“Juon Menin Letok Aorōk,” Jera, O̧kwōj 2023, 18–19.
Juon Menin Letok Aorōk
“Menin ej aikuj in Jetōb Kwojarjar,” Mehrimah ekar ļōmņak.
Bwebwenato in ekar bōk jikin lo France.
“Mehrimah! Fatima! Mijenede ro rā” Jinen ekar ikkūr.
Mehrimah ekar kiil bok in bwebwenato in jeje ko rekwojarjar an im ettōrļo̧k n̄an etōņāāk eo. Mijenede ro rekar katakin baam̧le eo aer kōn Jisōs Kraist. Mehrimah im baam̧le eo an renaaj tōn peptaij ejjab to. Liin ekar kijōrjōr!
Mehrimah ekar jijet ippān baam̧le eo an.
“Rainin jenaaj kōnono kōn Jetōb Kwojarjar,” Elder Moea’i ekar ba. “E ej jipan̄ kōj en̄jake aenōm̧m̧an im kaenōm̧m̧an eo jān Jemedwōj Ilan̄.”
“E ej barāinwōt kōketak kōj n̄an kōm̧m̧ani men ko rem̧m̧an,” Elder Campbell ekar kakobaba. “Im E ej jipan̄ kōj jeļā ta eo ej m̧ool. Bōlen kwar en̄jake Jetōb Kwojarjar eo m̧okta.”
Mehrimah ekar ļōmņak kōn iien eo ekar ekaktak kōn Bok in Mormon. Liin ekar en̄jake aenōm̧m̧an im m̧ōņōņō. Ej wāween an liin kar jeļā ekar m̧ool. Ekar ke Jetōb Kwojarjar eo?
“Ālkin am̧ peptaij, naaj lewaj menin letok eo an Jetōb Kwojarjar,” Elder Moea’i ekar ba. “Ej meļeļe in E emaron̄ iien otemjej pād ippam̧ n̄a jipan̄ eok im tōl eok.”
“Wiik in, kanooj lali ļōmņak ko im en̄jake ko am̧,” Elder Campbell ekar ba. “Pukōt iien ko n̄e Jetōb Kwojarjar eo ej kōnono n̄an kwe.”
Bon̄ōn eo ilo iien jar eo an baam̧le, Mehrimah ekar kile ekōjkan an kar en̄jake itulowa. Liin ekar en̄jake ineem̧m̧an im aenōm̧m̧an. Ekar enan̄in āinwōt juon eo ekar leļo̧k n̄an e juon atbakwōj kileplep. Menin aikuj in kar Jetōb Kwojarjar eo, liin ekar ļōmņak.
Ilo jar ilo Jabōt eo, Mehrimah ekar ron̄jake juon al kōn Jisōs Kraist. Liin ekar en̄jake m̧ōņōņō. Ekar kōm̧m̧an menin an kōņaan jipan̄ armej ro jet. Menin ej aikuj in kar Jetōb Kwojarjar eo barāinwōt, liin ekar ļōmņak.
M̧okta jān kiki, Mehrimah ekar riiti bok in bwebwenato ko an jeje ko rekwojarjar an. Leddik eo jatin, Fatima, ekar kajjitōk bwe en baj e. Mehrimah ekar ba jaab.
Mehrimah eļakkar riit wōt. Bōtaab ekar nana an liin en̄jake kōn an jab ajeej.
“Joļo̧k aō bōd,” ekar jiron̄ Fatima. “Kwoj kōņaan ke riit ippān doon?”
Fatima ekar jijetļo̧k turin. Raar kajjojo riit. Mehrimah ekar en̄jake okmeeņeņ im m̧ōņōņō. Menin aikuj in kar Jetōb Kwojarjar eo, liin ekar ļōmņak.
Āliktata raan in peptaij eo aer ekar jikrōktok. Mehrimah im baam̧le eo an raar etal n̄an m̧ōn jar eo an Kabun̄ in im jānij n̄an nuknuk ko remouj.
Mehrimah ekar peptaij m̧okta. Dān eo ekar m̧ōļo, bōtaab liin ekar lo̧udin̄din̄ n̄an kōm̧m̧ane juon bujen ippān Jemedwōj Ilan̄. Jinen ekar tilim e kōn juon to̧o̧l. Innām liin ekar lale an jinen, jemen, im Fatima kar peptaij.
Mehrimah ekar bar jānij n̄an nuknuk ko an rem̧ōrā. Kiiō ekar iien n̄an an liin kapene.
Mijenede ro raar likūt peier ioon bōran Mehrimah. “Kōmij kapen eok juon membōr in Kabun̄ eo an Jisōs Kraist im Armej ro Rekowjarjar ilo Raan Ko Āliktata,” Elder Campbell ekar ba, “im ba n̄an eok, bōk Jetōb Kwojarjar.” Mehrimah ekar en̄jake okmeeņeņ aolepān ke ekar ron̄jake aolepān kōjeraam̧m̧an eo.
Ālkin kar kapene Mehrimah, jinen ekar atbakwōj liin. “Ejet am̧ en̄jake?”
“Lukkuun em̧m̧an,” Mehrimah ekar ba. “Ālkin aer likut peier ioon bōra, ikar en̄jake juon men, im kar en̄jake āinwōt aenōm̧m̧an.” Liin ekar ettōn̄ dikdik. “Kar en̄jake āinwōt juon ekar jiron̄ eō n̄an mour juon mour em̧m̧an, n̄an jipan̄ armej, im n̄an kōjparok kien ko.”
“Kwojeļā ke ta eo kwar en̄jake?” Jinen eaar kajjitōk.
“Aaet, ijeļā,” Mehrimah ekar ba, māj ko mejān raar ebbōl. “Ekar Jetōb Kwojarjar eo!”
Kōmeļeļe ko jān Alyssa Petersen