“Kuļab eo an Kōkōm̧anm̧anļo̧k Men ko,” Jera, Juļae 2023, 20–21.
Kuļab eo an Kōkōm̧anm̧anļo̧k Men ko
Josie ekar jeļā juon wāween emaron̄ kar ļoor waanjon̄ak eo an Jisōs Kraist ie.
Bwebwenato in ekar bōk jikin ilo USA.
Josie ekar jijet ippān lio rilikin Ashlyn ium̧win juon wōjke inam̧ōjen m̧weo im̧ōn.
“Iakwe n̄e enaaj kar wōr men jemaron̄ kōm̧m̧ane n̄an kōm̧m̧an jāān,” Josie ekar ba.
“Bōlen jemaron̄ kōm̧m̧an jāān kōn kōm̧m̧ani men ko n̄an armej,” Ashlyn ekar ba.
“Ta eo n̄e kōjro kōm̧mane bwe en juon kuļab?” Josie em̧ōkaj an kar jutak. “Āinwōt juon kuļab in lale menin mour ak kuļab in ketetal kidu.”
“Jemaron̄ kōm̧m̧ane aolep kain men kein,” Ashlyn ekar ba. “Iien otemjej armej ro rej aikuj jipan̄. Im renaaj kōļļāik kōj.”
Ashlyn ekar jim̧we. Aolep raan Josie ekar elolo armej ro me raar aikuj jipan̄.
Ejjab to Josie ekar bar wōr juon an ļōmņak. Liin ekar en̄jake okmeņeņ itulowa. Ej kakeememej e kōn peptaij eo an iiō eo ļo̧k. Liin ekar kallim̧ur n̄an iien otemjej keememej Jisōs im ļoor waanjon̄ak eo An. Liin ekar jeļā juon wāween emaron̄ kar kōm̧mane.
“Ta eo n̄e ewōr juon ad kuļab me ej jipan̄ armej ro kōn ejjeļo̧k wōņāān?” Josie ekar kajjitōk. En̄jake okmeņeņ eo ekar kajoorļo̧k.
Māj ko mejān Ashlyn raar kabūrōrōļo̧k wōt. “Enaaj lukkuun kam̧ōņōņō,” ekar ba. “Jemaron̄ jipan̄ armej ro ilo jikuuļ im m̧ōn jar eo—eitōn aolep jikin.”
“Jemaron̄ ņa etan Kuļab eo an Kōkōm̧anm̧anļo̧k Men ko!” Josie ekar ba. “Jen jino ilju ilo jikuuļ.”
Raan eo tok juon ilo iien kakkijie eo, Ashlyn im Josie raar ettōrļo̧k n̄an tōrerein jikin ikkure eo.
Kwoj ke lo jabdewōt eo jemaron̄ jipan̄ e?” Ashlyn ekar jutak ioon m̧aan addi in neen im reiļo̧k n̄an jikin jikāāt eo.
“Ijjan̄n.” Josie ekar lale aen in etoto ko im dijiruwaļo̧k eo. Ajri ro raar jikāāt im pitoto. Raar kappūn̄n̄i bo̧o̧ļ ko im ikkure kōn to in ekkāke ko. Ejjeļo̧k juon ekar lukkuun aikuji jipan̄ eo aer. Aolep raar āinwōt ewōr juon m̧ōttaer. Innām lio ekar lo juon leddik edikļo̧k ippān make kōn juon to in ekkāke.
Josie ekar jibwe pein Ashlyn. Lale ijuweo!”
Josie im Ashlyn raar lo to in ekkāke ko im etal n̄an ippān leddik eo.
“Iakwe. N̄a Josie.”
Im n̄a Ashlyn. Etam̧?”
Leddik eo ekar āinwōt eilbōk. “N̄a Leslie.”
“Kwoj ke kōņaan ikkure ippām?” Josie ekar kwaļo̧k juon to in ekkāke.
Leslie ekar ettōn̄. “Aaet!”
Ashlyn im Josie raar katakin Leslie jet wāween ko rekāāl n̄an ekkāke kōn to. Ke peeļ eo ekar jan̄, raar bar iak iakwe doon. Ekar em̧m̧an an Josie en̄jake itulowa. Liin ekar jeļā ekar Jetōb Kwojarjar.
Ālkin iien eo, jabdewōt iien Josie im Ashlyn raar lo Leslie ilo hallway eo, raar ba iakwe n̄an e.
Josie im Ashlyn raar kappok elōn̄ļo̧k armej n̄an jipan̄. Jet iien rej ba men ko rem̧m̧an n̄an armej ro im kajjieon̄ kam̧ōņōņōik er. Jet iien rej kajjitōk ippān ajri ro n̄an ikkure ippāer.
Juon raan, Josie ekar ettōn̄ n̄an juon ļaddik inam̧ōjen jikuuļ eo. “Em̧man ippa jiln̄ij dinosaur en am̧,” liin ekar ba.
Ļaddik eo kwaļo̧k dekā in n̄iin im reilaļļo̧k n̄an jiln̄ij eo an. “Kom̧m̧ool.”
Ke Josie ekar jijet, ekar kile bwe ekar jab ilo m̧ool ļōmņak kōn kōm̧m̧ane men eo n̄an kuļab eo! Liin ej kab m̧ōj an kōm̧m̧nae.
Josie ekar ļōmņak kōn aolep ro m̧ōttan rekāāl jān ke e im Ashlyn raar jino kuļab eo aer. Josie ekar lukkuun kōņaan jipan̄ armej. Ekar kōm̧man bwe en kōņaan kōļapļo̧k an kōm̧m̧ani men ko rem̧m̧an n̄an ro jet. Kuļab eo an Kōkōm̧anm̧anļo̧k Men ko ekar kōm̧m̧an an em̧m̧anļo̧k. Im menin ekar en̄jake em̧m̧an.
Kōmeļeļe ko jān Tania Rex