“Peran jān Jetōb Kwojarjar,” Jera, Juļae 2023, 29.
Kar jeje jān Kwe
Peran jān Jetōb Kwojarjar
Kōmeļeļe jān Toby Newsome
Ke iar dik, taktō ro raar jiron̄ ro jinō im jema ke ekar wōr aō selective mutism. Ej juon anixiety disorder eo me ekōm̧m̧an bwe en pen n̄an kōnono n̄an ro jet. Imaron̄ kōnono wōt n̄an ro uwaan baam̧le eo aō repaak.
Ikar en̄jake inepata aolep iien, eļap tata eļan̄n̄e juon ej kōnono n̄an n̄a. Jar aolep iien ekar kōm̧m̧an an em̧m̧anļo̧k aō mour im kaenōm̧m̧an eō. Ikar barāinwōt lo juon rikapilōk ilo jikuuļ eo n̄an jipan̄. Bōtaab ikar en̄jake āinwōt ekar jab em̧m̧anļo̧k aō pād n̄an jidik. Inan̄in kar wōt jidik ebbweer, bōtaab ikar dāpij wōt tōmak.
Raan in ļotak eo aō kein kōruwalitōk ekar epaaktok. Ro jinō im jema raar idajon̄jon̄e eō n̄an riiti Bok in Mormon im jar n̄an jipan̄ eō jokāālet eļan̄n̄e ij aikuj in kar peptaij. Aolep bon̄ ikar jar n̄an kajjitōk eļan̄n̄e ij aikuj kar peptaij. Aolep iien ikar bōk ejja uwaak eo wōt—juon en̄jake emeņeņ, meļak ilo būruō. Ikar jeļā Jetōb Kwojarjar eo ekar jiron̄ eō bwe peptaij ekar kāālet eo ejim̧we.
Ke kar letok n̄an eō menin letok eo an Jetōb Kwojarjar ālkin peptaij eo aō, ikar ron̄ naan ko an kōjatdikdik, iakwe, im kōketak. Ikar jeļā bwe Jetōb Kwojarjar eo enaaj kar kaenōm̧m̧an eō im letok n̄an eō peran.
Ikar jokāālet n̄an kajjieon̄ kōnono n̄an eo m̧ōtta tata, Charlie. Ikar kajjieon̄ aolepān wiik eo, bōtaab ekar kanooj pen. Bōtaab juon raan Charlie im n̄a kar makeļo̧k ilo jikin kallib eo an jikuuļ. Ikar ba juon jar ejjeļo̧k ainikien ilo būruō. Jema Ilan̄, jouj im jipan̄ eō ba diktata juon naan.
Innām ikar kōpeļļo̧k lo̧n̄iū im ba, “A, Charlie!” Ekar lukkuun in kar bwilōn̄. Iaar lukkuun m̧ōņōņō!
Ālkin raan eo, ekar pidodoļo̧k n̄an kadedeļo̧k elōn̄ļo̧k kōttōpar ko. Ejjab to ikar kōnono n̄an enan̄in aolep armej! Ij kam̧m̧oolol bwe Jetōb Kwojarjar eo ekar letok n̄an eō peran n̄an kōnono n̄an Charlie.