidjid. “EM̧M̧AN. Jen bar kōm̧m̧ane jet.”
Raan eo tok juon ilo iien kōraelep eo, Roy ekar bōk kūtuwōn. Ekar jijet laļļo̧k turin ļaddik eo ekar ettōn̄ kake.
Roy ekar kōpeļļo̧k pāāk in kōraelep eo an. “Elōn̄ ke iaami ekōņaan kajjieon̄ jidik in m̧ōn̄ā in Armenia?”
Ajri ro jet raar ain doon ke Roy ekar kōpeļļo̧k kofta eo.
“Inaaj kajjieon̄ jidik,” ļaddik eo ekar ba.
“Bar n̄a,” juon leddik ekar kakkobaba. Roy ekar ajej to ajej tak kofta eo bwe aolep ren maron̄ kajjieon̄e. Innām raar aolep kij jidik.
“Menin elukkuun in enno̧!” ļaddik eo ekar ba. “Etan am̧ ba?”
“Kofta,” Roy ekar ba.
“Em̧m̧an!” Ļaddik eo ekar ettōn̄ dikdik. “N̄a John. Kwoj kōņaan ke ikkure ilo iien kakkije eo?”
Roy emaron̄ in kar em̧ajidjid kōn an obrak lo̧n̄iin. Jinen ekar jim̧we—raar aolep ajri ro nejin Anij barāinwōt! Im kwaļo̧ke ekar jipan̄ e kōm̧man m̧ōttan ālkin.
Kōmeļeļe jān Mark Robison