“Jejjamin Makeļo̧k Wōt N̄an Jidik,” Jera, O̧kwoj 2023, 22–23.
Jejjamin Makeļo̧k Wōt N̄an Jidik
N̄e Ethan ekar bar metak ilo an ejjeļo̧k juon ekar pād ijo n̄an leļo̧k jipan̄?
Bwebwenato in ekar bōk jikin ilo USA.
Ethan ekar bwijbwiji neen ilo rūjirwaļo̧k eo. Ekar walōn̄ utiejļo̧k im utiejļo̧k. Kōto eo ekar kōm̧m̧an an en̄jake āinwōt ekar keļo̧k!
Innām ekar jan̄ bell eo. Ethan ekar bōk kūtuwōn. E ekar jab pojak n̄an an iien kakkije jidik eo jem̧ļo̧k.
Ajri ro raar jutak ilo ļain eo n̄an bar ro̧o̧l n̄an lowan m̧weo. Ethan ekar kōm̧m̧an bwe rūjirwaļo̧k eo an en rum̧wijļo̧k. Innām ekar toļo̧k jān rūjiriwaļo̧k eo n̄an bar jepļaakļo̧k n̄an kūlaaj eo.
Bōtaab ke neen Ethan ekar an̄ur laļ, ekar en̄jake juon metak ekōmettak ilo neen. Ekar okjak n̄an ioon bwidej. E ekar kajjieon̄ jutak, bōtaab ekar en̄jake an neen āinwōt pād ioon kijeek. Ekar kanooj in metak!
“Jipan̄!” Ethan ekar ekkelo̧k. Kōmejaaļaļ ekar to̧o̧r laļļo̧k ilo jepen. Ajri ro im rūkaki ro raar ettōrļo̧k n̄an jipan̄ e.
“Ta eo kwojake?” juon rūkaki ekar kajjitōk.
“Ebūlak neeū!”
Menin ekar jab iien eo m̧oktata in an Ethan kar būlake juon di. Ilo m̧ool ekar jab kein karuo ak kajilu! Ethan ewōr an nan̄inmej in pidodo an di būlak, juon nan̄inmej me ekar kōm̧m̧an an di ko diin pidodo aer būlak. Jekdo̧o̧n men ko reddik, āinwōt to jān juon jikin eutiej ak itaak ippān juon armej, emaron̄ būlak di ko diin.
“Kōm kar call e ro jinen im jemān n̄an bokļo̧k kwe n̄an juon taktō,” rūkaki eo ekar ba. “Aolep men renaaj Em̧m̧an.”
Ethan ekar mōņōņō bwe armej ro raar pād ijo n̄an jipan̄ e. Neen ekar ļap wōt an metak, bōtaab ekar jeļā enaaj kar pād lo kōjparok.
Jinen im Jemān raar etal n̄an jikuuļ im bōk Ethan n̄an juon taktō. Ekar bōk juon kein jipan̄ (cast) ebūļu n̄an neen im ekar ro̧o̧l n̄an m̧weo n̄an kakkije.
Kōnke neen ekar būlak, Ethan ekar joļo̧k eļap iien ilo jikin an babu. Ekar lōn̄ bok ko n̄an riit Jet iien ro m̧ōttan raar etal n̄an ikkure ikkure ko ippān. Bōtaab ekar jelimo wōt.
Juon bon̄, Ethan ekar ruj im jab maron̄ in kar bar ro̧o̧l in kiki. Ekar kajjieon̄ kakkūje, bōtaab ekar inepata wōt. Ta eo eļan̄n̄e ikar būlake juon di im ejjeļo̧k juon ekar pād ijo, n̄an waanjon̄ak ilo lukwon bon̄? Ethan ekar ļōmņak. Menono eo an ekar ļap an emenono. Ekar en̄jake mijak.
“Baba!” Ethan ekar lam̧ōj.
Jemān ekar ettōrļo̧k n̄an ruum̧ eo an Ethan. “Ta eo kwojake?”
“Imijak,” Ethan ekar ba. “Ta eo eļan̄n̄e ikar bar būlake juon di im ejjeļo̧k juon ijo n̄an jipan̄ eō?”
Jemān ekar jijet turin ioon jikin kiki eo. “Ej juon ļōmņak ekamijak,” ekar ba. “Jekdo̧o̧ņ n̄e jej kajjieon̄ in mejmejkaruo im kōkōm̧anm̧ōņ, men ko renana remaron̄ waļo̧k wōt. Bōtaab jekdo̧o̧n ta, Jemedwōj Ilan̄ ej mije eok.”
“Kōn menin ej meļeļe in E ej aolep iien pād ippam̧?” Ethan ekar ba.
“Ejejjet.” Jemān leļo̧k n̄an Ethan juon atbakoj ilo an kōkōm̧anm̧an.
Ethan ekar ļōmņak kōn ekōjkan an jemān kar m̧ōkaj an itok n̄an jipan̄ e. Ekar jeļā bwe jemān ekar iakwe e im aolep iien kar kōņaan jipan̄ e. Bōlen Jemedwōj Ilan̄ ekar āinwōt in barāinwōt.
Raan eo tok juon, Ethan ekar riiti juon eoon ilo eo Jera māākjin eo. Ej ba, “Kōn menin, kom̧in m̧ōņōņō, im jab mijak, bwe N̄a Irooj Ij pād ippemi, im naaj jutak ippemi.”*
Ethan ekar en̄jake ineem̧man im kōjparok ke ekar riiti jeje ko rekwojarjar, ejja āinwōt an kar en̄jake ke ekar kōnono ippān jemān. Ekar jeļā bwe ekar Jetōb Kwojarjar eo ej kaenōm̧m̧an e. Ekar āinwōt ekar atbakwōj jemān bar juon alen.
Inaaj bōlen būlake elōn̄ļo̧k di ko; Ethan ekar ļōmņak, bōtaab ijjab aikuj in mijak. Ekar jeļā bwe ejjamin naaj makeļo̧k wōt n̄an jidik.
Pija ko jān Simini Blocker