“Raan eo Eļap an Giorgia,” Jera, O̧kwōj 2023, 8–9.
Raan eo Eļap an Giorgia
“Ejjab to inaaj peptaij,” Giorgia ekar ba. “Ejja āinwōt kar Jisōs!”
Bwebwenato in ekar bōk jikin ilo Australia.
Giorgia ekar ettōrļo̧k n̄an ruum̧ eo an ippān Matilda ilikinļo̧k. Ekar aolep iien juon raan ekalimomo n̄e eo m̧ōttan ekar itok n̄an ikkure.
“Jemaron̄ ke ikkure kōn robat eo nejūm̧?” Matilda ekar kajjitōk.
“Aaet!” Giorgia ekar ba. Ej juon iaan men ko rem̧m̧an tata ippān n̄an kōm̧m̧ane.
Ke Giorgia ekar kadiwōjtok robat eo, Matilda ekar lale pija ko ilo wall eo an Giorgia. Liin ekar jitōn̄ļo̧k pija eo ioļapļap.
“Ta eieiō?” liin ekar kajjitōk.
“Ej Jisōs Kraist ke ekar peptaij,” Giorgia ekar ba. “Im ejjab to inaaj peptaij. Ejja āinwōt kar E!”
“Etke kwoj peptaij?” Matilda ekar kajjitōk.
“Kōnke ikōņaan ļoor Jisōs,” Giorgia ekar ba. “N̄e ij peptaij, ej ta eo inaaj kallim̧ur n̄an kōm̧m̧ane!”
Innām Giorgia ekar wōr juon an ļōmņak. “Kwoj kōņaan ke itok n̄an iien peptaij eo aō?”
“Inaaj kajjitōk ippān jinō eļan̄n̄e imaron̄,” Matilda ekar ba.
Raan in peptaij eo an Giorgia ekar epaaktok im epaaktok. Liin ekar riit jān bok in bwebwenato in jeje ko rekwojarjar an im etal n̄an Būraimere aolep wiik. Ālkin an liin kar ba jar in kiki ko an, liin ekar reilo̧k n̄an pija eo an Jisōs. Liin em̧m̧an ippān pijaikļo̧k ewi wāween an nej kar peptaij.
Jabōt eo m̧okta jān peptaij eo an, Giorgia ekar kōm̧m̧ane intōrpiu in peptaij eo an. Liin im ro jinen im jemen raar kōnono ippān bisop eo ilo opiij eo an. Ekar kajjitōk ippān liin jet kajjitōk ko n̄an jipan̄ e kanooj lale bwe ekar pojak n̄an peptaij.
“Kwoj ke tōmak bwe Jisōs Kraist ej Nejin Anij?” ekar kajjitōk.
Liin ekar! “Aaet,” eaar ba.
Bisop eo ekar ettōn̄ dikdik n̄an e. “Peptaij ej juon kāālet elukkuun aorōk. Kwon kōņaan ke peptaij?”
Giorgia ekar ļōmņak kōn ewi jon̄an an kar iakwe Jisōs im kōņaan ļoor E. “Aaet!” liin ekar ba.
Āliktata raan eo eļap an Giorgia ekar jikrōktok. Ke liin ekar tuwiakļo̧k ilo dān eo, liin ekar lo an ro m̧ōttan im baam̧le eo alooje. Matilda ekar barāinwōt pād!
Ke jemen ekar ba jar in peptaij eo, naan ko raar kōm̧m̧an an Giorgia en̄jake aenōm̧m̧an im m̧ōņōņō itulowa. Innām jemen ekar kōkōm̧anm̧an an lukkuun katulo̧ke ium̧win dān eo im bar katuwe tok. Ke liin ekar waļo̧ktok, liin ekar en̄jake m̧ōņōņō im erreo.
Jemen ekar leļo̧k juon atbakwōj eļap. Jinen ekar kōttar ilo lōn̄in jikin iuwe ko kōn juon to̧o̧l im juon ettōn̄ dikdik.
Giorgia ekar en̄jake okmeņeņ itulowa. Ekar juon raan aorōk. Liin ekar kāālet n̄an ļoor Jisōs. Im liin ekar kōņaan ļoor wōt E aolep raan!
Kōmeļeļe ko jān Shana Keegan